黏土製作の廣東食品最終回

Yeah.....個燒臘檔終於完成喇!!! 唔駛"責"過年....hehe!! 其實啲食物一早做好...不過未有時間砌好佢...重要將啲辣椒,紅腸同蔥札好....一整就整咗成晚...

想特別介紹一吓呢個詭異嘅"造型"...呢把刀凌空切嘢...好型囉...係老師教架...haha!

其他食物都出過鏡喇......重溫一吓啦.....

用啲剩餘物資整番碗"三寶飯"先.....

食完燒臘不如去飲吓茶啦....見套枱櫈幾得意...忍唔住手買咗set呀....

其實張枱唔係好大...擺唔哂咁多嘢....其實呢啲枱枱櫈櫈都唔平架....唔捨得買咁多...唯有cheap cheap哋D.I.Y.整個架擺嘢啦....買幾塊膠板同一支"AA"超能膠....終於....攪到一手都係"AA"超能膠....不過成個架...加加埋埋都係十零廿蚊...抵啦!

好嘢!!!!終於可以好好安置佢哋去飾物櫃喇.......其實個燒臘檔都幾高架喎.......好在啱啱擺得落.....yeah!!

FAitH...

自從"老翻"同"非法下載"相繼出現之後....已經唔知有幾多年冇買過正版CD聽喇....不過...今次....見係你....真係要支持吓...本來諗住聖誕睇你個concert當聖誕禮物送比自己....嗯...買唔到飛唯有買CD頂隱啦....

難得一隻唔講情情塔塔嘅CD....一樣好聽....啲歌詞一樣令人感動....讚!

公司X'mas Party 2009

今日又係我哋department一年一度嘅X'mas Party嘅日子....一如以往...都係意粉屋出品....都係個鮮什果沙律最好味! 個芝士餅係老細親自下廚架...又ok喎!

禮物方面...都係每人準備一份一舊水嘅禮物(上圖) ....都係一如以往....通常大家都會買份禮物自己鍾意嘅禮物...不過....其他人係唔多識欣賞嘅...haha...另外同樹"咀神"亦都會唔知去邊度搵啲禮物番嚟比大家玩大抽獎嘅...重係一人一份添...勁!(下圖嗰車嘢)

其實年年交換番嚟嘅禮物都唔多啱心水...我個公司個櫃桶已經擺咗好多件過期又唔啱駛嘅聖誕禮物喇! 今年終於換到份喜愛嘅嘢..真難得! 呢期亞祖確係好喜愛呢隻鴨仔呀....呢個小cusion其實係小喇叭嚟架(haha....小喇叭....真係襯番個人)...好可愛!即刻拎番屋企做裝飾 (size太細...做cusion其實唔多適合)

至於抽獎嘛....真係多謝幸運之神嘅眷顧....有"鬼腳皇"之稱嘅亞祖抽到頭獎呀..500大元惠康coupon! yeah!!!

又番啅@八月居

呢期啲朋友仔們興番啅...今日就番啅八月居嚟賀一賀11月喇星"活力先生" ....(haha..呢個名好耐冇出現過...聽到呢個名就會不期然諗起讀書啲白痴嘢!!)

由於朋友仔們實在太忙太難約喇...今次要玩食lunch先得...門口棵聖誕樹都幾靚喎!

大食怪又出現喇....8條友叫咗19幾碟嘢....真係19幾碟架 ....(oh......有碟難食嘅南瓜千層糕漏咗冇影添)...唔信你數吓!

典解啲窩貼煎完都係白雪雪架? 真係白過我隻光管腳....

排骨又未熟喎....要叫waiter再整過.....

蘿蔔糕都唔錯...辣辣哋...總括嚟講....大部份點心都ok啦...不過價錢就略貴!!

番到屋企又準備一吓聽日公司聖誕party嘅禮物喇....有朋友仔問我買咗啲乜...唉...實不相瞞..真係唔好鬼提喇..本應喺泰國買咗份禮物番嚟嘅...呢份嘢我買嗰陣真係參唔多成舊水架(當然係成舊水港幣啦)...不過...番到香港shopping嗰陣竟然見到呢舊嘢...重要平咗...真係一模一樣架! 唉...又唔好意思要同樹蝕...唯有再買多少少嘢搭夠佢啦...終於攪到份禮物變咗成個"福袋"咁...希望抽到嗰位同樹唔好介意...更加唔好揼我啦...就算係揼...唔該揼吓我個膊頭吖....呢個位比較攰呀!

講起聖誕....近日又有個小煩惱....話說亞媽生前有個老死...年年都寄聖誕咔比亞媽...前幾年我都有代亞媽回咔(年年都係一句happy new year同merry x'mas啦)...直到上年...真係冇心情又冇時間回信...嗯...今年又寄嚟喇....話哂都係長輩又係亞媽老死....唔回信又好似唔係幾好,相信亦都會令佢擔心亞媽....當冇事發生照回信又好似怪怪哋(不過呢位auntie年紀都唔細...又唔想講事實刺激佢嘛)....掙扎咗幾日喇....唉.....或者簡單啲做吓少年筆耕回信啦...直至有日.....(啋啋啋...長命百歲呀auntie!!)

