繼續...嫺言嫺語: 12月 2014

2014年12月29日星期一

黏土功課之生菓檔(二)

呢個聖誕假除咗掛住食之外重好努力咁搓泥架。。。已經去咗埋尾階段喇。。。家陣比住啲＂起步階段＂嘅version比大家睇吓先啦。。。呢啲全部都未上色架。。。唔知你又估唔估到係乜呢？由細至大size慢慢估吓：

基本上呢幾種生果我都好喜歡食架。。。

開估：左上（龍眼），右上（我至愛嘅青提），左下（把幾兩把火嘅荔枝），右下（樹多啤梨）

呢堆嘛，我比肥Ｃ奶估，有啲佢未食過呢。。。

開估：左上（車尼子），右上（枇杷果），左下（布冧），右下（檸檬）

嗯。。呢堆有啲真係整嚟整去都唔多似。。。

開估：左上（蘋果），右上（蕃鬼荔枝，唔知係乜？上網check吓啦。。。），左下（芒果），右下（啤梨）。。。其他嗰啲下回分解！

吃喝玩樂聖誕節。。。。

今年聖誕假都係食食食咁渡過２５號就約咗啲朋友仔去我屋企打邊爐，話時話住咗呢度幾年都係第一次玩打邊爐，連電磁爐都要開家姐借呢。。。哈哈。。。同朋友仔去楊屋道街市買咗幾款海鮮又平又靚，超好味呢！

Boxing Day咪又係食。。先嚟lunch buffet夜晚食pizza.... 又係超級飽！

２７號就去咗個把鬼3D館又迫人間嘢又細啲佈景又窄超易穿崩。。。唔知想點。。。好彩啲飛有折啫（不過。。。都係唔抵囉）。。。

夜晚去咗outback食，平時食lunch去真係太heavy, 食晚飯嘅感覺好好多。。。。

食完dinner再hea咗陣就去MangoChaCha食甜品，呢間嘢原來係來自台灣主打愛文芒果，食物都唔錯，不過我始終比較喜歡呂芒嘅香味呢！

聖誕小蛋糕...

今年公司嘅X'mas party喺24號開, 都好彩24號早放而且二日唔駛番工,唔係嘅話真係未必有心機整cupcake去呢....你知啦整得cupcake個樣不能太衰嘛, 要花小小心思...

上年用creamcheese整topping....嗯...唔好食呢...其實我真係好唔like creamcheese...又唔識得整得好食啲.....次次啲comments都係...舊蛋糕就OK...不過上面"督"嘢就.....唉!都係算罷啦.....今次放棄creamcheese...死都唔用butter cream同royal icing...一於諗啲大家會食嘅嘢唔好嘥嘛!!

呢期紫薯好HEAT...而且紫色係我最愛...一早已經諗好用佢架喇...都係整番聖誕樹穩陣! 另一個都係古古力....公司有啲同事係古古力控, 呢款應該OK嘅, 本來古古力cupcake想食老本用番古古力醬架,點知原來用呢個杯杯焗啲蛋糕仔個造型有啲難控制, 最近拿拿淋打少少cream做topping算喇....之但係又唔夠cream又要諗吓整乜嘢款嘅topping慳啲cream...真係呢咁HEA....本來諗住12點前可以攪掂架啦...因為呢個topping攪到成點幾鐘先完成...重要洗埋嘢拖埋地先沖涼....終於零晨3點先可以瞓, 真係超攰!

都好...今年聖誕嘅目標已經完成.....可以整啲小蛋糕比朋友仔好開心呢...整嘅時候當然係開心啦...見啲朋友仔收到呢個小禮物都好驚喜,希望佢哋喜歡啦!

2014年12月22日星期一

黏土功課之生菓檔(一)

咪以為我呢期淨係整蛋糕就荒廢學業冇搓泥呀.....乜啫.....我都係搓得慢咗少少啫,冇偷懶架......其實呢堆功課已經係上一期嘅course嚟架喇....由於功課太多攪到家陣先搓完....重未上色添呀...希望聖誕節可能有時間上色啦!

頭先每種生菓逐一拍照都攪咗成粒鐘....攪到咁夜下次再UPDATE多啲啦...呢個course我足足走咗3堂呢, 有啲冇上堂都係靠想像整出嚟,所以有啲真係整得麻麻....已經試咗好幾次都整得麻麻就唯有接受啦! 下次再逐一介紹!

