星期日(23/4), 今日就係大家姐結婚嘅大日子,好開心呀!不過大家姐個電話個鬧鐘short short 地攪到佢唔知醒,我哋又諗個訓多陣先起身喎....後尾6點化妝姐姐嚟到大家姐先起身.....8:15分班姐妹就嚟到,佢哋真係好pro架,個個化行妝著靚靚咁嚟到, 肥師奶同排骨仔重扮埋花仔同花女添,好kawii 呀!
9:30大力就同班兄弟殺上嚟, 循例都係要玩吓班兄弟架啦(都係唱吓歌,答吓問題, 食吓苦瓜, 錫吓拖鞋咁姐)到咗10點幾玩完遊戲斟完茶就坐車去男家!去到男家又係循例咁拜吓祖先同斟吓荼之後就食lunch, 大家姐就爭取時間轉妝,其實本來諗住去紅綿道影吓相先再去大會堂註冊架但係由於時間嘅關係,最後都係喺大力屋企樓下影咋,不過個景都OK 喎!
2點我哋就出發去大會堂,去到當然又係影吓相先啦,到咗2點9大家姐同大力就去登記,3點鐘就準時註冊....不過由於book唔到大房,好多親友都要罰企添....
註冊影完相又要趕去酒樓, 整日嘅行程都相當緊密呀....去到酒樓大家姐又係不斷咁換衫,啲姐妹就負責做m.c.同玩遊戲,由於大家姐啲friend 都湧躍參與, 啲氣氛好好呀,大力重扮waiter 要大家姐搵佢出嚟添,好攪笑......雖然忙成日,不過唔知係咪太開心呢, 我同家姐唔知點解又唔係好餓喎, 成日都冇乜食嘢!(不過番到屋企先知勁攰同勁餓囉
前排大家姐買咗個搾汁機番屋企整五菜汁, 佢話聽聞食五菜汁對身體有益架, 對高血壓、膽固醇過高、胃病、便秘、腫瘤...都有益處, 所以lee排我哋成日都整嚟飲, 不過尋晚切蘋果嘅時候發生意外...切到手指呀...嗚鳴...之後我用咗9 秒9嘅時間痴咗塊膠布扮冇事繼續搾汁
頭先師奶仔問我整五菜汁要乜嘢材料, 其實材料都好簡單,有興趣不妨一試:
五菜汁 (五青汁)
材料：
青瓜 1/4條
苦瓜 1/4條
青椒 半個
西芹 2大片
青蘋果﹝去皮﹞ 1個
做法：
將材料洗淨，切小片，放入榨汁機榨汁, 重要即榨即飲(喜歡嘅話加1/4條紅蘿蔔都得架)。
好黑仔...復活節假期嘅第一日就發現屋企部電腦壞咗,正確嚟講應該係個mon壞鬼咗, 係咁閃吓閃吓....咁啱大家姐重想上網訂花球添,後尾佢都係要特登番屋企上網訂!
頭先打去hotline搵人整mon又冇人聽...打親去都係電話錄音, 我咪留低電話同姓名囉....最後當然係冇回音啦....後尾死心不息再redail咗6次先有人聽, 最慘係我醒唔起抄低個serial number, 我講個user id 比hotline亞姐聽佢又唔知我噏乜, 我問佢用其他資料check 唔check 到....佢又話乜Q都check 唔到, 都唔知上網registrate 咗啲乜, 想上網睇番warranty啲資料, but 個網頁又有bug睇唔到...非常之唔掂....比佢激死咗!
尋日隔離department 有個亞姐last day請食西餅，雖然我唔多識個亞姐，但係見個tea lady 隊到過嚟咪頭皮拎件餅食囉, 而姐姐就拎咗個紙包蛋糕食，話時話我已經有十幾年冇食過紙包蛋糕喇， 我講咗點解唔食紙包蛋糕嘅原因比師奶仔、姐姐同plam神聽之後佢哋之後佢哋竟然勁笑， 一啲同情心都冇呀，哼!
查實事發經過係F.2 嗰陣, 有一日無啦啦飛咗隻相思雀入屋，跟住老豆捉住咗隻雀仔問我想唔想飬（當時未有禽流感lee家嘢架），見隻雀仔咁得意我梗係nur 飯應啦!就係咁樣開始咗飬雀喇，首先梗係幫隻雀改名啦，由於佢訓覺嘅時候將個頭卷埋去個身度，好似成個波咁， 所以就叫佢做波仔喇！
我除咗餵波仔食雀栗之外重間唔中餵吓蘋果同紙包蛋糕比佢食，攪到波仔成身都係紙包蛋糕嘅味添（再加埋啲雀味，嗰陣味都好難頂吓）！如是者餋咗佢兩個幾星期，有一日我就幫波仔洗雀籠，見波仔一成身都係紙包蛋糕味咁咪順便幫波仔沖涼囉．．．
之後嗰幾日當我每次洗雀籠嘅時候都順便幫波仔沖埋涼，但係有一日見到波仔沖完涼係咁震，跟住我就用風筒吹乾啲毛，好彩吹完又好似冇乜嘢喎，隔咗一日之後我又再幫佢沖涼，沖完佢又震喇，今次重震得好勁添，我拿拿淋又用風筒吹乾啲毛，但係波仔雙眼耷哂呀，重好似好眼訓咁喺度仲吓仲吓．．．仲仲吓佢就訓着咗，重係一睡不醒嗰隻．．．嗚嗚，我喊咗成晚呀，除咗係因為唔捨得波仔之外重因為我係殺雀兇手，好內疚．．．自此之後我就再冇食過紙包蛋糕，因為一聞到啲蛋糕味就諗起波仔喇！