番啅@骨煲皇

尋晚又有朋友仔話想打邊爐...本來約哂喺旺角等...不過...旺角實在係太多人....於是....諗住又再"番啅"骨煲皇....嗯....之但係......亞祖又再貫徹咗方向百痴嘅"特質"...都係唔識路囉...其實前兩日先去完咋!!終於都要打電話搵咗3個人"求助"....救命呀...超低b!!

查實今次得3條友去咋....加上十點幾先開飯....重叫咗個猪軟骨湯底(淨係食煲入面啲料都飽哂)...所以食得冇上次咁顛....

由於夜咗...連啲芫茜蔥都比人掃光....個湯底有啲胡椒...辣辣哋又夠味...唔錯!

番到屋企就攪埋我棵聖誕樹先...加咗少少裝飾冇咁"寡"...hehe...

餓狼傳說@骨煲皇

今日放工約咗小淫蛙佢哋打邊爐賀一賀同樹"馬馬"嘅生晨....一到6點我哋成村人就殺入大角咀...走咗去骨煲皇.....

嘩...我哋一行12人...11個女子(其實...係咪應該...12個都係女子先啱呢?!)....一去到好似餓鬼咁...即係呢...成棚人都正值狼虎之年...成班女士...真係....食極都唔飽架....

叫完一轉又一轉...前前後後叫咗3轉嘢....最後都比我哋一掃光...好可怕呀....

haha...睇番啲相...真係叫咗好多嘢...乜丸物丸都叫咗幾碟....

學"M姐"話齋...大家..."食飽啲"呀...真係冇乜幾何架咋....

唔係呃你架...呢頭隊啲嘢食落個煲....嗰頭又會出現一堆"怪手"出嚟搶食....呢個...真係一個弱肉強食嘅世界嚟架.....

打完個邊爐再整多個甜品真係非常之滿足....真係"飽哂"啦! haha!

大陸哩中環遊

又到年尾...又係清假嘅時候喇....難得放假當然要搵啲細藝唔好浪費啦! 初頭諗住簡簡單單去中環hea啦...典知...我呢個方向百痴嘅大陸哩....想搵碗"茄牛通"食都非常咁艱難...問完路人甲再問郵差叔叔再打電話問埋師奶仔先搵到咋...真係行到身水身汗!

千辛萬苦先嚟到...個檸蜜脆脆確係唔錯...冇令我失望....不過個通粉又確係冇想像中咁好食....當然又唔係差嘅!

食飽飽就去咗梳乎喇....前幾日特登卜定..Oasis...呢排有個熱石按摩promotion...個熱石按摩又確係考c服呀...可惜時間太短啦! 整完重有杯唔知乜鬼紅棗桂圓茶...又幾鬼好飲架喎...爽呀....呵呵!

迪迪尼爆房團

星期六...約咗小淫蛙佢哋去迪迪尼爆房....爆房之前都要食啲嘢先嘅...呢度係青衣城嘅潮樓....靜龜龜話佢你知吖...呢餐...應該係計錯錢囉...咁多嘢食....成餐嘢都係比咗一百三十幾蚊咋....抵到爛!

飲飽食醉就繼續出發喇....我都係第一次去迪迪尼爆房咋....去咗迪迪尼站再要搭一程免費shuttle bus 先去到酒店架.....

我哋今次住Hollywood呀...查實大家都係唔知啲酒店邊間打邊間....原來呢間酒店啲房唔係好大架咋...我哋重要有一皇四后一齊屈蛇添...之但係拍埋兩張床又ok喎!

擺低啲行李就出去行吓先....去吓另一間酒店八吓先....又確係幾靚咁喎....重好大吓.....................

而呢度就係我哋住嘅酒店喇.....都有幾架車仔影吓..

終於hea到夠鐘食buffet喇....食兩粒鐘...6-8點....要速戰速決喇....都有幾多選擇架喎....味道都唔錯........

啲蝦同蟹腳都ok...最欣賞係杯軟雪糕...又香又滑....

食飽就番上房hea喇....其實食飽都係8點咋...咁早番上房?係...無錯.....因為又有下場...哈哈...食完又食....其實由於時間關係...我哋下晝飲完茶就順便去Taste買咗一堆零食...諗住夜晚一路飲一路食....

總共有兩支白酒(不過有支白酒係細架)...一支紅酒加多兩支汽水...重有成堆薯片,生果...就咁睇啲零食....重以為我哋會住成個星期添! 最後酒就飲哂...不過....薯片就食淨哂!又估唔到大家無啦啦咁飲得...haha...5條友3支酒都唔夠...正酒鬼!

又静龜龜話你知啦....呢晚...亞祖做咗件好dirty嘅事呀........唔好咁大聲呀.....醜死人喇.....我....我...我呢....飲咗啲酒啦.....又眼瞓...終於.....攰到涼都冇沖就碌咗上床瞓喇........足足醃咗成晚咸魚呀....真係好dirty呀.....第二朝瞓醒即刻爬去沖涼...hehe!

第二日瞓醒就閃喇....之後我哋去咗迪欣湖hea...好似冇乜特別咋喎...hea咗陣就走喇.....之後我哋就嚟個"首尾乎應"...去"潮樓"度執多劑下午茶先各位歸家...勁攰呀!