九月廿八日.....

今日公司SPONSOR一眾同事去海洋公園, 我當然唔執輸約埋啲同事去玩啦....先嚟去咗Hello Kitty Secret Garden食LUNCH...之後再出發去海洋公園....

 

由於天氣太熱...我哋不斷咁搵啲乜館物館HEA....

 

又由於啲同事對鬼屋不感興趣...最後只係去咗多啦A夢鬼屋影影相....

其實呢篇嘢真係冇心機寫呢,我一邊玩一邊上網睇新聞, 好心痛!!真係連玩都冇哂心機...我承認我不嬲對政治都係超冷感同白痴,不過呢次真係忍無可忍呢! 坦白講,我今日真係覺得好慚愧,當大家留守喺金鍾同中環嘅時候我竟然掛住玩....完全唔明白點解啲警察要咁狠! 警察們,你有試過糊椒噴霧同催淚彈嗎?見到市民痛苦嘅表情你哋重繼續施放糊椒噴霧同催淚彈,加上其他暴力行為真係好冷血!可恥!! 無論最後結果如何, 呢幾日一眾參與和平集會嘅學生同市民已經係我心目中嘅英雄, 以你們為榮, 加油!!為你們祈禱!(不過,大家要好好保重呢!安全要緊哦!!)

班蘭小蛋糕

星期六又係STANDBY SUPPORT嘅日子...又係悶屎嘅日子....明知悶爆就搵定啲嘢做啦....今次想試吓挑戰"班蘭小蛋糕", 星期五晚咁啱去灣仔食飯,順便可以去灣仔街市買定啲班蘭葉(嘩!6蚊有8塊葉真係算好平呢!!我上網CHECK...見過有人買6蚊一塊葉,下次再買要搵番呢檔!!)

YEAH....整好喇....都唔錯呀...其實除咗要用攪拌機打爛啲班蘭葉整班蘭汁之外, 其他步驟同平時整蛋糕一樣呢! 不過有一樣嘢唔同...平時焗蛋糕要焗到參唔多得先有香味, 今次呢...啲蛋糕一擺入焗爐已經滲出班蘭香味....好香呢!

8月之星生日飯(同事篇)

好快又到星期五,同咗啲同事去灣仔金兜記食飯, 由於太多人...次次都要食中式咁滯..HAHA...不過...我又幾LIKE喎...今次真係唔錯唸...份量好夠...味道又好!讚!! 最後亞姐重送咗雪梨雪耳糖水比我哋潤潤佢...超爽!

9月之星飯(朋友篇)

唔知點解有好幾次都係咁, 唔同朋友仔嘅生日飯都撞哂喺同一個星期食,聽到都飽..HAHA...今次又係咁...星期一同咗啲朋友仔食9月之星飯....

去咗The Captain's House, 之前睇相見過其他人食...好似唔錯...不過....試完又真係唔算太特別.........

之後再去甜品工房食甜品...失望AGAIN...乜鬼都冇!!

貴賓到訪....

上兩個星期有位朋友仔話我整咗咁多次伯爵茶蛋糕都未食過好想試一吓新鮮出焗嘅蛋糕仔...咁當然係冇問題啦...一於嚟我屋企食喇....横掂都係一於吹雞叫多啲人(其實加加埋埋都係3位貴賓啫...)

最後...本來由一個伯爵茶蛋糕蛋糕仔...之後再加一個部隊鍋,再有朋友仔想食Scone同雪葩, 我又怕朋友仔唔夠食再加啲曲奇同檸檬雞翼, 就係咁....飽到亞媽都唔認得!! 不過又真係食得好開心呢.....吹吓水睇吓電視咁都幾梳乎呢...HEHE!

九月之星生日飯(卜友篇)

又到卜友仔生日飯喇....難得約啲卜友仔出嚟....大家都好忙呢, 超難約.....幾乎每次都要對住個絕望的時間表嚟約食飯...好在最後都約到.....可惜重爭一位呢....希望佢快啲可以JOIN番我哋啦啦!! 

至於今次呢....去咗新斗記開飯....大鄉里未嚟過添....食物都唔錯呀.....不過啲油煙都勁咗啲...枱枱都叫"啫啫通菜"..真係油煙四起.....焗到飛起呢......唔知係咪間間都係咁架呢?!

5日感恩之旅...

自從個ICE BUCKET CHALLENGE興起後...宗教界又無啦啦興起一陣THANKSGIVING CHALLENGE, 無啦啦比人TAG咗....真係玩又唔係...唔玩又唔係....既然比人TAG咗....都試試啦!!

