青衣公園掠影

今日病病哋...都唔想周圍去....不過天氣咁好屈喺屋企又好似嘥咗少少...一於落街行吓公園賞吓好葉....

自從前掛好偶然咁喺網上見到啲籠友喺青衣公園影秋葉嘅相之後, 好期待可以快啲睇到秋葉...話時話住咗呢度大大話話都幾年...都冇好好欣賞過秋葉....今年真係唔可以錯過喇!! 其實兩個月前已經耐唔耐行吓呢個公園睇吓有冇秋葉架喇....呢排終於有喇....可能遲少少重靚啲!!今次完全冇準備祗係用電話影咋,下次要拎相機影再影過!! 

lunch@國金軒 + 長洲半DAY遊

星期六約咗幾位朋友仔一齊去長洲探朋友....出發前去國金軒嘆茶....呢度啲點心款式唔算多...我哋似乎都叫得七七八八喇....有啲太貴真係叫唔落手呢!! 食物確係好精緻...不過食落有啲食物嘅味道都係一般啫...叫做試過啦!!

 

食飽等齊人就閃去碼頭搭船去長洲喇....到咗長洲就跟沿居民遊一遊長洲先!!遊完就開始BB蕉喇....嘩!呢個星期六真係堅凍...好在可以去"士多"避避風啫唔係肯定病上加病!!

聖誕蛋糕

呢期真係好勤力..我指喺"整餅"方面...整吓整吓又買多咗啲材料...又要努力整多啲餅唔好嘥嘢..haha...果然係惡性循環...越整越買...越買越多!!既然大家都唔怕中毒我亦都唔介意"獻醜"...呢次真係唔係謙虛...真係名符其實嘅"醜"..haha!!

呢次想試吓整古古力蛋糕中間夾啲古古力cream再整色整水整個古古力鏡面....前兩樣嘢(古古力蛋糕同古古力cream)都重可以應付到, 之但係...一整個古古力漿做鏡面嗰陣...真係出哂事喇....第一次整真係唔識啲漿要乜嘢溫度先可以淋上去...我諗要啲漿攤一攤先淋上面掛!!我又攤得唔夠耐...攪到啲漿一地都係...唉....接都接唔切....超級呢hea....激死!! 

好辛苦先攪到面嗰啲古古力平滑啲咋...不過側邊啲漿就....一忽忽喇....最後唧啲cream遮遮掩掩再加埋個聖誕老人公仔應該好啲喇掛!! (haha...咁啱前一日二家姐買咗個蛋糕有呢個聖誕老人...用得唔好嘥嘛又唔食得無胃特登買一個啦!...)...都好在...個蛋糕雖則唔夠靚仔...不過味道真係ok架....啲同事都好喜歡! 實在太好喇....希望下次整得再靚仔啲啦!!

蜂蜜小蛋糕

呢期慣咗逢親weekend都整吓餅...呢個星期就整咗蜂蜜小蛋糕, 呢個蛋糕嘅材料真係超簡單呢...麵粉,雞蛋,蜜糖同沙糖已經攪掂...連油都冇滴! 清清哋唔錯唔錯!!

和藏

上星期約咗啲中學同學食飯...嘩...對上一次約食飯已經係幾年前...真係好耐好耐冇見呢!!同學仔介紹嚟呢度...其實真係有啲僻...不過對我嚟講都算近近哋喇...

講番呢個SET...其實都幾豐富架...有刺身有海鮮拼盤重有打邊爐,食物質素都唔錯架...不過兩個鐘真係唔夠食呀...有啲趕頭趕命!! 食吓講吓兩粒鐘好快過...希望下次見呢班朋友仔唔駛等幾年啦...

聖誕趴地....

一如以往今年公司嘅X'mas party都係叫到會...都係嗰啲嘢啦....殊不知無啦啦有人問我會唔會幫手整啲甜品番嚟吃....實不相瞞...其實我真係諗住靜龜龜鬼鬼鼠鼠整幾塊餅仔請啲同樹食嘅...見佢咁問我就二話不說答"好!"啦....

嗯...即係咁...雖則本身係靜龜龜鬼鬼鼠鼠整幾塊餅仔嘅...之但係...家陣揚咗出嚟...恐怕幾塊餅仔會唔夠呢....有期望同冇期望有好大分別嘛! 為咗唔想啲同樹失望...唯有好似毛記slowgan咁要"全力以赴做到最好"啦!!

