臨近年尾又係要清假嘅時候,數吓數吓原來重有5日假期要喺下年前放咗佢,於是上兩個禮拜就開始plan吓有乜好做...不過答案係"冇"
見lee排好似冇乜煮嘢食,趁住放假今日又玩吓煮飯仔先....
尋晚睇到雜誌啲蕃茄薯仔湯好想飲,所以頭先就煲咗一大湯碗...正!(我連今朝浸咗冇煮到啲冬菇都隊埋落去,雖則好似有啲九唔搭八,但係啲湯又好似真係甜啲喎!)
豆角煎蛋...買咗$2.5豆角都係整咗一半叻,加埋兩隻蛋成碟嘢都唔駛4蚊...超抵!(不過我想澄清,其實實物唔係咁燶架,唔知點解影出嚟好似好燶咁!
重有外援腸仔同雞翼!好耐冇食lee啲斬料喇....
今日下晝又諗住帶亞媽去荃灣睇中醫,咁我就負責同亞媽搭的士帶亞媽去荃灣同大家姐佢哋匯合,同之前一樣我都係call咗架8折的士嚟車我同亞媽
......
落到樓下架的士已經到咗,咁我就慢慢扶亞媽上車啦,扶扶吓又聽到個電話响,我估都係大家姐call我(唔知點解佢劑劑都係教啱lee啲上車時間打比我),不過lee個時候又冇手拎個電話嚟聽,都係扶亞媽上車先算啦,不過個電話仍然不斷咁响(重係响完又响)!好鬼辛苦先扶完亞媽上車,之後就叫師機叔叔幫手擺架輪椅去車尾箱....
lee個時候個電話又响喇,見佢咁急call即刻聽吓攪乜見,原來大家姐搵我想話我知個醫師今日放假,叫我唔駛搭車去荃灣....唔係fa!真係好樣衰,啱啱攪完一大輪上車,家陣又話唔搭真係核突咗少少....好鬼驚比個司機叔叔炳
!冇辦法啦,唯有照同司機叔叔講,話比佢知唔搭啦.....好彩司機叔叔都好好人唔用粗口問候我啫.....淨係好淡然咁講咗句"又會咁嘅"就算.....真係超勁樣衰,唔知司機叔叔會唔會blacklist 我呢!
今朝去咗個seminar,都係講埋啲I.T.嘢嘅,查實都好耐冇去lee啲seminar喇,不過唔知點解我成日仍住今日個seminar會撞到人,嗰個人重會係"宙斯"
, 其實"宙斯"係上一份工嘅大佬(都有2年冇見喇),印象之中佢係lee啲seminar嘅常客,真係越諗越覺得會見到佢呀
!
個seminar10點20分開始,我10點3到個seminar 未開始,啲人喺哂大堂聚集,咗跟住就四周圍昅吓睇吓會唔會真係見到宙斯先!不過又估唔到又真係好鬼多人喎,都有百幾人重係男多女少(但係又唔覺有靚仔),真係幾難搵!不過昅完一輪仔都冇個似熟口熟面喎
,重夠鐘就坐添....算罷啦都係入去seminar room坐吓先!不過坐咗一陣之後,無啦啦見到門口有條對茂利鬼鬼鼠鼠喺門口捐入嚟.....睇真啲原來係"宙斯"嚟架!嘩!bingo 呀,佢坐咗喺後兩排咋.....
到咗break嗰陣就走去同佢相認,佢見到我都呆一呆,跟住打量咗我一陣就話"你好似唔同咗喎",我又冇整容都唔知自己有乜唔同咗!不過趁佢未話我"老咗又殘咗"之際我就先發制人問佢"咁係咪即係靚咗"!喺冇得選擇嘅情況之下佢唯有答"係"啦....同佢寒暄咗一輪,不過講講吓"宙斯"又無啦啦講番啲I.T.嘢,lee樣佢又真係一啲都冇變,果然係不折不扣嘅I.T.人,咁耐冇見都淨係掛住講I.T嘢,八第二啲嘢嚟聽吓都好丫....話時話除咗"宙斯"之外重有其他舊同事都好耐冇見喇,"宙斯"呀"宙斯"約食飯lee家嘢靠哂你喇,識做啦
....
自從星期六清潔完廚房之後就一直身痕,痕到家陣都重痕梗!初時以為係普通皮膚敏感沖個涼就冇事冇理佢啦,之但係第二日都重係好痕吓,我又諗住可能天氣乾燥啦,以為搽多啲潤膚膏會好啲,點知隔咗幾日都重係咁痕,手手腳腳同個身都有啲紅色一點點嘢,好似比蚊針咁
(若果係平時皮膚敏感都係hea幾個鐘就好番,應該唔會幾日都未好!)....最慘係尋晚痕到連瞓都瞓唔到
.....
攪到成晚冇覺好瞓真係好難頂,又唔知係咪有乜暗病,今朝終於靜靜雞鼠咗去搵大夫......之後我比啲傷勢比大夫睇又同佢講好似係執完個廚房出事,跟住佢就好肯定咁同我講"直情係執廚房攪出嚟啦,lee啲係疹嚟架....都算係皮膚敏感,通常係啲塵蹣攪到咁,你係咪好耐冇抺個廚房呀...",佢又真係冇錯,我相信廚房有啲位又真從來都未抺過.....不過大夫又話通常lee啲情況通常一個禮拜好可以自己好番....最後醫生比咗3日藥我止吓痕,佢話食哂啲藥應該好番...車!不過照計食完嗰3日藥都過咗成個禮拜,應該乜都痕完啦!
討厭嘅塵蹣,真係好想殺咗你!!
