每月一次

又嚟料喇! 今日又係令人煩躁不安, 戰戰兢兢, 食慾不振, 工都唔想番, 電話又唔想聽, 朋友都唔敢約,食唔安坐唔落嘅日子"MONTH END" … 唉!又係我當黑, 查實由上年11月寫lee個blog 開始, 每個月尾都必定會寫 month end support嘅慘況, 次次都唔知要攪到幾點先走得或訓得

, 重鑊鑊新鮮鑊鑊甘先頂隠, 重要次次都咁黑係我遭殃, 唉! 餐餐都寫埋lee d 嘢, 真係寫都寫到厭, 你哋係咪都睇到好悶?

不過今次同上幾次都唔同, 因為今次媽媽, 姐姐同師奶仔都閃哂, 基本上係所有人都閃哂, 得我一條茂利喺度等息咋,重係等極都冇消息嗰隻!頭先個user 重無恥到問我:「你今晚有冇約人呀?」…我答:「有呀 (查實又真係冇約人嘅

)」,佢竟然話:「咁就要mark 住你唔比你走喇!」…救命呀,真係唔想接佢啲call呀!

頭先重口响响咁同師奶仔講6點半前要閃, 重要熄埋電話玩失蹤唔好比媽媽搵到! 好明顯lee 啲嘢講就易姐,家陣又係要贛居居坐喺度等運到! 家陣重唔知幾點先走得添, 下個月year end 睇嚟都係凶多吉少,死得更慘!

啱啱service department 嗰個亞叔走嘅時候途經我個位, 佢話: 「成層樓得你一個未走咋喎做乜咁慘呀…」。 好孤獨呀!真係有啲想喊嘅衝動… 鳴鳴…

 

搵食艱難

上星期六下晝同咗亞媽去美孚嗰間富臨飲茶, 我哋一點半鐘去到, 見到酒樓出面有條人龍但係唔知排梗乜

, 睇真啲先至知原來啲人係排隊攞飛等位, 嘩!嗰條龍閒閒地都有三、四十人, 諗到lee度真係好想好想閃呀! But一埸嚟到又唔想掃興唯有死死氣排去龍等啦

, 喺條街等咗十五分鐘…終於…可以入到酒樓入面"企"喇, 都好唔駛喺條街度食風!

侍應姐姐一嚟就叫咗一堆人入去坐, 但係之後就冇哂聲氣。唉!我哋要等嗰堆人食飽飽走人先至有位, 就係咁等呀等, 等到參唔多三點先至到我哋職工尾圍用膳, 等咗粒幾鐘都係搭枱咋,個侍應哥哥重要漏單添呀…真激死! 終於hea到四點幾先走人, 兩條友飲餐茶飲咗三粒鐘都算經典!

最攪嘢就係夜晚同骨妹、小李喺旺角八點幾行完街街諗住去打邊爐,不過啲酒樓又係堆滿哂人,排哂長龍,見到都驚…終於要去小肥羊先有位! 估唔到家陣去茶樓飲茶食飯係咁艱苦架!

 

一場虛驚

前晚夜晚晚番到屋企， 櫈都未坐暖亞媽就口震震咁同我講：「"二蔗孤"聽日陪我去睇醫生，係呀我賣哂啲股票將啲錢入哂去銀行，銀行重有小小定期架，我重有份保單，我有乜事你拎份保單去銀行就有得賠架喇，唉！有時啲嘢真係話唔埋架，講定比你聽好啲…」。聽到我拗哂頭

，其實lee排都見亞媽好咳吓，重瘦咗好多吓，叫佢睇醫生叫咗幾百次，but佢一路都冇睇，無啦啦咁自動自覺睇醫生真係有啲唔對路…雖然覺得佢可能係自己嚇自己嗰隻，但係都好擔心呀

