晨早流流飲早茶

好耐好耐冇飲早茶喇...難得約咗幾位卜友仔,本來約咗LUNCH不過臨時又改時間變咗早餐時段, 晨早9點去飲茶真係唔知幾耐冇試過喇....當時...我...係遲到啦..HAHA!! 雖然真係未瞓醒, 不過食吓又吹吓水咁都OK吖, 耐唔耐一次都唔錯呀!

Urban Run....

每週一跑唔覺唔覺又玩咗幾年, 由開始新屎坑跑幾跑就斷氣,到家陣5K起錶....原來不知不覺間已經成為咗習慣,上個星期因為唔舒服冇跑,原來唔跑真係唔安樂架, 今個星期六又急不及待好想跑喇....今次再試用RUN KEEPER....OH...唔用都唔知原來我真係低能架, 成日屈個APPS唔準, 其實我只係有留意個APPS DEFAULT SET咗英里唔係公里(1mi=1.609km)....怪錯咗個APPS添..HAHA! 

其實上網見到啲人周圍跑真係好爽, 呢期天氣開始熱夜跑超爽, 一於搵啲新地方嚟個urban run午夜狂奔! yeah!!我已經諗到一個新地方喇, 跑完再UPDATE大家!

LUNCH@茶木

去茶木食LUNCH都唔算好特別, 難得係同啲同樹星期六齊齊去茶木食LUNCH, 多得公司半年一度嘅communication meeting啦, 晨早出到去老尖聽書,11點鬆啲又散水....一個二個悶悶哋就約埋一齊LUNCH.....

唔覺唔覺叫咗好多嘢食...超飽呢!

靚仔聰生日快樂!

真係唔認老都唔得喇, 眨吓眼排骨仔已經17歲喇,真係大個仔喇! 呢17年嚟由細睇到佢大,一直都係咁乖咁得人鍾意咁可愛!(HAHA佢雖然已經17歲,不過重係好鬼傻,用"可愛"嚟形容佢一啲都唔過份, 佢依然係我心目嘅小王子!

排骨仔,祝你生日快樂,開開心心! 唔好比咁多壓力比自己呀,加油,你得嘅!

其實我同大家姐靜靜準備個小驚喜比排骨仔, 佢唔知我哋安排咗個小型PARY架, 我同大家姐約好殺上排骨仔屋企, 我哋喺門口準備好蛋糕插埋蠟燭先按門鐘架, 等排骨仔一開門就見到個蛋糕比個驚喜佢!

呢個蛋糕佢哋好LIKE呀, 其實佢係檸檬天使蛋糕嚟, 今次啲焦糖脆脆用咗泡打粉整真係好好多冇咗苦味, 比起上次整嗰個, 呢個蛋糕整體呢講都進步咗!佢哋連蛋糕上嘅裝飾都好喜歡呢, 等我再搜羅多啲先,下次再比個小驚喜佢哋!!

生日緊係要食餐好啦, 呢餐勁飽,好味!

焦糖布丁小蛋糕

星期六成個下晝都落狗屎, 悶爆啦!一於整番個蛋糕玩吓, 難得唔想出街就整個複雜少少嘅嚟玩吓! 有幾複雜?!今次一個蛋糕要整3層嘢架, 頂層係焦糖, 第二層係布丁(其實亦即係法式焦糖燉蛋嘅嗰層燉蛋), 再整埋底層嘅蛋糕...重要焗佢參唔多成粒鐘, 呢幾個小蛋糕足足整咗兩粒幾鐘呢!

由於有焦糖嘅關係, 個蛋糕係少少偏甜(唔算過份甜),唔錯呢! 呢個係呢期比較喜歡嘅一款蛋糕! 可能我比較偏愛法式焦糖燉蛋呢!呢期我淨係整蛋糕? 非也! 有搓泥啦, 不過呢期個JOIN咗另一位老師, 嗯....8字唔夾啦, 啲製成品我都唔太喜歡所以未拎出嚟見人啦, 嗯, 比啲時間嚟執好啲再寫!

復活high tea....

大拿拿5日復活假又放完喇, 假期都係離不開食同HEA, 食方面呢個HIGH呢個TEA真係幾開心, 開心在見到啲咁精美嘅甜品已經好開心....(當然好睇又真係未必啱食, 大部份都偏甜), 以為又確係好喜歡食甜嘢, 次次食BUFFET第一樣拎嘅一定係甜品! 不過原來口味真係會隨住年齡有所改變架, 家陣已經唔太喜歡食太甜嘅嘢, 食少少都幾開心, 太多嘛真係會FEEL到漏同滯呢!

啲CAKE真係堅靚, CAKE POP呢家陣真係可以試吓整喎! (CAKE POP已經係算甜度比較適中呢, 整呢個都未嘗不可喔!)

某年某月某日....

曾某年某一天某地...係...食過呢啲....其實成日影影埋埋一堆相, 有啲都冇POST過, 過咗一段時間又唔記得咗喇....趁記得又寫吓先...嗯, 都係揀啲好味嘅先寫啦.....

呢度, 應該好多人都去過, 旺角大喜屋, 廿百幾蚊嘅放題質素同種類都唔錯喔!! 刺身都幾新鮮, 重有鮑魚, 黑松露帶子, 叫乜有乜冇漏單, 讚呀! 

 

到另一間, 深水埗嘅勝香園, 呢度啲蛋牛治真係唔錯, 好足料而且係即整...好味! 啲粥都唔錯, 其實重有豬手麵都出名架, 下次嚟試吓先!!

4月之星...

4月係肥C奶,二家姐同排骨仔嘅生日月....趁復活假期就整個生日蛋糕比佢哋賀賀佢....好耐冇整成個生日蛋糕喇...今次重試整天使蛋糕, 蛋糕底都冇乜特別, 個焦糖脆脆真係第一次整, 整個焦糖脆脆又幾好玩喎, 好似做實驗咁架, 一落梳打粉啲焦糖就係咁嘭漲之後好快又變硬, 好玩(不過呢個食譜嘅份量可能有少少問題呢, 個焦糖脆脆食到最後有少少苦味,可以梳打粉份量要減少啲), 不過排骨仔就好欣賞, 重想encore添, 好!等我再搵吓食譜, 下次再整個更好味嘅蛋糕你 ....