尋日原來諗住帶亞媽去睇中醫架,點知去到安老院又見佢勁瞓喎,見佢咁攰唯有放棄啦!諗住陪多佢一陣就閃,正當我plan梗幾點閃之際....
見到姨媽又嚟咗探亞媽.....姨媽見我喺度就拿拿淋拎咗成大包餅仔(細細塊好脆嗰啲餅仔)比個安老院姑娘話請佢食,好彩在我喺度啫,若果唔係佢又一定隊嗰包餅仔比亞媽食!
其實我又唔係真係嚴到連一塊都唔比亞媽食,有時我都會買啲燒賣同蛋糕比佢食(通常買啲冇咁熱氣嘅食物),每次都比小小,都唔敢比咁多佢食,lee啲嘢適可而止算啦! 之但係好多親戚都唔知點解一係唔賣一係就買一大堆嘢嚟,重好興一次過隊比佢食,大佬比著你一次過都食唔到咁多啦,何況亞媽重咁易嘔添,真係食咗都補唔番啦!重好多時都買埋啲熱氣又冇益嘅嘢, 又唔食得咁多,擺喺盞嘥!
不過咁多親戚之中最激都應該係姨媽喇,試過有次一嘢比咗幾條蛋卷比亞媽食(嗰排亞媽個咀重生梗非滋添,個咀唇又勁乾),有次又連續比亞媽隊咗三個林柿,又有次比咗成個月餅比亞媽咬(連安老院啲亞姐都睇唔過眼報串比我哋知)!佢重覺得我哋成日阻止佢比嘢比亞媽食,講極佢都好似唔明咁,次次吼我哋唔喺度就比啲又冇益又熱氣嘅嘢比亞媽食!我同佢講蛋卷好熱氣唔好比亞媽食咁多,佢又話蛋卷唔熱氣架!大佬蛋卷都唔叫熱氣都唔知乜嘢先叫熱氣....
唉!次次都係咁真係比佢吹漲,最慘係佢喺度我又唔敢閃,好驚閃咗佢又唔知隊啲乜比亞媽食,次次都要比佢鵝一大輪(佢出哂名長氣連我啲家姐都怕咗),都唔知點解次次都好邪得我番一個人頂佢,一路比佢鵝一路要制止佢亂比嘢亞媽食,真係難度高呀!
唔知大家重記唔記得前排有個哥仔打錯電話,之後重噏咗一堆廢話嗰個呢...其實佢又真係間唔中都打錯,通常都係打嚟搵'亞聰', 有次重打嚟搵完亞聰隔咗幾分鐘又打嚟搵Theresa
(都唔知係咪玩嘢)!其實真係好想叫佢delete咗我個電話號碼,等我唔駛耐唔耐就聽到啲白撞嘅電話!頭先嗰條茂利又打嚟,不過今次佢第一句說話唔係搵'亞聰',因為我講咗一句"喂?"佢已經知道自己打錯電話,重認得我把聲添!
之後條茂行又一輪咀咁講:
於是我又乖機同佢講:「咁你下次唔好打錯喇....」
茂利:「唔好,咁難得次次都打錯比你,得閒再搵你啦.....」(跟住又係一堆廢話,都唔記得佢噏乜)
亞祖:「唔駛客氣啦,唔駛再打嚟喇!」茂利:「唔係喎不如做個朋友啦,你叫乜名呀....」
亞祖:「真係唔駛客氣喎!....」(佢又唔係冇禮貌嗰啲,重幾好聲好氣添,都唔知點回應佢好)茂利:「做個朋友啦,你叫乜名啫....」(比佢激死,無啦啦唔知做乜朋友)
亞祖:「真係唔駛客氣喎!好啦拜拜啦....」(條友都係傻傻哋都係收線穩陣!)茂利:「咁拜拜啦,下次再打比你」(真係比佢吹漲)
查實我係咪應該強硬啲鬧佢呢,不過佢又好似有我個電話號碼咁,鬧佢恐防重多電話騷擾,真煩!
今日約咗師傅換屋企啲水管,聽對面屋個亞婆講佢話換完水管成個廚房好似七國咁亂,重猛咁叮囑我叫我預先執好啲雜物重要封好啲,若果唔係就執餐死!佢重叫我搵家姐幫手執嘢,不過大家姐重忙過我費事搵佢啦!
聽咗亞婆嘅忠告又真係唔敢怠慢,尋晚番屋企前特登去咗惠康買咗卷封相膠紙同一份報紙諗住番屋企封住廚房啲雜物,實行高度戒備....
終於用咗兩粒鐘封哂廚房所有窿窿罅罅,由10點攪到12點,勁攰....係咪封得浮誇咗小小!
由於約咗師傅朝頭早11點嚟整嘢,今朝10點幾就起身落街買早餐一路食一路等師傅上嚟....不過到咗11點半都未有聲氣,打電話比師傅又冇人聽,留埋口訉都冇人覆,最後要打去建築公司問(重要問咗幾次),最後等到2點幾師傅先出現,兩個師傅攪咗粒幾鐘就攪掂,不過.....換完水管之後.....個廚房真係好似打完仗咁,連廳個地下都勁污遭!
嗚鳴鳴....最後抺咗4粒鐘先至將個廚房還原咋!最慘係晏晝嗰陣掛住call師傅上嚟,攪到連lunch都冇食,重要抺4粒鐘廚房.....真係死咁滯....執好哂嘢7點幾先落街買飯盒食.....見今日抺嘢抺得咁辛苦,所以買咁盒粒粒雪糕獎勵吓自己.....哈!正,好味呀!
