好狠

話說我坐坐吓巴士嘅時候,中途有3母女上車,個媽媽睇嚟好young唔知有冇30歲,手抱一個bb女,重帶住一個around4,5歲嘅囡囡,個囡囡就拎住杯汽水.....跟住3母女就坐咗喺下層嘅車尾(由於我坐倒車嘅關係,所以八得好清楚)......

佢哋坐低之後個媽媽就拎咗囡囡杯汽水,之後媽媽就一手拎住杯汽水飲一手抱住個bb,飲飲吓個bb手仔fing fing 咁,fing跌咗杯汽水......個媽媽當然就好扯火啦,一面抺乾自己條褲一面鬧個bb,又打咗bb隻手仔幾吓....個媽媽鬧咗一陣就冇出聲,以為佢鬧完架啦,點知隔咗佢重繼續鬧,重係咁打bb隻手仔同腳仔,個bb又真係喊得好淒涼,最攪嘢係佢一面打一面同個bb講道理...."你知唔知自己衰乜,做乜咗郁嚟郁去,點解你咁曳架,你乘啲得唔得呀(但係個bb得幾個月大架咋,斷估佢應該聽唔明lee啲道理)....由於個bb喊得好犀害,個媽媽又鬧得好大聲,好多乘客都眼望望,個刻真係好有衝動叫個媽媽唔好再打個bb.....最攪嘢係坐我斜對面個大肚婆唔知係咪見到我睇到好肉緊,佢都猛咁檸轉面望個bb發生乜事,之後我重同個大肚婆你眼望我眼.....我諗佢諗嘅嘢同我一樣....."個媽媽駛唔駛咁狠呀"!

開飯

又到月尾喇,今晚終於輪到我做stand by support,6點放工就一支箭咁標番屋企等運到,去到葵芳間百佳諗住買兩條菜心煮麵食啦(查實都食到厭厭哋...又係菜心+麵/通粉+雲吞

,但又諗唔到食乜好

!).....拿住袋菜諗住去比錢嘅時候見到個亞姐拎住袋A菜....好吸引咁,住就即刻轉咗轉軚攞咗袋A菜,重攞咗罐豆豉鯪魚,再拎多pack北姑蒸雞(現成一pack pack蒸熟就食得嗰啲)......跟住就飛巴士番屋企開餐....

豆豉鯪魚炒A菜.....原來真係好易煮...啱哂我lee啲又懶又唔多識煮餸嘅人整!

lee碟北姑蒸雞真係有啲強差人意,都係自己親手整嗰啲好味啲!

 

大鄉里

頭先去葵芳食完飯諗住搭巴士番屋企嘅時候突然間醒起今晚有金多寶,咁啱葵芳又有投注站,所以就閃咗去買六合彩,話時話今次都係成世女第2次單拖去買六合彩,對上一次單拖去投注站已經係5,6年前嘅事(上次係去灣仔嗰間投注站,當時嗰間都好殘舊吓....)

雖然經常都會經過葵芳,但係嗰間投注站真係一次都未去過,記得細個經過門口成日見到有好多亞叔企&踎喺門聽馬仔,硬係覺得好入面雜咁,所以一直都冇去過........頭先入去嘅時候都有啲戰戰兢兢,唔知會唔會有好多亞叔喺度,不過原來間嘢裝修過,入面好新好靚重好鬼大好先進,啲亞叔唔駛企又唔駛踎,個個排排坐哂喺度睇派彩(查實係咪間間都係咁架),我都覺得自己非常之大陸喱.....參觀完一輪就斥資咗20大元買個希望,不過唔夠半粒鐘我嘅希望就幻滅咗喇,重要一個冧巴都唔中.....

 

Giga S Amold

尋晚同屋企人去咗荃灣大會堂,去得大會堂就當然係有嘢睇啦....有乜嘢睇.....梗係勁嘢啦.....就係排骨仔去表演彈琴喇,而佢就揀咗首Giga S Amold嚟彈!

