Unicef Charity Run 2015

又係一年一度嘅Unicef Charity Run喇以往我都只係跟大家姐佢哋玩3K親子組, 不過呢期識咗成堆長跑瘋人院嘅院友....佢哋一個二個都玩半馬, 之但係跑半馬再跑3K又真係未必趕得切喎!難得公司有SPONSOR唔JOIN又有啲嘥, 最後退而求其次玩個10K啦, 其實上次玩10K已經係上年渣馬喇...跑咗兩次10K次次都要一粒鐘鬆啲先完成, 到今年渣馬玩咗半馬次後又唔想再玩10K喎! 咦咁咪冇仇報囉, 我真係好想試吓1粒鐘內完成10K喔! 其實呢期跟跑友跑得多咗, 加上次前上過跑步班之後開始留意自己嘅pacing...跑咗幾年都好似冇乜進步過, 但係我又怕扯蝦唔敢去咁盡, 真係好矛盾呢!

 

之但係次次同跑友跑完佢哋好多時都話我可以跑快啲, 我又真係半信半疑呢, 之後我又嘗試加速...又好似得得哋喎...終於....喺練習嘅時候可以穩定地喺一小時內完成10K.....

 

可以我太小參加比賽(都係嗰句啦, 我喜歡跑, 但唔太喜歡比賽!), 通過一年都係參加一兩個, 所以每次都全力以赴....今日就係咁喇....呢個10K....一心用爆肺MODE盡力跑....盡量KEEP5分左右嘅PACING....YEAH....成功了!終於可以喺一小時內完成10K賽事, 而且成績比想像中還要好! 52分14秒(有多冇少啲時間!) , 感恩, 亦好感謝跑友們嘅鼓勵同提點!

 

黑糖合桃蛋糕....

 

又嚟呃神騙鬼喇....今次整個黑糖合桃蛋糕呃吓LIKE先....雖然呢個係牛油蛋糕不過加黑糖感覺冇咁漏...嗯!呢期整啲嘢好似重複又重複咁, 要搵多啲新食譜攪攪新意思先! 唔係嘅話就算啲白老鼠唔悶我都整到悶喇!

同事生日飯....

每次約同事食生日飯都好艱難攪攪吓由每月之星變咗每季之星....難得食一次就食得豪啲, 今次去打邊爐, 啲食物確係唔錯, 不過又真係幾貴囉....攪到大家唔係好飽, 最後要去搵聰嫂食埋甜品先夠喉!!

GODIVA x The Ritz Carlton

年己又係清假嘅時候....一連4日放假真係超爽, 假期最後一日就去咗山頂散步之後就再去Ritz Carlton high team, 呢個tea 係GODIVA x The Ritz Carlton....啲蛋糕真係堅好味, 不過真係太漏食唔哂最後打包咗兩件同ME姐分享...最正嘅係..HIGH完個TEA夜晚又約咗啲朋友仔開飯...一日到黑食食食....飬猪一樣囉!

 

究竟係annual dinner 定係婚宴?!

 

星期日係同事BABE嘅大喜日子, 作為同事當然要到場賀賀佢啦...嘩!乜原來有咁多同事去? 真係好似annual dinner一樣咁熱鬧, 食吓嘢吹吓水又一晚...當gathering咁都幾好玩吖! Btw, 恭喜哂呀babe!

Hea遊大澳...

話咁快又年尾又係時候清飯喇, 由於之前留咗啲假要搬屋但最後都係放幾4日左右, 又因為搬屋想慳啲洗所以又去少咗旅行! 所以重有幾日假淨呢, 趁年底前清埋佢先!

 

咁啱啲同事都要清假一於齊齊放齊齊去玩, 第一站就係大澳喇....HAHA...其實...都係誤打誤撞無啦啦咁嚟咗呢度! 其實都有兩年冇嚟喇, 呢度都冇乜嘢變吖! 周圍行吓, 食吓嘢都幾爽吖!

 

梅子林Take 2

又嚟? 又跑? 又梅子林? 事緣係咁嘅亞祖係有老人痴呆架, 其實約呢班跑友嘅時候真係唔記得咗之前已經約咗人跑梅子林! 唔打緊啦, 反正上次跑夜晚睇唔清楚風景今日再去睇真啲! 其實有部份跑友今朝先比賽完10K 之後又陪我哋顛繼續跑多10K真係冇得頂! 而我就同其他唔需要比賽嘅跑友去比賽場地同跑友打氣兼影相!

 

真邪, 乜又落雨呀! 好在落一陣就停就係咁停吓跑吓就9K, 最攪笑係LAST一K有跑友提議去飲茶, 最後個個又真係一齊癲臭住去飲茶...超攪笑! 最後飲飽食醉先至番運動場拎番行裝走人(臭衫都吹乾哂, 連涼都懶得沖, 搭車番屋企再慢慢沖喇!)

我的鬼馬跑友們...

加咗個跑步谷幾個月最大收鑊當然係識咗好多志同道合跑友啦, 幸運地絕大部份嘅跑友都好NICE, 有啲跑友好跑得, 有啲就好有才華, 有啲就好鬼馬, 呢幾位就係跑得又鬼馬嘅跑友喇!