！聽到佢咁講唯有叫佢「早啲訓啦，唔好諗咁多，快啲睇好佢好過啦！」。

第二日我同大家姐放咗工即刻仆番屋企睇亞媽，亞媽話原來佢係氣管炎所以先勁咳，咳到冇哂胃口咪瘦咗囉，醫生同佢講食幾日藥就冇事，唔駛咁擔心…聽到佢咁講先至放下心頭大石咋！

後尾大家姐同我講番原來前晚同亞媽傾電話，亞媽又係同佢講：「年紀大真係話唔埋架，自己知自己事啦，我有好多嘢都想講比你哋知架，不過我都講低比亞袓知架喇…」，所以尋晚大家姐同我一樣放咗工以９秒９嘅時間番屋企睇亞媽，差啲比亞媽嚇死!

 

交功課?!

尋日同咗亞媽去完街街食埋飯番到屋企9點幾, 喺屋企hea 咗陣諗住去沖涼嘅時候個電話無啦啦响, 原來係肥師奶打黎…

 佢同亞媽爹完一輪之後, 亞媽就隊咗個電話比我, 肥師奶一嚟就話:「亞仔 (即係姨仔), 你聽日交兩幅圖畫比我同哥哥, 你上次劃個嗰哈姆太郎好靚呀, 下次我獎貼紙比你吖…」, 車! 又係叫我交功課, 重以為佢掛住我搵我傾偈添…

唔知做乜鬼lee排佢哋成日喺度玩扮老師, 又要我哋扮學生陪佢哋玩, 大家姐要扮學彈琴, 亞媽重慘日日都要學計數同寫字

,我淨係耐唔史劃吓畫已經算係休差!

空氣中嘅朋友

頭先lunch 同師奶仔撐完枱腳, 諗住排隊搭lift番公司, 企咗一陣，無啦啦後面有個亞姐一路食住杯雪糕 一路問我：「你係咪亞Joe 呀?」, 我答：「係呀！」(but 我諗極都諗唔到佢係邊個,但係把聲就似曾相識咁)！跟住佢就話：「真係你...」，真係聽到我拗哂頭

,跟住亞姐再話：「我係Winnie呀，之前我都估係你架喇,我重想去你嗰邊“莊”吓你個樣添...」,我望吓企喺亞姐隔離嗰個"喪笑秘書仔",再諗多２秒先至醒起原來Winnie 就係lee 排頻頻打電話比我叫我幫佢generate report 嗰果user,真係聞名不如見面

其實類似嘅事耐唔史都會發生,有次喺pantry斟斟吓水又有人無啦啦走埋黎問：「你係咪亞Joe 呀?」,　次次都唔知啲人係乜水,但係又唔知點解啲人會知我係乜水！

喺度做咗幾年嘢, 真係識咗唔少空氣中嘅朋友, 一打嚟唔駛講名知佢係邊個,講嘢嘅語氣重好似重我好熟咁,但係就從來都未見過面(或者見咗都唔知),諗諗吓lee個情景好似細個聽收音機咁,成日聽啲DJ講嘢,但係又未見過佢哋個樣,好神秘咁,不過當見到啲DJ嘅真面目嘅時候,通常都覺得...

,可能啲user 見到我都係咁諗!

 

 

 

 

 

 

 

全軍覆沒

上星期五去咗公司攪嘅annual dinner, 同往年一樣都係喺金鐘嗰間萬豪酒店食,姐姐重一落機就趕去食lee 餐,非常之有誠意

! 由於我哋得8個人去,坐唔夠一圍,所以攝咗3個全完唔識嘅同事過嚟,其中一個3唔識7嘅澳門姐仔重係得一條友坐咗嚟我哋度,佢啲同事就坐哂喺隔離枱, 好孤獨咁! 最慘喺澳門姐仔嘅左手邊坐咗個全department 最自閉嘅"自閉男"

, 右手邊就係另外兩個3唔識7嘅同事, 澳門姐仔真係悶到爆!

