零的突破

唔覺唔覺原來已經跑咗8年步, 之但係跑還跑, 我又真係絕少比賽架....咁多年加加埋埋都唔知有冇玩咗10個比賽! 不過每年總會參加少少比賽SET少少目標比自己希望增加少少趣味!

 

以前一個人跑嘅時候對pacing亳無慨念, 自從加入個跑步谷次後認識咗唔少跑友學到唔少跑步嘅知識, 慢慢又留意吓自己嘅pacing, 喺呢年幾又真係比以為跑得快咗多咗亦進步咗! 今日參加咗半馬比賽竟然可以跑到一個唔錯嘅成績, 仲拎到獎真係意想不到呢! 其實同啲跑友仔一齊比賽已經好開心...獎呢家嘢真係bonus嚟, 可遇不可求,感恩有幸一嘗攞獎嘅滋味!

 

 

御前大江户

我認我膚淺...啲卜唔係食就跑其實都幾悶吓....其實呢排有好多嘢想寫架...今年過得好快亦都好充實, 今年嘅聖誕節係有史以嚟咁期待,成大半年冇放假趁聖誕要休息吓....好攰呀..快啲到聖誕!

 

其實呢期都係靠星期六日先放鬆吓....乜都唔好諗去做吓運動跑吓步確好爽, 重可以同啲舊同事\跑友食吓嘢聯誼吓! 星期五做完MFT又食好嘢....燒海鮮確係幾正, 不過得二粒半鐘真係唔多夠....燒咗一轉都夠哂鐘!其實佢重有好多熟食...叫埋熟食又飽到反肚...

賽前準備

11月某一日...我應承過自己喺跑馬之前都要好好珍惜每一次長課, 每一次都要努力同認真啲去練習! 難得星期六有快腳跑友一齊去拎皇馬選手包就順個便齊齊操吓長課....老老實實梅子林嗰段真心跑得好差, 無啦啦堅扯蝦焗住行咗陣.....落山之後先慢慢回復狀態, 上鈄不朽都係最渣, 練嚟練去都只係龜速跑...只希望比賽時可以KEEP住跑就好喇!

肥!

 

呢篇卜一個字講哂....咪就係"肥"囉.....呢個禮拜隔日飯局真係食到有啲驚....乜解救一個二個都好似前世冇食過嘢咁係咁ORDER...而我又餓鬼上身咁人叫我又係咁食....都話呢期重咗架啦....又唔忍口遲早變肥婆啦!

 

 

先嚟星期一同毅行圍徒+SUPPORT TEAM一齊食飯賀賀佢....酒就緊係少不了,酒我就真係飲咗好少啫...不過就係咁食同係咁食囉!

 



星期三又同咗同事去潮江春食飯, 因為呢隻辣椒蟹唔洗錢所以去食, 之後再叫咗碟豆苗, 斑腩煲同杏汁豬肺湯(個湯超好味)....其實呢...呢餐得兩條友食...睇番啲相都有啲過份囉...最後除咗碟菜之外其他嘢都食唔哂啦.....只好打包留番第二日再食啦!由於呢餐實在太過份真係飽到上心口....又咁啱呢餐好早就食飽閃人, 最後我番屋企換作跑衫跑番13K嚟贖罪, 跑完確係自我感覺良好囉!

到咗星期五又同咗舊同事食飯, 三個人又係叫大咗(有碟飯冇影到囉), 好耐冇見大家喇, 我都UPDATE咗近況....不過呢餐見到啲舊同事好節制(其實佢哋都幾細食架....佢哋停手嗌飽我仲食緊架...)...見佢哋咁節制我又突然叮一聲, 怪不得呢期重咗啦! 呢期我真係好冇節制, 越食越多咁怪不得重咗咁多啦....明哂!!

 



後記: 咁其實我即係重咗幾多? 拿拿拿講先唔好打我呀...其實...我...大拿拿重咗4磅架.....乜啫我咁細粒, 4磅好多架嘛.....嗚嗚嗚...