咪以為真係咁勁,查實祗係排骨仔學彈琴間學校攪嘅音樂會,每個小朋友都係表演2,3分鐘啫....排骨仔話哂學咗一年咁大把梗係要展吓身手啦!其實lee個音樂會都係想比啲鼓勵比小朋友,好多小朋友都係學咗冇耐就上台表演,十個有九個都係彈得甩甩cut cut,不過齋睇佢哋嘅勇氣同埋個可愛樣都已經令觀眾拍爛手掌!

就彩排喇,好緊張呀....咪熟啲歌普先!

終於出場喇......

唔公平

唔知lee排係咪得罪咗啲星洲人,今日好邪!今朝晨早流流就比星洲人老屈話我無啦啦喺個system度submit咗個唔應該submit嘅job, 好彩師奶仔幫我澄清咗啫!原來嗰個user同我同姓,個星洲人見到 'LAU' lee幾隻英文字就二話不說咁隊咗我出嚟....吹漲!

咁都算啦,之但係今日連update program都有阻滯,話說尋日叫咗星洲人幫手update之前改個program,但係嗰邊啲人又好似冇乜反應咁,今朝就諗住問吓乜情況.....點知比嗰邊嗰位亞姐反問我個program 要行幾耐 ,又質疑個proram 唔夠快......重叫我再tune吓個program(查實個program祗run咗幾秒咋)....大佬,你用個慢吞吞嘅test enviroment嚟試,冇LIVE咁快就話我個program慢,根本兩個enviroment完全唔同冇得compare,事實上LIVE行個program亦都快過佢advice嘅時間好多,好彩我之前又真係tune咗個program,performance應該會再好啲,可以大到佢!跟住好唔忿氣咁send 番個mail還擊,佢已經冇聲出啦...

lee排星洲嗰邊嗰個亞姐好似食錯藥咁吓吓都捉得好緊,佢咁攪法整到個個都唔想改program,明明ok都諸多挑剔,最乞人憎係星洲啲人寫嘅program居然係要run幾日,但係又冇人出聲,我哋嗰啲稍為行多幾分鐘就即刻比人串....真係超唔公平!

 

痴男怨女

尋晚去APM行街街，去到5點幾見有啲肚餓就走咗去KFC食吓嘢醫肚，買完嘢食之後就搵咗個靚位坐低慢慢嘆．．．食食吓就有pair中年情侶坐咗喺我隔離，佢哋講嘢都非常之咁大聲，但係我都冇乜留意佢哋講乜，不過都隱約聽到個男子又好似成日問個女子”你肚唔肚餓啫？你肚唔肚餓啫？”．．．之但佢好似問咗好多次咁，喺迫於無奈（佢哋真係好大聲）同好奇心嘅驅使之下，就開始留意佢哋嘅對話

．．．．

男子：

「你肚唔肚餓啫？你肚唔肚餓啫？」

女子：「小小啦，小小啦，你買唔買嘢食啫？」

男子：「咁你肚唔肚餓啫？你肚唔肚餓啫？」

女子：「小小啦，小小啦，你買唔買嘢食啫？」

男子：「你肚唔肚餓啫？你肚唔肚餓啫？」

女子：「小小啦，小小啦，你買唔買嘢食啫？」

男子：「你肚唔肚餓啫？你肚唔肚餓啫？」

女子：「小小啦，小小啦，你買唔買嘢食啫？」

各位，唔好以為我copy & paste 錯咗，嗰pair情侶真係咁講架．．不過之後個男子有句新嘢．．

男子：「你係咪肚餓，你自己係咪想食嘢？」

但係個女子又冇乜新意咁答．．．．

女子：「小小啦，小小啦，你買唔買嘢食啫？」

之後又係．．．．．

男子：「你肚唔肚餓啫？你肚唔肚餓啫？」

女子：「小小啦，小小啦，你買唔買嘢食啫？」

如是者同一段說話再重複咗數次之後，個男子終於肯話”咁買小小嘢食啦．．．

”，過咗一陣pair情侶就拎住包”格格趣”坐番同一張枱．．．嘩！問咗半日先買到包”格格趣”，若果要開餐飯咪要前一晚問定！不過佢哋又幾鬼溫馨嘅，你一啖我一啖咁．．．(查實都係我八卦啫，人哋講嘢關我鬼事咩．．．不過真係好頂隱囉!)