其實唔止係澳門姐仔覺得悶, 我哋都覺得好閹悶,  雖則公司已經請咗"蘭子" 做mc 攪氣氛,but 啲氣氛都係悶悶地咁…啲表演嘉賓重攪嘢,搵咗杜德智, 兩個黑人同埋幾個身材惹火著哂bra top 嘅鬼婆

又唱又跳…當然真唔知佢地唱梗乜啦, 全埸5百幾6百人好似得班咸濕仔識得欣賞(but應該淨係識得欣賞啲鬼婆),其他人都悶到發瘟!

其實攪咁多嘢最吸引都係抽獎環節,不過今年應該係最cheap 嘅一年, 雖然都係有一百份禮物, but 啲禮物除咗縮咗水之外, 有啲重係本公司賣唔去嘅product

, 好慳皮! 不過我哋嗰枱個澳門姐仔都抽到一部DVD機 , but 等咗成晚我哋department 都係食白果咋 (簡直史無前例咁渣)

, 算罷啦, 當食餐免費飯都好吖!

 

中學校友會

話說上個月見番啲10年冇見嘅同學, 其中一個同學仔"慧慧"話比我知原來同我哋一屆嘅"高材生" 整咗個"網上聯盟"比啲舊同學仔聯絡,趁今日有啲時間咪上網search 吓個web site 囉....不過我誤打誤撞去錯咗以前間中學嘅官方網站....我重以為lee個就係"高材生" 整嗰個網站添, 原來兩個網站唔同架, 怪唔知得揾極都揾唔到"慧慧"講嗰啲舊同學仔嘅資料啦!

頭先睇咗以前間中學嘅官方網站, 見到好多以教過我嘅miss 同亞sir嘅相, 佢哋除咗個樣比以前更加成熟之外又真係冇乜變過,有兩個亞sir 重札咗職做咗副校長添,幾堅,不過個訓導主任重堅做咗十幾年都重係做梗訓導主任,無得頂! 不過睇完一大輪都好似唔多覺我最like嗰個老師"薜太"嘅相

,想當年"薜太"係教我美術架,佢真係非常之nice,成日都係笑面迎人咁, 唔知佢家陣係咪冇做呢

下面嗰個就係我最like 嘅課室"美術室"喇:

Lee 個就係有蓋操場,以前食飽飯冇嘢做就係喺度hea 架喇!

講番"高材生" 個網頁, 原來有啲舊同學仔都已經登記咗做"網上聯盟" 嘅"盟友", 重有唔少老師都留過message 添, 重間唔中攪吓敍會, 頭先我都登記咗做"盟友",重用咗中文全名嚟登記添, but 怕且都冇乜人記得我係乜水lu!

 

失而復得

今朝喺公司去完洗手間之後番埋位坐,坐咗無幾耐,無啦啦有個女子行過嚟,原來係隔離department 嗰位四眼姐姐仔, 佢問我:「你哋頭先有冇人跌咗條手鍊?」,正想問吓師奶仔有冇跌嘢之際, 咁啱昅到四眼姐姐仔拎住嗰條手鍊好熟口面, 撞鬼, 原來條手鍊係我架, 跌咗都唔知添!

正當我想同四眼姐姐仔講“唔該”嘅時候就聽到隔離department個秘書 Lisa 姐大大聲咁講:「你真係好彩喇,我哋重諗住拎去HR添,佢哋實send e-mail 比全世界,問邊個跌嘢…」,之但係佢嘅聲浪實在太大, 攪到同圍嘅人望哂過嚟, 勁魚皮

…重揚過send mail比全世界 ( send mail 都可以暗瓦底去HR攞番吖) ,比佢吹到啤一聲!

不過最攪嘢都係偉信, 佢一聽到四眼姐姐仔幫我執番條鍊, 就乘乘機機話:「咁好彩應該請食Tea啦

…」,咁到比佢入到位屈食Tea ,真係犀飛利! 查實我重爭佢哋兩餐Tea 都未請, 下禮拜等齊先請啦, 有拖冇欠…