九月八日....DAY1: 
1. 查實唔知幾時開始"做節"呢家嘢對我嚟講已經唔係必然架喇...今日LUNCH好感恩...因為"施A豬"同樹們冇掉低我....可以一齊同你哋食LUNCH好有做節FEEL呢! 咁多位中秋節快樂呀!!....(老土啲都想講一句...真係好鬼多謝你哋...你哋對我真係好鬼好呢!!感激+ 感恩)

2. 今日工作非常順利, 輕輕鬆鬆就過咗, 今日重可以早放, 4點多啲就閃….正都爆…..(HAHA…希望呢個感恩日日都上榜)!!

3. 感恩第一次睇舞火龍,可以見識一吓傳統習俗又可以湊吓熱鬧, 開心呢!!

九月九日....DAY2:
1. 同啲家姐們食咗一個豐富午餐,賀一賀MEME6歲生日...

2. 攝到90分鐘時間出嚟跑步....

3. 非常感恩, 中秋晚上同追月假期嘅天氣不錯....抬頭就可以望到月亮姐姐....唔駛喺啲雲罅度搵月亮, 唔駛睇濕水火龍!

九月十日....DAY3:

1. 一個路癡今晚竟然唔洗點揾路又冇行差踏錯就去到目的地……(簡直係奇蹟)

2. 可以同朋友仔一齊食美味嘅鷄煲。

3. 今晚亞sir請食飯，多謝老細！

九月十一日....DAY4:

1. 連續幾日都唔夠瞓，今日特登請半日假休息，瞓飽再食個靚lunch先番工，可以身心滿足地上班去！

2. 同事嘅一句說話令我反思……提醒我工作上應有嘅原則同責任，慶幸自己做咗咁多年仍然可以保留到對工作嘅一丁點熱誠。(雖然真係越嚟越少！)

3. 今日又可以番搓泥班，感恩嘅係除咗可以同啲好nice嘅老師、同學一齊開開心心上堂之外，重好感恩呢幾年揾到啲適合自己嘅嗜好，喺平淡嘅生活當中加添一點色彩，亦因此而結識到一啲有共同嗜好嘅朋友仔。 

九月十二日....DAY5:
終於到最後一日...今日真係有啲脫腳, 本來想同啲同事一齊食DINNER又食唔到, 想去MELODY CAFE食嘢最後都係食唔到,連換個汽球都好似被阻咒咁,換唔到心儀嘅character.......邪爆!!虛度咗半日假期咁!!(又放假?! 係呀...又放假...HAHA)...之但係....其實....邪爆之中都有啲值得感恩嘅事情喔!

1. 雖則今日虛度咗半日假期...好在尚有數日假期迫我在今年內揮霍埋佢...下次再PLAN好啲! 其實今日都黑唔哂....食唔到MELODY都食到Twinstars 同茶木...

2. 個YAHOO EMAIL 帳戶因為我嘅老人痴呆被LOCK咗(而家冇喺YAHOO寫卜好少login...連個password都唔記得喇!!).....想reset password咩...連個backup email都荒廢咗...email account都冇埋....好彩...隔咗兩日無啦啦又記得番個password!! 好多account都係跟yahoo email架....若果呢世都開唔番就屎喇.....呢單嘢真係要感恩喇!!

3. 正所謂遠親不如近鄰,之但係若果啲鄰居係家姐又就係正到爆喇...要湯有湯,要生果有生果, 要沙律有沙律, 要黐餐又有得黐餐....一個字"爽"!

乜話..話我渣流灘抄FB當寫卜?!唓...日日咁寫咪好似寫日記咁囉....haha!...不過...其實我喺fb都未寫總結...喺度寫罷啦.....反正寫太多嘢喺fb都未必有人想睇架啦!!

總結: 其實我覺得..."感恩"呢家嘢真係幾玄架....當你病嘅時候, 覺得有健康嘅身體已經非常感恩....當你失業嘅時候,  覺得有份工已經非常之感恩....當你失意嘅時間,覺得身邊有屋企人同朋友支持已經非常感恩...當你窮到冇錢開飯嘅時候,覺得有三十蚊比你食碗米線嘅時候已經非常感恩.....睇怕大家以上4點皆不是啦...咁...你今日又諗唔諗到有乜嘢值得你感恩呢? 諗唔到? 其實當大家又有冇諗過以上4點皆不是已經值得你去感恩呢? 幸福唔係必然...人嘅慾望真係無窮無盡,或者"感恩"就係提醒大家知足常樂吧....希望大家懂得珍惜現在擁有嘅一切!