諗嚟諗去...整CUPCAKE應該比較好...可以整唔同味比人選擇嘛! 最後整咗二款, 一款BROWNIE蛋糕...另一款係伯爵茶蛋糕!

好緊張呀...第一次整CUPCAKE TOPPING...希望唔好太差啦...最後整咗4隻味...有綠茶, 咖啡,士多啤梨同檸檬! 話咗整餅仔架嘛...就整最隱陣嘅曲奇啦...包冇衰!

 

啲同事見到啲CUPCAKE都好開心好驚喜...不枉我攪一大輪呢!! YEAH!

我是個茶壺....

呢期嘅工聯會班又完哂喇...其實今次除咗上油畫班之外重上咗個手捏茶壺班...都係搓泥嘅一種啦...不過今次就係搓陶泥...搓好再拎去燒同上色...最後再燒多次先至完成....

呢個COURSE會教整兩個茶壺...一個就係彷樹皮紋嘅茶壺....其實整得麻麻呢...上咗色就好樣少少囉....

第二個就係呢隻"羊估"茶壺喇...特登整隻"羊估"襯番自己....重有我至愛嘅紫色....其實茶壺身嘅紫色好特別架...前後上咗紅色,藍色同白色先做到呢個效果...呢個色水我都非常喜歡呀!

左麟右李

原來＂左麟右李＂已經有十年歷史，之但係我今次都係第一次睇咋！！今次同二家姐佢哋一齊睇。。。可惜呢個位睇唔到電視呢。。。真係全程齋聽歌！！都好在。。。大部份時間都係唱舊歌。。。好聽呀！！嗯。。。個人認為。。都係校長啲歌比較襟聽同好聽！！正！！

香蕉合桃蛋糕

又係每週一ＣＡＫＥ嘅時間。。。今次整咗蕉蕉muffin。。。由於時間關係叫咗大家姐留兩條蕉嚟。。。等佢熟咗就可以整muffin喇。。。。次次跟足食譜落泡打粉啲蛋糕次次都發到豬頭咁好鬼誇張！攪到啲muffin好似怪獸咁大舊。。。而且啲泡打粉重好似冇乜益添！！今次一於落少啲。。。落咗三分一咋都發得好勁。。。其實整清蛋糕同muffin有乜分別呢。。。整清蛋糕明明唔駛落泡打粉架喇。。。何解啲書話muffin一定落呢？！下次試吓唔落睇吓佢有乜分別先！！

１１月喇星飯＠亞南鷄煲

今年嘅喇星飯已經到咗尾聲喇。。。冬天嘛。。。又係打邊爐嘅時侯，今次攪攪新意思。。。整個雞煲吃吓先。。。少少辣多多趣。。。由於大部份朋友仔都唔好辣，叫咗一煲唔辣同一煲少辣。。。都係有啲辣好味啲呢！！

食完雞就可以打邊爐喇。。。叫咗好多乜餃物餃，乜丸物丸，重有乜牛物牛，當然唔少得炸魚皮同菜。。。連公仔麵都有。。。叫咗超多嘢真係超飽！！

油畫功課~完成了....

12堂油畫又參唔多完...呢幅"生命中不能承受的橙"唔覺唔覺畫咗7堂..HAHA...幾粒燈畫足7堂...真係威...鬼叫我資質平庸咩....畫極都唔好....其實完成品都係好一般咋....之前未學過畫畫，根基唔夠啦....連就咁勾幅圖出嚟都雞手鴨腳, 連啲陰影應該點畫都唔係好清楚...早知學咗素描先啦....之前重諗住學完油畫再學素描添，原來次序倒轉咗！！

 睇番啲相先睇得出有乜改變。。。。

 完成品就係貢架喇。。。重有一堂。。。繼續另一幅生命中不能承受的＂蘋果＂，努力！（其實一堂又點可能晝得哂吖，要喺屋企繼續畫，希望唔好爛尾啦！！）

Handicraft Fair @JCCAC

星期六本來諗住嚟呢度架嘛...無點一個CALL攪到5點幾先出門口...人哋8點收檔喇.....真係超趕! 其實創意藝術中心大慨隔3個月就有一次手作市雜...不過我都有大半年冇嚟喇...所以今次好想嚟呀....行吓行吓見到幾十蚊就有得學整CREAM或者 潤唇膏...兩樣都想玩喎...就JOIN哂兩

個COURSE啦....玩完都8點幾喇...連地下嗰層都未行....下次要早啲到先得!