 

佢哋鬼鬼馬馬拉咗個神秘嘉賓一齊跑, 雖然最後神秘嘉賓冇同我哋一齊跑, 但總算集咗郵做個紀念吖!

 



11月之星生日飯...

今年好似凡得特別快, 話咁快又到11月, 無啦啦諗起今年未送小禮物比我啲好友喎, 就趁11月之星生日飯整個蛋糕仔賀賀佢一齊食吓餅啦! 就呢個啦, 整色整水加少少金箔都算呃得吓人吖....

 

朋友仔揀咗呢間食小炒同煲仔飯, 味道都唔錯呀, 不過煲仔飯都係傳統嘅款式比較好味呢! 其他餸菜都不過不失, 價錢實惠, 唔錯呀!

 

梅子林Take 1

前排約咗位跑友私奔, 由於大家都係懶忙嘅關係呢次私奔已經係個幾月前約定....終於都可以到咗私奔嘅大日子....點知落雨, 不過又好在好細雨啫, 一啲影響都冇, 唔吹水都唔知原來呢位跑友都幾攪笑! 難得可以一邊吹水一邊跑又唔太攰(好明顯呢位跑友係高手,就住我披醒跑真係辛苦哂HAHA)...

 

跑友知我大鄉里冇去過梅子林同埋科學園所以就帶我到此一遊, 唔覺唔覺就跑咗17K, 印象中放工去跑第一次跑咁多咋...之但係可能一邊吹水一邊跑又真係唔覺攰喎!好玩! 希望下次可以再同呢位跑友再跑過!

青公之友齊齊跑

今日青公好熱鬧, 幾位跑友千里迢迢嚟青公團跑, 作為街坊點都要JOIN啦! 之但係又話今日立冬嘅, 乜解救熱到亞媽都唔認得架?! 冬天都成27, 28度真係人都顛, 最慘係跑唔夠15分鐘已經成身汗, 天呀!我啲濕疹未好番架, 跑12K又嚟料, 條頸啲粒粒即刻紅哂, 雖然得幾粒不過都好唔C服! 希望快啲涼少少就真係幾時跑都好C服喇!

 

話時話有幾位跑友一排冇見,希望下次再同大家一齊跑過!

蠔門夜宴@Hide & Seek

繼上次同呢班跑友食完海鮮塔之後佢哋嗰日已經再約定一齊食生蠔, 跑友搵咗個靚場, 又訂埋生蠔, 連白酒都準備埋真係冇得頂呀! 呢啲真係物以累聚, 為食嘅人總會遇到一班為食嘅朋友!

 

成班友仔除咗食得仲好飲得, 我飲到咁上下要以茶代酒呢, 亞媽教落任何情況之下都唔好比自己飲醉嘛, 女仔人家醉咗失儀嚇親人就唔好啦!

 

 

Run for Fun@寶雲道

星期二又JOIN咗團跑, 其實呢幾個月都跑過寶雲道好幾次, 不過次次都唔係EXACTLY嘅路線! 團跑就係咁好玩, 其實每次啲路線都唔同,可以同成班跑友周圍跑確係好玩, 每次總有新鮮感!

 

不過天氣開始涼, 夜跑係C服, 不過又真係好易攝親, 呢晚就係喺跑完拉筋嗰陣攝一攝即刻發冷, 好在可以即刻沖番個熱水涼, 沖完連飯都唔食就閃喇!

一個人的浪漫之旅...慢走26K

好耐冇跑長課喇(對我嚟講20K以上已經係長課喇), 之前因為濕疹唔敢跑咁多...到家家陣濕疹問題仍然存在, 比起之前稍稍緩和...加上天氣冇咁熱, 應該冇咁多汗就試吓照跑啦...

 

之但係整個十月, 每次想跑長課嘅時間總有跑友挑機話一齊跑(不過次次都唔過20K), 結果成個月都跑唔成長課, 好在喺10月嘅最後一日終於有時間可以跑吓長課喇!

 

其實跑友挑機攪到次次都跑唔成長課都係借口嚟, 坦白講其實我怕跑得太多傷腳呢! 我喜歡跑步, 但係對於比賽我只屬平常心志在參與, 甚麼披醒甚麼名次我不太在乎, 當然我都希望有進步不過唔會強求!

 

講到底我喜歡跑步就係因為可以隨時隨地無拘無束咁周圍走, 若果對腳受傷就好難再無拘無束咁跑喇, 而且受傷分分鐘要休息好幾個月呢....就算要應付全馬都好, 都希望盡量避免受傷! 

 

點都好啦...全馬點都要認真練習一吓, 長課唔敢太密, 暫時大慨兩星期一次應該可以應付到! 星期六終於可以跑到26K喇, 其實見到自己可以越跑越耐已經好開心喇, 若果首馬可以喺限時內完成已經非常感恩! 

蘋果批

好多朋友仔見我呢期成日POST啲跑步相問我係咪冇玩黏土喇....當然唔係啦....黏土有學架...不過又真係追唔切啲功課啫...好在呢期啲功課唔難, 希望下一個COURSE開始之前可以完成今個COURSE嘅功課啦!

 

其實除咗黏土重有玩其他嘢呢, 整嘢食當然係其中一樣啦! 呢個蘋果批真係超易整, 個撻皮好好味, 要番屋企試吓整先得!