一年一度大茶飯!

又到9月...9月有乜咁特別?! 其實又真係冇乜特喇...祗係我最細嘅姨甥女生日啫.....咁生日又有乜咁特別?! 又真係冇乜特別架...都係攪吓生日PARTY咁啦...咁生日PARTY又有乜咁特別呢?! 咁...又真係冇乜特別架....不過....硬係要整少少甜品贈吓慶啫...

前兩年都係整MARCOON.....今年攪攪新意思整吓CUPCAKE...其實係懶懶地唔想整咁多花臣...CUPCAKE比較簡單嘛...嘿嘿!不過我嘅奸計唔得逞呢...家姐想加碼整埋糯米糍...嘩!星期五先話要加碼....星期日就開PARTY喇喎!! 點攪呀...不過見家姐咁想要...死就死啦...明知星期六晚要外出....唉!燒賣就燒賣...最多通頂架啫...一年一度豪比你!!

就係咁...星期六馬拉松式整呢整路...首先緊係整啲比較得心應手嘅CUPCAKE先啦...幾個月冇整...好在冇失手啫!!

之後就出事啦...麥提莎糯米糍...話難又應該唔難...不過要逐粒搓真係要花啲時間呢....最慘係家姐比咗個中哂伏嘅食譜嚟...啲粉整完之後好"削", 好似鬼口水咁...堅難包...整咗粒幾鐘先整到一粒...又要趕住出門口...唯有夜晚番嚟再整啦!! 點知番到屋企已經11點...再死死氣繼續...真係整到發哂皮四爆哂粗先整到14粒....其實重有成大舊粉...不過真係頂唔順掉咗佢!!放棄罷啦!!

唯有繼續整另一款, 芒果糯米糍...呢個就似樣喇...不過由於買唔到新鮮芒果...家姐喺烘焙店買咗啲現成嘅芒果肉...味道怪怪的....唔似天然芒果似...算罷啦...難得整得有啲似樣....整埋佢!!

YEAH...半夜3點半終於攪掂喇...好揀動! 一共整咗16粒伯爵茶cupcake +16粒朱古力cupcake+14粒麥提莎糯米糍+22粒芒果糯米糍.....家姐重預留咗個甜品區擺呢啲甜品.....

多得大家支持...呢堆嘢最後比人掃哂喇!! 雖則整凡真係好鬼趕好鬼攰, 不過見到真係有人欣賞都係值得嘅!!多謝大家!! (希望大家食完呢檀嘢仍然都係咁身體健康呢!!HEHE!)

Dazzling Cafe...顛!!

自從去完台灣番嚟就對台灣嘅食物念念不忘...由其係咖啡店....其實...台灣同韓國嘅咖啡店我都一樣喜歡...各式各樣各有特式.....嗰邊唔似香港呢(獨孤兩味...唔係Starbucks 就係Pacific Coffee,什麼店舖都是壟斷的....悶!!)

知道Dazzling Cafe喺香港開分店真係好想試一吓呢...不過聽聞好難等到位喎! 點知前日聽到同事話想去試..哈哈...我緊係嘭嘭聲話加入啦(好明顯係不請自來嗰隻KAKAKA)...點知另一位同事聽到又話一齊...YEAH....4條友可以食多啲嘢嘛...跟住我哋就PLAN好咗行程...

同事M姐去做Facial前攞籌先(大慨下晝一點攞籌), 之後等M姐做完我哋再去The One集合, 斷估應該有枱喇掛...點知...大家3點去到The One, 祗係輪到68號(我哋張飛係132 同142), 唔係FA...11點開市到下晝3點都只係叫咗68張枱, 冇病吖嘛...唉!冇法啦...大家又未食LUNCH...唯有去第二度食啦....之後上咗去別府食LUNCH....食完LUNCH又唔忿氣再去Dazzling Cafe睇吓乜料...乜解究又無啦啦都到103架....好!! 去一去SHOPPING番嚟再睇...

就係咁...我又好落力咁買咗對鞋喇..HAHA!!買完再行多陣...再去Dazzling 睇妖!乜又過咗架....15X...冇嘢呀..幾個字啫又過咗咁多張枱....好彩...哥仔都比張枱我哋,坐低都4點幾喇.....參唔多4個鐘...顛!! 怪不得個個都坐番夠本啦!!

啲食物真係唔錯....之但係咁等法都好難再嚟喇!!