Eat & Run

今朝6點幾彈起身諗住同家姐一家跑個Unicef親子跑, 點知參唔多出門口之際望吓個WhatsApp先發現原來個比賽因為天雨關係取消咗....唯有瞓番, 等lunch再一齊去食buffet啦....嗯, 又飽到上心口喇...都係跑吓消消脂好啲....又估唔到下晝天氣咁好! 即刻隊番個23K先....點個跑唔夠2K feel到個胃重頂仲爭啲嘔, 即係慢番少少先OK番(其實我已然等咗兩粒鐘先跑, 點知都係未消化哂囉)....最後快吓又慢吓都完成23K, 究竟我幾時先識跑"均速"架呢?!

11月之星飯

又到年尾, 同舊同學仔喺2016嘅最後一次生日飯...雖則唔齊人不過都係一樣咁大食囉...二百零蚊仲有碟幾靚仔嘅海鮮都唔錯吖, 個雞煲好夠味少辣都夠哂, 其他食物都唔錯架, 啲牛都幾淋, 重有其他嘢不過冇影咋(我哋唔會咁細食囉!!)

 



毅行者2016

"毅行者"相信好多人都聽過, 但係有幾多人真係會去玩呢? 坦白講身邊嘅朋友當然係冇人會諗過玩啦...我嘛...完成咗全馬之後其實有"幻想"過架(當然全馬同毅行係兩碼子嘅事啦)..."幻想"還"幻想"...我相信我嘅體能同意志力都未READY....

 

對我嚟"毅行者"都係好遙不可及，今年難得有跑友參與其中, 而我又可以成為support team－份子, 其實又緊張又興奮，起初乜Q都唔知唔知，SUPPORT要做D乜，整食物又唔知可以整啲乜....想幫都唔知點幫，又驚越幫越忙，好在最後都好清析咁知道自己岡位。不過最後有啲變數我由煮嘢食變買嘢食比大家，希望大家唔好介意。今次自問幫到大家嘅嘢真係唔係太多，我反而要多謝大家比個機會我去見識吓，抆車邊咁參與呢件盛事！

 

有幸同大家完成最後兩段路，見到大家嘅團隊精神，隊友同support team都好齊心，齊上齊落互相扶持...其實我之前一晚都冇瞓過 (我相信大部份support team嘅朋友都同我一樣好緊張咁睇住大家進度唔敢瞓), 朝早跟隊跑21K都已經好攰, 真心佩服所有參賽者嘅耐力同意志力。能夠見証你哋衝線嘅一刻確係我嘅榮幸，亦係－個好難忘嘅回憶。
圍徒16 、郵皇support team每個人都好堅！

超累...

年紀大真係機器壞....冇記性到連mark calendar都唔記得....大慨3星期前就結婚嘅同事問我12 NOV去唔去觀禮, 話哂一生人一次...可以嘅話我一定到...於是我應承咗同事去.....之後又有個跑友問我(12 NOV)有個跑步谷一週年去唔去PARTY...我見係夜晚於是又應承....拿, 本來兩單嘢一早一晚中間係有時間休息嘅....殊不知...頂!原來我9年前已經約咗啲舊同事喺呢日行山...真係妖哂....又唔知好彩定唔好彩, 呢幾個EVENT嘅時間都冇overlap...即係話我可以全部都去唔洗放飛機...不過朝7晚11中間仲攝埋時間去睇醫生...成日冇停過...加上呢個星期皮膚敏感冇覺好瞓...5晚只可以瞓到3晚....而呢3晚都係瞓吓醒吓...攰到頂點!

 

星期日諗住可以瞓晏啲...點知又同屋企人出咗出(之但係原來我出去係冇嘢做嘅, 終於我堅黑面囉....).....其實每個人都人死穴...我可以忍痛捱肚餓捱熱捱痛捱鬧捱辛苦捱身痕....不過我絕對捱唔到眼瞓....由其係一個不朽睡眠質素超差嘅人....難得瞓得好好哋但係無啦啦要爬起身係幾咁痛苦....好在下晝可以番屋企眠一眠咋...其實我好耐好耐冇瞓晏覺喇...除非病啦否則好少可瞓得著...今日瞓咗兩粒鐘好似死豬咁...可想而知我有幾攰....瞓醒又要出去BBQ....又係爭啲唔記得咗呢單嘢....出到去都覺戇居人又唔識多個咁....仲要邊燒邊想瞓囉...