寓“等待”於娛樂....

好無奈今個星期六啱啱輪到得standby...之前都有預感今個月應該舔嘢...果然係咁...唉!終於由朝早9:30喺屋企開工....最無奈嘅係...我要做嘅嘢係齋等....等等同等....真係悶到抽筋...又要等人幫手...不過啲人好似騙徒一樣答咗幾句之後就冇咗影蹤! 又好難迫得太緊...唯有喺等待嘅期間整餅自餘啦....簡簡單單合桃蛋糕! 整完都係冇消息...追完再等一輪先有人理我咋...已經係下晝5點幾....同平時番工冇分別呢...無奈!!

UNICEF慈善跑

又係一年一度UNICEF慈善跑...今年都JOIN咗大家姐一齊玩親子組3K....晨早7點出發去迪迪尼...跑完都係9點幾....原來早起真係多好多時間用...不過太多喇....又唔想瞓覺...今日真係漫嘅一天囉!!話時話..好在天公造美...跑嗰陣非常好天氣....傍晚就落狗屎...好彩番得切屋企...唔係實變落湯雞!!

咖啡拉花班@MC CAFE

公司攪咗個拉花班, 由於費用祗需3草嘢...個個仆到去報啦...又比我報到...HAHA! 其實個拉花班係喺麥當勞嘅TRAINING CENTER上嘅...有啲麥當當員工教拉花....真係話易唔易架....老師示範完就到我哋輪住試喇....右面中間個太陽就係我拉架喇....當然冇老師個SAMPLE咁靚啦...拉完花又可以飲咖啡...其實平時我唔飲咖啡架....上呢一堂拉花飲嘅咖啡重多過呢幾十年飲咖啡嘅數量!連最後送比我哋食嘅嗰杯雪糕都有咖啡(不過呢個又真係幾好味)!!唔知個咖啡雪糕係咪真係會推出市面呢?

花鵰醉雞翼

上星期同咗啲卜友仔去北京樓開飯....卜友仔叫咗碟醉雞....其實呢味係我飛佛之一嚟架...食食吓青蛙就話佢有個食譜簡單又易整....我哋緊係拿拿淋問佢啦...又真係好鬼簡單咁....啲朋友仔都相繼整咗嚟試...口碑不俗咁...今日終於有時間整喇....YEAH...真係唔錯喎!!大愛!!

牛油蛋糕

 呢期整餅整上癮...個個星期都整啲嘢...唔整唔安樂咁..HAHA...好彩我有個強大嘅後台...佢哋就係家姐同姨甥喇....有時就算整得麻麻地佢哋都照單全收...真係辛苦哂呀!!!冇佢哋幫手試味同鼓勵嘅一定冇咁大動力去整!!

今次嘅新嘗試係牛油蛋糕! 我發現原來我對整啲手作仔同蛋糕都比較貪心...成日想整啲唔同款式嘅嘢....除非整到超失敗啦...唔係嘅話真係要隔一排先再整第二次...因為太多嘢未試過整...想試咗新嘗試先!!

其實呢個蛋糕算好易整...不過其間太論盡將啲牛油揩到周圍都係..最後要抺餐死!! 唉...至怕係收拾呢啲殘局架喇!!

Chocolate Concorde

公司又攪蛋糕班, 80蚊位就可以去二德惠學整餅...確係抵!! 今次係整Chocolate Concorde, 係老師嘅"催促"之下...兩粒鍾都唔駛就攪掂喇....好快已經攪好蛋漿拎去焗喇....由於時間關係外面層餅乾條就由老師整定...層餅乾要用50度焗一粒鐘...不過家用焗爐最少要開一百度...所以喺屋企應該整唔到喇! 我哋就將啲焗好嘅餅乾條搣成細細粒待用....

  

蛋糕話咁快焗好...將佢CUT開3份....嘩..第一次CUT3層...真係驚CUT爛哂....CUT開再抆CREAM....由於外層再會加餅乾...好頭皮咁抆咗外層就算喇...

.

黐番啲餅乾粒喺外圍再加啲古古力粒...最後再加粒士多啤梨...其實個蛋糕整成點都唔緊要啦...乜鬼都遮哂.....真係個個蛋糕都呃得吓人!!

 

由頭到腳都係古古力...好味!!

10月喇星飯....