 

誤打誤撞

lee排屋企部電腦唔知發咗乜嘢神經,一上網就不斷斷線,次次上唔夠10分鐘啫就有個error 乜嘢"Generic host process for win32 service 發生問題",跟住就自動斷線,部機重要reboot先可以再上網,真係求生不得求死不能!

其實之前上過網search,若果lee個message 出現嘅話就好似話個window 要update啲嘢,亦有啲人話可能係部機中咗毒先攪成咁,所以尋日喺公司download咁啲update window 嘅file,又摷咗一系列嘅防毒軟件諗住幫部電腦排毒,重滿懷希望咁拎番屋企試....可惜.....攪到夜晚晚點幾點都我徒勞無功.....

由於唔知衰乜,今日就問吓個同事"偉信"有乜法寶,頭先番到屋企就跟住偉信教我嘅方法試吓啦.....but.....都係唔得,我真係連"還原setup"lee個絕招都用埋,但係都係冇用!! 正當我諗住放棄之際(裝過哂啲嘢應該冇咁嬲),我就本住橫死掂死嘅精神,試吓自己改吓啲setup....攪吓攪吓又好似ok喎!家陣上咗粒幾鐘網都未死得....希望真係fix咗個問題啦!!

邪門

唔知點解次次有人放親假(重要係放長假嗰隻),嗰個人跟開嗰啲嘢就會出事,平時冇乜問題嘅嘢都會無啦啦死,通常係放假嘅頭兩日就即係會舔嘢,勁邪!

今日又係咁,姐姐平時睇開嘅system死死吓咁,有個system比user投訴話慢,另外一個system又無啦啦hardware有事,死得好慘,怪唔知得尋日搵極都搵唔到佢衰乜啦,原來啲嘢都唔stable,時得時唔得咁....做都唔係問題,最慘啲嘢死得好頻密,比user炸哂型.....

今日先係星期二咋,lee個week真係唔知點過,睇嚟真係要拜吓神穩陣啲!姐姐,喺lee一刻真係好鬼掛住你,你快啲番嚟啦,啲user好煩呀!

 

不速之客

星期六晚點幾鐘又未瞓得著,諗住喺屋企坐喺梳化攤抖吓啦,坐坐吓望到對面牆好似有啲嘢郁郁吓,再望多幾望……嘩……好恐怖呀,原來係有隻小強(應該係大強添呀!)喺天花板度散步, 小強已經夠得人驚,家陣重要係大強,重要係曉飛嘅大強,真係嚇死!

見大強好似好鬼high咁繞場一周, 又唔敢打佢,我唯有即刻飛奔入房鎖埋門,讓咗個廳比大強玩! 但係我入咗房又唔敢再出廳,最慘係個廳又未熄燈同冷氣,個廳又冇開窗大強同我都被迫困喺屋入面,等咗幾個字覺得唔對路唯有硬住頭皮行出廳….一路行一路昅大強飛咗去邊,短短幾步路行足10分鐘先到,後尾見到大強飛咗入廁所我即刻飛奔去熄哂廳啲燈同冷氣,再開哂啲窗希望大強過主,然後又用9秒9 嘅時間衝入房鎖埋門瞓,終於攪到2點幾,但係又驚到瞓唔著!!

小強lee家嘢實在太恐怖,等二朝一早起身,即刻落術買咗一大pack”威滅”旁身….. 雖然喺屋企搜索完一輪都唔見大強嘅出現,之但係家陣成日都仍住佢重未走,好鬼驚佢又無啦啦飛出嚟散步,救命呀!!