學跑友話齋初馬好比初戀, 一樣令人難忘! 2016年3月13日, 終於完成咗我一個少少嘅心願, 完成咗第一個全馬,亦都係我嘅第一個海外馬, 好難忘嘅經歷好寶貴嘅經驗....當然要開心share啦! (旅記當然係唔少得, 不過想寫個初馬先呢!!)
我同跑友們喺初馬前一日去會場拎選手包, 見到面前嘅巨蛋不期然覺得有點緊張(一日後我哋就係喺呢個地方起步同衝線.....咁啱我哋幾位都係第一次參加海外馬, 亦都係第一次跑全馬, 大家都覺得成件事好新奇刺激)....拎過選手包後我哋就去位於巨蛋嘅Expo....Expo地方唔算大, 不過總有敗家嘅機會, 有紀念TEE同紀念風褸, 一場嚟到話哂係初馬, 唔係唔買吖嘛....$8xx幾蚊港幣一件薄風褸相信冇乜幾何會再買呢.....只此一次吧!
我哋4位, 相信每個人抱住唔同心態同心情去參加初馬, 不過目標一致, 一定要好好完成初馬yeah!!
唉...一向睡眠質素不太好嘅我喺初馬前一晚確係瞓得唔太好, 真正入睡時間大慨有兩三個鐘, 唔緊要啦, 盡力就跑就好喇! 比賽當日我哋齊齊食個早餐先...嘩!一條友食咁多...嗯....真係食唔哂, 叫多咗添, 嘥嘢呀...sorry囉.....唔知咁多嘛...話時話而家先諗起...乜解救跑前會飲咖啡嘅(咖啡去水...對長跑其實不適宜)....HAHA又傻咗喇我!
食飽我哋幾個就齊齊搭地鐵去會場,途中仲見到長跑紀嘉文, 原來佢都有參加今日嘅半馬比賽呢!到咗會場, bag drop之後就要做最緊要嘅一件事...就係去洗手間先...點知...多人到呢, 開咗跑我哋仲輪緊洗手間, 好彩我哋擺明係遲開跑嗰批, 去完洗手間仲趕得切....前前後後過咗17分鐘先去到起點, 當然啦我都預咗係至在參與mode, 都係計番個人時間挑戰自己好了!
同其他馬拉松一樣, 遲上線的話頭幾K都只好同大家一齊"行", 成棚人塞住真係想行快步都難漠講話跑啦! 結果頭兩K跌到去6分尾(其實我個人嚟講想5小時內完成嘅) , 嗯...一開始6分尾有點危險呢, 盡量用番6分頭/中去跑, 好在第4K開始可以跑番屬於自己嘅pacing...其實對初馬期望不大, 成績可能唔好(其實對我嚟講完成已經好好)....相片可能影得唔靚(人唔靚點影都唔靚, 所以一直都冇奇望的HAHA), 我諗我可以掌握嘅唯一一樣嘢就係好好享受呢幾小時嘅happy moment, 難忘嘅第一次!!
儘管聽聞唔少跑友跑完一次全馬完全怕咗再跑...不過我仍然對初馬好有憧憬, 大慨喺練習嘅時候已經feel到自己會唔會鐘意跑全馬, 我試過一個人跑過30K一啲都冇抗拒, 我絕對相信自己真心喜歡跑步真心享受全馬! 果然, 我好了解自己呢, 全程我都好享受, 享受跑步嘅樂趣, 享受整個比賽嘅氣氛, 享受工作人員送上嚟食物, 享受微涼又清爽嘅天氣, 享受市民吶喊助威又用各式各樣嘅方法打氣, 最後幾K全憑大家打氣先可以keep住6分pacing去完賽! 其實成個全馬完全唔識估計自己完賽時間, 第一次跑全馬好擔心最後幾K頂唔蒲要慢慢爬番終點, 不過跑到32K右左發現狀態還可以, 於是大膽假設自己可以喺4小時30分左加完成.....好!! 今次就一於定咗呢個目標跟住就勇往直前! 查實最後幾K心情好矛盾, 好想做個好少少嘅成績, 不過又唔捨咁快玩完呢個比賽, 畢竟辛苦咗幾個月,期間又有唔少跑友比意見我又陪我跑, 一面跑步一面不斷回憶之前付出嚟努力, 已經不禁熱淚盈眶喇.....到衝線一刻已經忍唔住爆喊喇.......
最後用咗4小時30分鐘內完成, 雖然說不上"快", 不過對於我嚟講已經係一個突破, 一個美好嘅回憶! 再加上俊男送上嘅Tiffany頸鏈作為完成牌, 嗰刻真係好開心呢.....期待下一隻馬, 更期待下一隻海外馬!