風箏與風

今日又JOIN咗團跑, 由將軍澳運動場跑去大坳門郊野公園...本身個團跑係7:00點喺將軍澳運動場集合, 7:30出發...其實我已經晨早5:15起身架喇, 點知ME ME 模模攪到6:00先出門口, 又趕唔到第一班西鐵喇! 之後又喺油塘轉錯車, 去咗鰂魚涌遊車河攪到遲上加遲, 咁都未算....未瞓醒又路盲嘅我又唔知點解喺單車館嗰邊自轉咗一個圈都搵唔到個體育館, 好明顯我係未瞓醒盲仲仲啦, 個將軍澳運動場明明喺單車館隔離...但係我真係時運高睇唔到囉....望吓隻錶又夠哂鐘, 好灰!!..好在....無啦啦有團友經過見到我傻吓傻吓行錯路帶我行番正途....由於已經遲咗嘅關係我哋係咁狂奔去運動場, 嘭嘭聲換衫出發....

 

其實今日條路勁上鈄真係冇信心可以跑哂.....恐怕要邊行邊跑, 都係盡吓人屎罷啦....之但係又唔知點解跑吓跑吓又跑到(雖則係跑吓停吓...不過全條路都係跑真係冇乜幾何, 希望唔係虛火啦....終於去到大坳門郊野公園, 甩到其他人放風箏好似好好玩咁, 跑友仔見到有隻被棄置嘅風箏...噢, 原來隻風箏重飛得架....大家又拎嚟輪住玩, 印象中我都係一次放風箏咋.....呢度夠大風好好玩呀....有得玩又環保....WIN WIN啦! 放完風箏影完相又去買嘢食,冰菠蘿好味呀 (好明顯其實我唔係餓, 係為食囉), 食飽就回程, 有得食又有得玩....好滿足喔!

懶....勤力.....

呢期確係食得太多, 開始有需要減吓磅....老老豆豆...其實我近十年都冇一刻覺得自己需要減肥架....不朽我都係食完再算, 其實以前好多時都係食完就痾, 重要痾突! 唔知係咪呢期腸胃好咗吸收快咗....終於肥得起....之但係乜解救嗰兩磅咁難減架呢?! 嗯....好明顯年紀大啦!!

不過減還減都要減得健康, 當然都係要食少啲啦, 加埋運動就應該事半巧倍! 反正係時候認真練吓全馬，希望減肥之餘，全馬都可以有進步！！

飯局s.....

雖然大家見我成日同成班朋友仔一齊食餐好....之但係其實我最LIKE係三五知己靜靜哋吹水嘅飯局....呢個星期就同咗兩位唔同嘅朋友食咗二餐飯...吹吓水食吓好嘢一樂也!

呢餐其實係食潮洲嘢架....不過啲食物又幾特別出面好少食到, 應該係傳統潮洲食品好有特式又好好味!

到於呢餐係同跑友仔食嘅, 難得大家都喜歡食辣嘢一於去食餐飽...好好味呀....激得嚟又夠麻辣嘅香味....讚!

小王子的領悟

記得第一次接觸小王子呢本書已經係N年前嘅事, 當時去上海公幹放公嘅時候百無聊賴於是就同同事去書局睇書(原來當時我哋係僞文青嚟)....見到書架上放咗幾本"懶"係文學巨著啲friend有茶花女, 小王子.....反正都係十零蚊人民幣(而且書仔細細易收藏)就豪比佢買嚟睇吓! 當然重掃咗幾本張小嫻解吓悶啦...

實不相瞞當時睇完本小王子好多章節都真係一知半解(其實當時我已經連睇兩次呢本書, 不過硬係覺得有啲地方唔太明白作者想表達啲乜, 當然內容大意係明白嘅) ,雖然係咁又唔知點解好喜歡呢本書, 其實應該話好喜歡小王子呢個角色....當時我真係認真咁揾吓身邊嘅朋友有冇一個係小王子(又真係一個都冇囉, 甚至連小小相似嘅地方都唔覺有), 又嘗試將自己代入小王子嘅角色睇吓自己有冇啲同小王子相似嘅地方....