一個星期食兩餐十月喇星飯,一餐同卜友仔去新世紀嘅北京樓, 5條友食唔到片皮鴨...不過其他嘢都好味....之但係侍應生嘅服務態度認真麻麻....

隔兩日又食第二餐....去咗上環嘅陶源食大閘蟹餐....今次係同同樹去....其實呢個係團購餐嚟架....不過除咗兩隻蟹唔錯之外....其他食物都係把鬼...而且份量好少....絕對唔夠飽...唯有再加其他嘢啦....最後加咗碟臘味糯米飯, 生炒骨同上湯豆苗...呢三樣重好味過個SET....

大包整多兩籠唔怕滯....

自從個焗爐搬咗位之後, 焗嘢真係超方便...所以呢期喜歡鑽研吓焗蛋糕曲奇...嗯...再攪攪新意思...試吓整麵包先!! 其實一向幾抗拒整麵包...一來花時間(等佢發酵起碼粒幾兩粒鐘)...二來亞祖真係冇乜力水搓包呢...試過同同樹去學搓包..次次搓到一半已經手仔軟....所以HEA到今時今日先試整....呢個重要係超簡單免搓版!! HAHA...真係超懶...就咁幾啲材料MIX埋一齊....擺喺雪櫃等佢發酵...臨焗之前再"係咁倚"搓佢兩搓就可以拎去焗....

發酵咗成晚果然好鬆吓...不過唔夠咸味...見呢期書局有DISCOUNT....買咗本麵包烘焙書睇...有時間可以再整嚟試吓!

石板燒....

前兩日同搣匙撐枱腳..又真係好耐冇同佢撐枱腳喇......佢之前買咗團購...又可以試吓新嘢...呢度咁多嘢..位位都係九十幾蚊...唔錯唔錯!! 

油畫功課(一)

試咗幾堂調色...終於可以開始畫畫喇....第一份功課係要畫3粒"生命中不能承受的橙"!!原來對我呢啲初學者嚟講學調真係好重要呢...起碼畫嘅時候唔係淨係得一種顏色....有啲同學仔好犀利...自由發揮都已經畫得好靚! 揀直係快靚正!! 我呢幅嘛.....祗係半製成品....再努力啲畫好啲先!!

心連心步行籌款

今日又係一年一度嘅心連心步行籌款喇...其實上年都有參加架...咁快又一年喇....今次都係再MEME一家一齊行...

記得上年同MEME行佢真係行得慢吞吞架…重一路行要一路拎嘢食引佢先肯行…今年…HAHA...其實都係一路行要一路食零食….不過真係行得快多好多呀!! 叻叻呀!

 

再接再厲~終於成功烏....

星期六又晨早醒咗...本應都十五十六想再戰蛋撻架喇....見咁早就整多轉先!! 上次應該係焗時間太耐...睇嚟啲太繁複嘅焗法都唔太啱自己...唯有再溫書睇吓點焗好啲啦....最後搵到兩個比較可信又方便嘅焗法...兩個方法都試咗, 最後都算成功喇...

一如所料....蛋撻本身唔難整...係焗嗰嘢有啲難攪...焗得太勁啲蛋又會太漲甚至爆開....蛋太漲嘅話焗完之後啲蛋會勁凹...第一個方法就係咁..攪到唔靚仔...之後再試焗15分鐘之後將火力教到0再用爐嘅餘溫焗多5分鐘就攪掂喇...

不過我個焗爐嘅爐溫實在太唔平均喇...一啲就爆蛋..一啲就冇離反應...下次再焗再中途轉一轉焗盤睇吓會唔會好啲...

由於有隻撻爆咗蛋...得4隻靚仔啲...不過呢隔咗一晚後啲皮淋哂...再番熱都冇咁好食喇...睇嚟要再搵吓有冇啲食譜可以整到個揵皮冇咁易淋先得喇!

南瓜蜜桃萬聖節蛋糕

呢期愛上整cake, 因為將屋企個焗爐搬咗位家陣焗嘢超方便唔駛將個焗爐搬嚟搬去...不過自己喺屋企整都祗係會整清蛋糕曲奇之類...太繁複嘅都係太花巧嘅都係出去整開會心啲!! (除咗因為我技術有限之外....主要係....因為唔想洗咁多嘢嘛!!)

呢個係工聯會course嚟架...一排冇整成個蛋糕喇.....其實mousse cake真係唔係我杯茶....不過報名嗰陣佢淨係話"萬聖節蛋糕"...我又真係好無聊地想八吓萬聖節蛋糕即係乜東東..HAHA...確係幾低B! 當然...我相信乜cake都好..一定有人幫我包底啃哂佢唔會嘥嘢嘅!!