HOTPOT@禾牛薈

尋日約咗幾位朋友仔去打邊爐, 好耐冇打喇.....天寒地凍真係啱哂.....今次我哋去咗喺老尖嘅禾牛薈,樣樣都好好味呢.....已經約咗啲朋友仔下次去另一間分店番啅!

碟牛真係幾靚仔....桶蠔當然係十分之穩陣啦....

啲丸丸好好味呀......超飽呢!

2014年12月15日星期一

聖誕花環

上星期公司攪咗個course教整聖誕花環, 見佢5草嘢平平地又去見識吓先.....今次係同樹"吉蒂"姐教....佢重準備哂啲材料....嘩全部都係新鮮樹葉同果實, 好香呀真係堅喎...

其實整個花環唔算難...不過諗吓點配搭就勁花時間呢, 淨係揀條絲帶都已經諗好耐...而且啲果實係真嘢..整整吓又甩咁啲都幾呢HEA!

我都係喜歡清清地...不過我整得太慢喇, 本來想搵啲金色同銀色小波波點綴吓, 不過比人拎哂LU....

唔打緊, 番到屋企加咗少少白色細粒粒花仔...再執一執, 睇落冇咁寡, 掛喺大門口好有聖誕feel呢!!

Dinner@Mini Club

又同搣匙撐枱腳喇...今次去個Mini Club...Hmmm..其實呢度啲食物都OK...不過service真係麻麻,又慢重要漏單.....應該冇下次喇!!

尋晚少年筆耕咁整咗幾個cupcake...希望搣匙like啦!

朱古力軟心咖啡蛋糕+牛油朱古力topping

呢兩個星期都忙於整我嘅聖誕禮物, HAHA...好在...呢期唔係約咗太多朋友仔...唔係真係未必個個都整我切呢....整完呢個可以抖吓先...之後重有公司X'mas Party....又要諗吓點樣去呃神騙鬼喇!!

其實呢個cupcake都係搵啲食譜出嚟左抄右抄整出嚟...居然都呃得吓人...不過試完就諗到有其他地方可以改進, 下次個topping整個朱古力鏡面應該重好味呢! 其實我覺得cupcake應該可以有更多變化,由其係上面嘅topping家陣無論係cream, cream cheese, royal icing同糖皮都唔LIKE呢...我至憎啲一PAT PAT同超甜嘅嘢架喇...靚得嚟都要好食架嘛, 希望整到一個內外兼備cupcake!!

呢個cupcake未至於好好味,起碼我成舊都食到先啦! 下次再改良吓再搵白老鼠試吓先!

2014年12月7日星期日

詭異蜂蜜蛋糕

又係蛋糕HAHA....我都話會好努力咁試架啦...今日呢個真係幾型, 用高筋粉整蛋糕, 我見識少真係未聽過呢...一於試試佢....睇個食譜除咗用高筋粉比較型之外...其他材料好正常應該唔會衰得好緊要嘅!

嗯....焗出嚟個樣唔錯....不過個款好似乾咗啲...啲質地唔似一般蛋糕咁鬆軟....試完味之後... hmmm ...質感好似有啲怪.....送唔送比人好呢....之但係...再整都係整番啲"巷"嘢, 算罷啦....一於送出去啦....希望朋友仔唔好介意...今次啃住呢個先.....下次整啲更好味嘅比你哋!!

韓樓

為食嘅亞祖真係乜鬼都啱食....泰國,韓國,日本,粵菜,西餐真係你噏得出我就擺我入口架喇....星期五又約咗朋友仔去開飯...食完個部隊鍋再去食份子雪糕.....呢期出咗隻粟一燒味...有趣有趣...都幾特別喎!!

杏仁檸檬蛋糕...

好快又到聖誕喇.....其實我對呢啲節日從來都唔太重視....有時過時過節亦都未必嘢嘢有節目添....之但係又唔知典解今年又想整啲蛋糕比啲朋友仔作為聖誕禮物送比佢哋喎, 所以呢期密密整密密試..HAHA....其實大家都係做緊白老鼠....冇辦法啦...我係鍾意整餅,不過又唔鍾意整嚟整去都係一式一樣嘅嘢咁冇新意.....所以都係不斷嘗試....其實到目前為止我都真係好少整重覆嘅嘢(由其係短期之內係咁整同一款嘢真係有啲悶呢!!), 之但係家陣要趕工都難免要整啲熟手又簡單啲嘅嘢....呢個係近期嘅新嘗試,簡單又幾好味....已經整咗兩次喇...不過屋企人重未食呢...睇嚟要整第3次先得嘢....