過咗幾年我又再睇一次小王子呢本書(其實之後隔一排我都會再拎本書出嚟睇), 咦!領悟又唔同咗似乎又了解小王子多咗, 怪不得啲人話呢書本由8歲到80歲都啱睇啦! 當然我都唔敢話百份百明哂呢本書....直至前排見到位跑友POST"小王子的領悟"呢本書....正!終於可以人可以幫我解讀一吓....

其實成本"小王子的領悟"最型嘅地方係分析埋嗰5千朵玫瑰嘅心情, 大慨我都係屬於呢5千朵嘅其中一朵....正正係呢幾年領悟到嘅嘢, 一個平凡嘅人不斷學習了解自己, 愛自己, 尋找自己嘅興趣....唔明我UP乜? 買本書嚟睇咪知囉, 包你有所得著!

HAHA...唔覺唔覺買咗3,4本唔同version嘅子王子譯本, 有啲係收藏版, 有啲係袖珍版可以拎出街睇...問你怕未....

好大隻蟹呀....

每年都會同屋企人食餐大閘蟹, 今年嘅大閘蟹宴繼續由我負責,今次試吓屋企附近嗰間"發記"試吓先....嗯..佢又真係有好多選擇喎, 我揀咗五襾半嘅大閘蟹....嘩!又確係好得, 公乸都一樣咁靚! 好好味!

除咗大閘蟹之外, 我重去oceanus買咗帶子刺身同蝦刺身....好鮮甜呀...其實重有牛柳粒架, 不過食唔哂留番下次再食! 加埋二家姐整嘅蛋白杏仁茶又飽到上心口喇.....

越華會

番啅越華會, 不過今次係同舊同事去食生日飯, 次次都飽到上心口....食物依然好味!! 其實呢餐飯hea足3粒鐘..明明啲餸嘭嘭聲嚟哂, 我哋又嘭嘭聲咁清哂, 喺度吹水賴死唔走, 好在冇人烹我哋走啫.....最後叫埋碟蛋散做甜品, 食埋就好完滿喇!

Tea buffet@百樂,

放假總係離不開食同食, 今日又同舊同事去咗食tea buffet, 百零蚊都算幾多嘢食喎!今日個主題係"紫薯"同"藜麥", 有紫薯沙律, 紫薯蛋糕,紫薯pancake, 紫薯雞蛋仔, 紫薯撻,甚至紫薯雞翼,重有藜麥沙律...除咗呢啲重有魚生, 冷盤, 熱薰,湯,粉麵同其他甜品, 埋單重有7折....160蚊有找, 抵!

再遊鹿頸....

其實呢日嘅團跑係圍住八仙嶺跑, 不過大家似乎將重點放咗喺鹿頸...HAHA...因為大家都好期待見到牙佬一面! 可惜原來牙佬今日去咗玩比賽根本冇可能嚟呢度囉!! 雖然見唔到牙佬, 不過我哋一樣跑得好開心, 喺互相鼓勵之吓有啲原本諗住半路"切碎"嘅跑友最後都堅持跑哂全程, 真係好叻叻呀! 希望呢位朋友嘅初馬順利完成!

蟹季開鑼。。。

 

又到一年一度食大閘蟹嘅季節喇....第一撃就同咗個朋友仔去酒樓食餐好嘅....好味!! 除咗食好嘢之外,同朋友仔吹吓水都係重點之一,有時一大棚人食飯反而冇乜機會傾吓心事吹吓水, 唔覺唔覺又吹咗成晚水, 正呀!

空中農莊

實不相瞞, 園藝呢家嘢我真係唔算太大興趣,因為老豆我先開始嘗試種吓爛花, 可惜我管理不善(其實佢哋喺我手上捱咗十幾年已經好叻), 由十幾盆死淨一盆拖鞋蘭咋(好後悔冇好好照顧佢哋,真係唔想睇住佢哋死清光呢......)

