自從亞媽搬咗去安老院之後有唔少隔離鄰舍都有問吓佢近況係點,老實講搬咗嚟lee間屋住都有12年,以前真係同啲隔離鄰舍冇乜兩句,見到面都係講聲Hi同早晨(連人哋姓乜都攪唔清楚唔,唔敢叫人乜生乜太!)
,以前啲師奶都鐘意同亞媽吹水,不過今時唔同往日,家陣小至家頭細務大至同啲師奶吹水都要一手一腳攪掂!
其實我又唔係介意同啲師奶吹水,尤其係住喺前後左右嗰幾家,佢哋都好好都好關心亞媽,叫我同亞媽都食多啲嘢小心身體,有時亦都好幫忙,好似lee排我住梗嗰座大廈換梗水管,對面個婆婆驚我唔知道,趁我番屋企嘅時候行過嚟叫住我話我知發生乜事,斜對面嗰個師奶亦都不斷update 我換水管嘅最新情況
!
當然亦都有鄰居會覺得點解唔接亞媽番屋企住(當然講得好婉轉吓啦),其實同一個問題亦都有親戚問過,啲態度同語氣亦都超級差,連由細睇住我同家姐大嘅親戚都咁講,識咗11年嘅鄰居有咁嘅想法又一啲都唔奇....把口喺人哋度,其他人點諗真係控制唔到,而且佢哋都係出於關心啫....算罷啦
!
不過有啲師奶又真係得個八字,試過有次朝頭早搭lift撞到住我斜對面個師奶又講起亞媽,咁啱又有個三唔識七嘅師奶聽到我哋嘅對話又搭爹問..."吓....乜事,你亞媽有乜事".....憑lee句說話可以睇得出佢同我亞媽有幾熟!所以我就扮聽唔到冇答佢
....不過第二朝又撞到嗰個三唔識七嘅師奶,今次走唔甩....唉!其實我相信亞媽同佢都唔謊好熟,真係唔明點解佢咁都要八一八.....話哂lee啲都係家事,重係啲唔開心嘢,三唔識七咁真係唔想理佢...不過點都要吹幾句.....一次都算啦, 點知今朝又係咁....另一個三唔識七嘅師奶唔知喺邊聽埋聽埋,又知得少少又勁問我....點呀點呀.....大佬晨早流流瞓都未瞓醒就問埋lee啲嘢,一早起身又迫人諗起啲咁唔開心嘅嘢.......八還八不過問之前有冇諗吓我感受呢
!
沒有留言:
發佈留言