其實乜蛋糕都係網名嚟...都係一舊清蛋糕再加mousse...學整蛋糕我始終都係buy工聯會多啲...起碼真材實料...實而不華...家陣好多團購都祗係教整色整水...忽略基本功!!

今次老師重教埋我哋整古古力鬼仔同搓糖皮....

攪咗參唔多3粒鐘...終於完成喇.....

見鬼仔有多...撻多隻先...haha!

蛋撻....超失敗篇!!

見近排焗蛋糕嘅手風幾順....諗住搵啲難度高少少嘅嘢焗吓啦...拿!! 未得即係未得....幾粒蛋撻已經考起我喇....成日都唔知幾時先熟....好似焗整都唔對路咁....最後焗到OVER哂....寧願OVER都唔想唔熟食痾人嘛!

一如所料...整個撻皮同蛋漿好簡單....不過焗嗰嘢真係好呢HEA...個焗溫又唔平均...啲撻皮又不厚薄不一...整到有啲熟又有啲唔熟....最後唯有穩陣啲焗多幾焗攪到佢一鑊熟!! 唉!超樣衰...好在個食譜靠得住味道ok啫! 整得咁樣衰..斷估下次可以有進步掛!

黏土功課之菜檔(六) ~ 完成篇!!

終於完成喇...好耐冇整咁大檀嘢真係有啲緊張呀!!唔覺唔覺斷斷續續咁整咗幾個月喇...完成咗真係好開心...以我搓泥嘅速度睇嚟真係要耐唔耐skip一次course先可以清哂啲爛尾功課呀...下個target係插埋盆劍蘭同菊花!!!

講番今日呢檀先...今次真係好勤力架....全部功課都做哂....有多冇少!! 總共整咗31款瓜菜....對我嚟講已經係有史以來最大檀嘢...(不過...對好多人嚟講只係濕濕碎haha!)

又比你哋估吓先...呢條青bb嘅係....青瓜!

三朵花金...係三朵椰菜花先真!

好多毛呀...周身都係毛嘅節瓜....

 呢幾隻係薯仔....

 幾棵蔥...係紅色嗰隻....

小白菜跌到一地都係添....

 真係4朵....西蘭花...

呢幾棵韮菜花整就唔難...黐嗰幾條膠紙就真係有啲煩!!

金菇上唔上色都係咁....冇分別嘅....

鮮冬菰...上咗色醒神哂!!

幾條露筍....

 蒜頭....

兩個萬聖節 ...係兩個南瓜先啱...

濕米兩碌...成日都想整多碌....得兩碌好似少咗啲...等有時間再整過!

原來蓮藕同聖瓜係咁friend架...一齊住.....

芽菜仔...啲黃色豆都有油過架...又係粒粒旨辛苦!

 辣椒一堆....

蘑菇都係同金菇一樣...上唔上色都冇乜分別.....

 又嚟飽死荷蘭豆....話時話...點解荷蘭豆要飽死架呢? 飽死聰明豆又得唔得呢?

唔知大家重記唔記得未上色嘅蕃茄呢...佢同一眾女生都人都一樣...要化個妝先比人認得!

上咗色嘅通菜都靚仔咗少少架....

蘿拔仔一號.....

蘿拔仔二號.....

 

洋蔥...查實見親佢都係生歐歐咁擺喺啲沙律度...生洋蔥真係唔識欣賞...真係冇乜食過!

仍然都唔係幾似嘅唐生菜....

 繼續紅卜卜嘅紅菜頭....

 繼續都係似手榴彈嘅苦瓜.....

又係我至愛嘅紫色....紫色茄子....

呢個重colorful....四色青椒.....

爭啲漏咗....吊咗喺度9年嘅黃牙白...見到佢就諗起kimchi...

禮成...影張合照先啦....

 close up...一二三...笑....

 

再近啲先......

呢個菜檔真係幾好玩....啲菜我唔捨得黐實佢呀, (啲老師好喜歡叫人黐實啲瓜菜喺啲籃攪到佢唔郁得, 可能啲老師慣咗拎啲嘢去展覽唔黐實好危險掛!)...不過我就比較鐘意隨手逐粒拎嚟睇喇...反正屋企都唔會有其他人攪架啦...唔黐實都冇所謂....嘿嘿!