424全青攻大步走

自從跑完全馬之後個人懶咗好多, 其實中間花咗好多時間同心機去份新工度, 好多時放咗工即刻番屋企, 日日拎住notebook真係邊度都唔想去囉....而且唔知點解呢期番工番到好似番學咁, 有好多lab 同tutorial要做又做唔切咁, 要番屋企繼續做功課, 最慘係番屋企做功課往往都做Q錯哂(明明之前喺公司試係冇問題嘅嘢, 番到屋企都係做唔到真係好沮喪!)....不過都總算溫過吓書囉都係唔好迫得自己太緊...其實番咗工成個月都仲係烚吓烚吓, 又要番屋企溫書真係有啲攰, 所以都係要relax吓嘅!

 

好耐冇玩團跑一於又去癲吓...今次跑友發起跑哂全條青公...勁! 唔好執輸玩埋一份先...之但係52K咁長呢期又跑少咁多...都係跑少少好喇....就18K啦....由洪水橋到上水.....

 

嘩!今日真係又焗又熱...加上好耐冇認真跑, 頭兩K已經覺得難頂, 跑到5K左右先回復狀態咋...好在途中灑咗少少雨又冇咁焗, 更感恩就係今日太陽伯伯休息呀...太好喇! 跑到13K左右又坐低飲啖茶(涷檸茶)食個包(奶醬多) 即刻醒神哂, 輕輕鬆鬆跑埋5K就收工喇....yeah!!

德國餐廳

上星期有位跑步buddy問我有冇興趣去德國餐廳食BUFFET LUNCH...咦, 好吸引吓喎...睇吓喺邊先?! OH....洪水橋...好似有啲偏喎...之但係又有輕鐵到喎(遲疑咗兩秒咁多啦, 就答應buddy喇...HAHA...) 見到呢間嘢買4送一喎....叫多幾個冇死啦...一於叫多3個一齊去食啦.....

 

YEAH....又估唔到啲buddy個個同我一樣咁為食...二話不說就JOIN喇! Buddy又真係冇介紹錯呀, 呢度環境好正, 地方寬敞又好坐, 食物又好味又多款式, 最正係可以慢慢坐慢慢傾, 我哋由11點坐到參唔多4點都冇人趕....三五知己傾吓食吓又飲吓真係好開心好relax!!

 

湯丸.....

 

又嚟呃細路....呢確係少咗搓泥...乘機搓吓都唔錯吖!

街馬2016

其實好少參加比賽, 更加少連續兩星期參加比賽, 所以都係選擇跑10K好啲, 唔想個個星期迫自己跑餐死(我都係比較喜歡自由自在周街跑嘅感覺!)....之但係....幾乎個個跑友都跑半馬...雖然唔可以同跑友們一齊上線, 不過今次終於可以喺起跑前嚟個大合照都已經好滿足喇!

 

半馬起跑先....十K喺半粒鐘後先開始, 一條友唯有早啲上線以免人迫迫啦....早上線真係唔同啲今次終於可以一開始就跑步MODE唔係步行MODE, 可惜天公不作美啦, 竟然落狗屎!其實幸好我只係報10K, 否則落住大雨跑半馬恐怕病都似...

Nike Women 2016

懶咗成個禮拜追番啲舊嘢先....雖然呢個比賽真心唔鐘意, 不過平日少比賽嘛都紀錄一吓啦! 咁我又點解都唔LIKE呢個比賽呢?! 嗯....其實跑街嘅嘢我真係跑邊都得架...不過最緊要安全囉...不過呢個比賽呢, 6千人參加咗但跑道根本容納唔到個多人, 條路已經窄架啦重要間開二條線(來回),真係迫到亞媽都唔認得! 跑十K不過頭6K都迫到亞媽都唔認得, 有好多跑手都唔係跑開步亦冇乜比賽經驗, 亂咁扒頭攝位真係非常危險, 人哋唔理狗衝我控制唔到, 唯有自己小心啦, 放哂龜咁跑真係預咗PW(personal worst), 跑到冇哂心機, 結果用咗個幾鐘先完成! 唉...算罷啦, 原本都係打算fun run....原來喺限時內(90分鐘)跑完有條鏈送架, 仲有成班靚仔企喺度比我哋任影..乜咁似名古屋個全馬嘅? 不過....搵成班靚仔款成班女呢個gimmick又真係世界通行架喎, 至少日本同香港一樣work囉!