 

幸好家陣有大家姐接手, 佢對栽種好有心得又用心打理...希望盆拖鞋蘭可以長命啲！其實家姐除咗種蘭花之外重種埋蔬菜架，呢個農莊近屋企確係正！

肉餅哥

肉餅全部都係肉餅....難得同家姐佢哋開飯, 今次有新地方"肉餅哥"....其實前排都同啲舊同樹去過, 上次食過龍蝦想ENCORE架, 不過今次賣哂, 試咗個花彤肉餅又幾鬼足料喎! 唔錯,推介呀!

 

Yeah Sammi....

期實呢期忙於公事, 番工真係番到好攰, 連黃子華同Sammi嘅show都拋諸腦後, 完全冇留意....好在朋友仔有飛....仲要係靚位, 我去到先知咋....好開心好驚喜呢.....近啲又真係highper好多架...成晚不斷嗌住Sammi...連Sam哥我都嗌埋一份...HAHA...好低B證明我睇我好投入...張飛真係物有所值!

跑友飯局

星期四同星期五都分別同咗兩班唔同嘅跑友出嚟開飯, 雖然大家都係跑友不過性格各異, 星期五呢班友仔又真係好型....齋睇呢堆食物+烈酒, 真係睇唔出大家係跑步識架...唔知仲以為大家係劈酒識番嚟! HAHA

 

同成班酒仙食飯真係要好好定力架...雖則我唔算好喜歡飲酒, 但係三五知己邊食邊飲嘅感覺確係幾relax幾開心嘅, 不過呢幾日病咗重啪緊藥, 今次真係好乖一啖都冇飲呢!

 

邪惡炸豬大腸, 好味呀!

 

 碟雞都好好味, 仲有個泡飯都好香, 不過真係略咸...跑友仔買嘅蛋糕都好好味, 仲有我勁喜歡嘅cream brulee超滿足! 期間仲有跑友仔唱歌贈慶, 真係好鬼正囉!

伯爵茶系列

之前同啲排骨仔講過中秋焗啲伯爵茶蛋糕(其實排骨仔同ME姐都好LIKE伯爵茶味嘅蛋糕同曲奇)...YEAH....完成喇...希望大家喜歡啦....啲曲奇ＭＥ姐都有份幫手印模架，真係唔該哂！

又見面喇...

YEAH...雖然我笨唔算係忠實FAN屎, 不過我確係越嚟越LIKE你...靚仔又NICE....真係好鬼型...(SORRY啦, 我無視咗你身旁嘅吳家樂同雷頌德) HAHA!

其實我跑緊去鹿頸途中已經同跑友吹水話,"袁偉豪"等緊得架我要跑快啲....HAHA...點知真係見到....開心死我!!

又PK鳥....

好開心嘅團跑, 難得有九龍區嘅團跑, 好近公司,返屋企都幾近最係JOIN啦....呢班跑友雖然唔係成日見, 不過次次見面都笑餐死好好玩呢..

不過論盡嘅我又PK喇...其實見條路黑黑哋我已經收油架喇, 點知有個凹位都係企唔穩...好在有跑友見到扶我起身...次次PK最慘就係起身嗰嘢...唔起身都唔知自己有幾傷, 好彩只係皮外傷, 冇事就繼續跑! OH...原來流血, 其實傷口好細架咋...可能跑嗰陣血液循環比較快啲血好似流得好勁咁真係嚇死街坊, 又好在跑友有膠布, 貼咗都唔覺痛喇!

跑完又去食餐勁嘅, 又去邪惡嘅品香樓, 好好味呀, 超飽!

9月之星飯@上品私房菜

又到9月喇.....又係食九月之星飯嘅時間喇....今次去咗食私房菜...有我至愛嘅杏汁豬肺湯....好味喎真係....其他嘢都OK呀.....11月再食過!

