今日又係月尾嘅大日子喇,平時通常都係參唔多放工啲user 先打嚟落call,但係今日比較特別,晨早流流9點幾啲user就打嚟,重要一個call接一個call,重鑊鑊新鮮嗰隻....勁煩....
最慘係要support 埋啲不知名嘅program(user自己寫架), 又冇user account入去睇又冇source program睇(個program始創人走咗佬),試唔到又check唔到, 真係求生不得求死不能......攪攪吓啲user又話啲data唔見咗,最後要倒backup先得,重要比user嘈..."乜restore咗嗰個backup有啲data冇咗...", 睇吓先知原來個backup尋晚8點做,但係啲user尋晚OT到12點先走.....攪完一大輪都係得個吉....頂!
唉!5點23分又有call喇......救命...死得喇!更正應該係5點53分重有call呀!
今日大家姐又搵咗一個印傭(Waigi)嚟試工, 其實本應約佢上星期日嚟但係佢上次甩咗底,攪到今日先嚟....but我哋約咗佢9點去到我屋企樓下等,但係佢9點先打嚟話喺葵芳搵唔到巴士,終於9:30先嚟到,嚟到先至話淨係比一粒鐘我哋interview(唔試工), 頂!真係火都嚟
講咗一大輪Waigi先肯留低試工,大家姐叫佢買嘢煮蕃茄炒蛋同老少平安(雞蛋+豆腐+魚肉), 佢都做得似模似樣, 不過Waigi蒸蒸吓碟老少平安嘅時候無啦啦又走嚟問我.....
Waigi:「小姐,有冇糉?」
亞祖: 「糭?乜糭」(乜晨早流流想食糭??)
Waigi:「我想睇吓碟餸要蒸幾耐.....」(噢!原來佢係要睇"鐘")
我諗我真係要去驗吓耳好啲! 後尾我哋留咗啲蕃茄炒蛋同1/5碟老少平安比亞媽,淨番嗰4/5碟老少平安大家姐又唔幫手食喎,我一條友啃咗成碟當lunch...真係食到飽飽滞滞,我諗3年之內都唔會再想食lee味餸!
話時話佢啲手勢真係唔錯, 不過一提到重要照顧一個行動唔方便嘅老人家佢即刻話唔撈,試咗半日就閃咗lu....唉!睇嚟我哋有排先請到人喇!
今日我哋約咗個印傭(Susie)試工,本來約咗Susie8點半去到我屋樓下, 二蔗孤話8點半左右都嚟到幫我手睇吓個印傭....但係8點鐘大力就打比我話Susie已經嚟到我屋企樓下個巴士站....吓!唔係咁快吖ma,二蔗孤又未到...重係啱啱洗完頭, 又吹唔切頭....由於時間嘅關係.....個頭洗滴住水咁落街搵Susie囉....
去到巴士站,搜索咗一大輪都唔見Susie...見有啲唔對路都係call吓佢穩陣...
亞祖:「你係咪Susie?你係咪到咗?」
Susie: 「係呀!我到咗巴士站.....」
亞祖:「但係我見唔到你,你不如去巴士站隔離嗰排櫈度等我.....」
Susie: 「我lee度冇櫈喎.....」(基本上佢講完lee句都知出事,佢9成去錯地方,大鑊!)
亞祖:「吓!咁你見唔見到OK同大快活嗰啲? 」(佢又話見到喎)咁我咪叫佢喺OK門口等囉....
又過咗幾分鐘....唔係掛個巴士站一眼見哂冇理由耐都冇影架,於是又call多佢一次.....
亞祖:「你喺邊呀?」
Susie: 「我早咗 一個站落車.....」(頂!果然不出我所料,都好彩佢噏得出佢嘅位置啫,唯有行去接佢啦....)
擾攘完一輪終於見到佢喇,我帶咗佢去街市買嘢再番屋企叫佢幫手做家務.....
亞祖:「唔該幫我煮個早餐丫,我要兩條香腸同一隻雞蛋....」
Susie: 「香腸係咪要剪?」
亞祖:「香腸唔駛剪, 就咁整就得架喇(都唔明點解無啦啦做乜要拎條腸仔去剪?!)」
Susie: 「咁啲香腸點整呀?唔駛剪?」(唉!迷底終於解開....剪=煎)
亞祖:「哦....係呀我要煎腸仔同雞蛋呀!唔該!」
過咗一陣佢就拎咗碟"早餐"比我食,嘩!好勁佢整咗條冰火腸仔比我(外熱內冷,好似美女厨房咁,條腸仔真係nur都nur唔切),....比佢吹漲!我諗都要睇埋聽日嚟試工嗰位姐仔穩陣!
尋日同媽媽做year end review, 查實都冇乜特別嘢講,都係講吓lee排做梗乜同埋嚟梗有乜project/job會做咁啦.....
講講吓媽媽無啦啦彈咗句,呀...有啲嘢想提你,家陣lee度啱啱裝修完多咗meeting room, 啲人一早嚟開會,望見倒lee到一個人都冇,啲人開完會(下晝6點幾), lee到又係一個人都冇(講到好似冇人番工咁)...唔係幾好,可以嘅話準時啲番工...雖然媽媽講"其實你已經算早" (but早得嚟都要9:05先到
由於我真係要非常非常之準時走又唔想博炒嘅關係,今朝的起心肝,早5分鐘咁大把落街搭車, 查實都係搭早一班巴士姐......不過又真係非常之堅,早一班車姐又真早好多番到公司.....8點9就番到嚟,重早過helpdesk.....不過......唔知我可以堅持幾耐呢...
尋日大家姐約咗個印庸(諗住請番個人照顧亞媽)去我屋企interview,順便叫佢試吓工咁,約咗個印傭9點鐘嚟我屋企, 我個鬧鐘8點幾就响咗....但係我同大家姐實在太攰,大家鬥hea冇人起身,瞓到9點半大家姐個電話响....車!原來係個印傭打比大家姐,佢話今日冇假放要下禮拜日先嚟到....唔係fa,明明約咗9點架喎,唔係9:30先知嚟唔到掛,唔好聽日先打嚟!!.....未見都已經覺得唔多掂
見個印傭甩底,大力就提議我同大家姐去"得成"睇吓有冇啲現醒嘅印傭,之後我同大家姐&大力去咗荃灣嗰間"得成"睇吓....嘩!一去到就好似置身喺皇后像廣場一樣,好多賓賓亦有唔少印傭喺度等interview,真係好鬼死嘈
個得成亞姐就比佢幾個印傭嘅資料比我哋揀,但係得兩個有照顧過老人家咋!咁唯有見咗嗰兩個見啦....一嚟我哋就見咗個比軟成熟啲嘅印傭....but.....其本上係我哋係溝通唔到架...佢啲英文似乎麻麻,識少少廣東話同普通話,同一個問題要用廣東話/普通話問完再用英文repeat(起碼都要repeat 一次),重係問啲簡單嘢(以前做過啲乜,識啲乜,駛唔駛回)...最攪嘢係問佢而家係咪冇做嘢....問咗佢5,6次先至答到(重要搵埋個得成亞姐一齊問先溝通到)....真係雞同鴨講!
跟住見第二個,喺溝通上lee個比起之前嗰個就好好多起碼淨係用廣東話都溝通到.....但係又冇之前嗰個咁經驗豐富,而且太young驚佢冇心機照顧老人家......係算罷啦, 真係兩個都唔多啱駛!睇嚟lee排我哋都要好似啲賓賓咁喺"得成"打躉搵人.....
尋晚喺威爾斯醫院門口又見到嗰個周圍問人借錢搭車嘅亞伯, 我離遠見到佢喺醫院門口徘徊, 咁啱見到醫院門口有一大班人經過, 心諗唔通佢又想搵嗰啲人笨, 不過睇咗一陣佢又冇乜行動喎
正當我行近醫院門口之際, 亞伯無啦啦行過嚟我嗰邊, 查實我已經扮睇唔到係咁行架啦, 佢重猛咁叫住我"小姐!小姐....", 頂!估唔到亞伯咁有眼光劑劑都係搵我度水(今次已經係第三次喇).....乜我個樣真係咁笨咁似水魚咩
好鬼hurt架ma
前晚我喺沙田食完飯就搭van仔番屋企, 坐到半路中途,無啦啦有把熟悉嘅聲音大大聲咁講:「好喇,今日我同大家講吓悔改福音.....」頂唔係fa, 又係上次嗰個福音亞姐.....
由於今次我坐咗喺最後排, 終於見到福音亞姐嘅盧山真貌, 就咁睇外表佢又真係唔覺佢有乜嘢咁.....之但係坐喺福音亞姐前面個師奶聽多兩聽覺得唔對路, 好鬼騷擾, 跟住就擰轉面怒啤福音亞姐, 佢望一望個師奶跟住就當冇事發生咁繼續講落去.....個師奶當然係比佢吹啤一聲啦!
之後又有個亞叔好大聲同好惡咁話:「細聲啲啦!」.....終於有人出聲喇
lee排我公司請梗人,見有有朋友仔想搵工咪叫佢send封cv嚟試吓囉.....收到朋友仔個cv之後,就forward咗比咀神過目,睇吓有冇機啦.....過咗兩日見咀神冇乜聲氣咪走去問吓佢乜情況,唔得都得個知字丫ma
亞祖問:「係喎,我個friend個cv點呀,係咪唔啱駛?」
咀神:「我睇過份嘢好似寫得好簡單, 你有冇睇過呀.....個friend同你好熟架(but lee 個問題唔知有乜關係)....」
亞祖:「個friend 同我好熟架,但係我都唔清楚佢做啲嘢啱唔啱你駛.....咁係咪要寫封letter 比你會詳盡啲?」
咀神:「咁又唔駛,我都唔多睇啲信架喎.....但係lee個cv 又簡單得滯....」
亞祖:「咁佢係咪唔啱你個requirement? 唔啱駛就唔好嘥大家時間啦!」
咀神:「又唔係完全唔啱, 佢寫得唔係好detail 囉,不過我哋interview要做written test架, lee幾日in嗰啲都麻麻地....」
亞祖:「吓要written test 添, 我係咪應該叫佢放棄定係再叫佢send份詳細啲嘅cv 比你?」
咀神:「佢lee份cv太簡單,好難講, 係都可能要2nd round 先in囉....」
亞祖:「咁係咪叫佢放棄得喇?」
咀神:「我都唔知, 佢份嘢寫得唔清楚.....」
亞祖:「咁我再睇吓佢有冇份詳細啲嘅cv比你啦.....」
頂...問咁耐都唔知佢想點,係咪我蠢所以先至唔明佢想點呢