新界...九龍...香港

有時我都會問自己....."點解我鍾意跑步?" 嗯...我喜歡跑街嘅自由自在, 一個人跑嘅時候可以放空一吓思緒, 一班人跑嘅時候有傾有講又有得笑, 又可以周圍跑去欣賞美景, 今日我就一次過跑咗新界...九龍...香港 (去香港當然要搭船啦)...好有趣嘅一條路線由沙田經尖沙咀再搭船去中環再繼續跑去香港仔, 全程29K, 不過我喺大圍出發總共27K左右.....幸好今日太陽伯伯收歛咗啫,終於FEEL到一點秋意喇!

 

 

EL Dining

Blog友之中同呢位朋友最投契, 未識佢之前覺得佢個款好嚴肅,以為佢係惡搣匙, 之但係識咗佢之後先知原來都係傻瓜一族...大慨"朋友"呢家嘢都係物以類聚, 一個傻瓜自然有一堆傻瓜朋友! 好感恩身邊大部份朋友都冇乜機心, 有啲仲係"天真爛漫"添!

 

又唔知點解同某啲朋友仔一齊食HEA玩嘅時侯總會係笑料百出架...(其中一個係舊同樹C奶仔, 另一位代表就係呢位搣匙喇)...唔知點解大家喺埋哋一齊嘅時侯總會係有咁低能得咁低能!!連食餐飯都可以低能過人嘅!

 

話時話唔覺唔覺都識咗呢班BLOG友仔7,8年喇....老土啲都要講句, 希望大家友誼永固呀!

屍殺列車

呢套戲近期好HIT吓, 確係好睇!由其我係喺亳無心理準備下去睇真係好有驚喜, 除咗恐怖片應有嘅激烈緊張之外, 仲有其他嘢架....至於係乜?!入戲院睇啦...值得一看!

 

不過睇完真係堅攰囉, 太緊張刺激仲睇到眼濕濕, 要飬足精神去睇呀!

Beer Run

攞你命3千beer run....其實我酒量不朽麻麻, 呢晚要飲４大杯啤酒兼要跑４Ｘ400米(每次跑400米前要隊－大杯生啤🙊🙊🙊, 對我嚟講其實有啲難度)，因為要好快咁飲! 我同跑友仔都不散鬆懈, 齊齊去隊碗粉都去跑, 點知我跑完第３round已經個肚漲哂－肚氣, 準備飲第4杯之前已經要獲利口吐，好彩跑友幫我頂咗第４杯咋，原來邊跑邊飲真係好甘真係太多氣，我估就算叫我飲汽水結果都一樣囉....不過其實呢個遊戲真係好好玩, 少少酒精確係可以令大家鬆弛一吓！

當然啦BEER RUN呢類遊戲其實都好多大爭議性, 好多人都覺得好危險, 九唔搭8....跑步就跑步啦唔洗搵命博....好多好多不同嘅聲音...嗯...其實參加乜比賽都好...都係要量力而為囉...雖然我都跑都嘔哂...不過又真係唔係想像都咁"危險", 至少我又真係冇乜見過有人飲大咗,更加冇人醉酒鬧事, 其實連嘔都冇見過(我諗我真係太渣先嘔HAHA)...相信大部份人嚟玩都係抱住FOR RUN心態又點會搵命博呢?! 4個400米...就算平日冇跑開步相信都唔難完成(行400米都係數分鐘攪掂)....其實難度都於快速地飲4大啤酒, 大慨呢個比賽應該列入勁飲大賽而唔係跑步比賽囉!

Sports Expo

其實上兩個月已經登記咗8月13去Sports Expo, 登記咗可以免費入場, 點知原來撞咗Food Expo...OH....其實前兩年都有同啲舊同事去Food Expo架, 今年都好想再去....不過又未去過Sport Expo,加上成堆跑友仔都係13號去...咁....今年去Sport Expo啦...(其實去邊我都冇諗住買嘢, 純粹到此一遊架咋).....

 

最後只係喺Sports Expo買咗個福袋咋..是日重點依然係食食食....行完齊齊去九龍城同心食泰國嘢, 好味呀...食飽仲去埋合成食糖水...HAHA...個個見到合成個餐牌都R哂頭, 成堆字又冇圖....揀咗好耐都揀到碗糖水, 真係笑死咗!

 

雖然星期六去唔到美食展...不過....最後.....星期日都同咗屋企人一齊行咗個美食展.......不過行完兩日對腳跛咁滯囉.....

Crazy Run

夏天流流跑34K已經好癲(由小西灣去堅尼地城), 仲要玩咗6粒幾鐘先完成真係癲上加癲......不過癲癲哋挑戰吓自己都幾好玩吖!!

EAT & RUN

食跑食跑食.....無限loop....其實好多時食多過跑, 有時我都食吓沙律平衡吓架....好似呢個星期咁, 明知星期日食lunch buffet, 星期六咪跑定先囉, 跟住星期日食飽再去跑一陣....起碼自我感覺良好少咗好多罪惡感!一於keep住跑keep住食....yeah!

石壁之旅...

又寫番啲隔夜卜先....上星期日玩咗個由東涌去石駐監獄嘅團跑, 嘩...嗰日堅哂...係咁飲水再係咁買嘢飲連雪條都食埋(其實食嗰陣有啲驚食完肚仔痛架, 好在冇事啫!)

其實沿途風景好靚架, 加上嗰日個天好清影啲相都靚啲呀! 好唔容易先完成整個行程, 不過經過幾次烈陽之旅之後真係train到冇之前都怕曬, 耐熱咗好多呢! 睇嚟呢期唔只變賓賓, 應該變埋非洲人先得喇!

同事生日飯@妹記

兩日都係叫餸食飯, 不過各有特式, 其實第一次食妹記已經食幾年前, 唔知係咪第一次去嗰陣太少人, 叫幾碟餸已經食到飽飽滯滯所以印象麻麻, 之但係自從幾個月前同成班跑友去食爭吓爭吓咁又好似特別好味喎, 今次我哋又一行12人去食, 都KEEP住覺得好味, 嗯...叫餸食飯呢啲嘢真係人多好辦事, 可以叫多幾款又唔怕食唔哂所以特別好味架....

 星期五開飯嘅好處當然係可以玩夜啲啦, 食飽飯再去飲嘢重邊飲邊吹水....巧開心呢!

7月生日飯@越華會

同舊同學們嘅7月之星飯...又唔知點解次次同同事, 卜友嘅生日飯硬係嘢嘢都迫埋同一個星期食, 今次都唔例外星期四先嚟一餐....同舊同學s去咗越華會食飯, 第一次嚟食印象又唔錯喎, 價錢相宜食物質素又唔錯, 最正係比埋間房我哋可以靜靜哋食餐飯!

Happy Weekend...

放假都係離不開食HEA跑, 又唔一定要去靚餐廳食好嘢嘅, 盡情掃街一樣好開心架....YEAH....全部都係我至愛.....

除咗食HEA跑重可以骨骨佢...好耐冇推油喇....堅正呀!

青蛙肚

其實呢個假期日日都行山架....星期日又嚟團跑, 今次去跑青蛙肚(即係由香港仔去山頂)...前半段上未到山頂不過都已經好多針路, 我已經用咗9牛2虎之力上鈄, 好唔容易先跑哂啲針路...之後又要上山頂, 呢段路實在太斜喇, 見到都卻步, 最後都係用番郊遊MODE上山, 唔知幾時先可以有心有力跑上山呢?!

獅子山下

7.1 long weekend緊係搵嘢玩吓啦, 跑友提意上山睇日落...又好喎, 其實行山真係OK架...真係行唔好跑,唔好太難行,又唔好烈日當空行就得架喇(乜咁港女架又話OK又咁多要求)...

 

跑友仔提議行獅子山, 未去過緊係舉腳讚成啦, 由於天氣太熱我哋選擇咗5點先起程, 上到山應該可以賜睇到日落, 嘩! 上到山頂個景巧靚呀, 可惜個日落唔夠靚啦! 不過個天算清都已經好好喇! 跑友仔重拎埋相機嚟影相, 我哋緊係唔好執輸影多幾張靚相啦.....

 

真係玩到參唔多天黑先落山, 我哋再兜埋畢架山先收工....行完真係大滿足喇!