雲呢拿系列...

上次整咗個布丁蛋糕之後肥C奶同排骨仔超喜歡, 我都好想再整比佢哋食, 奈何呢個蛋糕確係有啲複雜, 真係要有時間同有心情先整到呢...趁住連放3日假就搵日整吓啦! 橫掂都買開雲呢拿, 買多少少整雪糕先! MEME最愛食雲呢拿雪糕! 整呢兩樣應該冇死, 實啱佢哋食....呵呵!

紅顏知己s

星期六約咗幾位朋友仔(係3大美女先啱)一齊食飯,同呢幾位朋友仔識咗N年喇.....high diploma之後一直都保持聯絡好難得呢! 雖則大家性格各異, 不過都有共同嗜好架...就係食HEA玩囉...HAHA....

呢期各有各忙, 難得一齊開飯,開心呢!

4

疾走郵輪碼頭

上星期約咗幾位師兄師姐夜跑郵輪碼頭, 其實閒日我都好少跑呢,放工好攰嘛! 不過又好想試吓跑郵輪碼頭(又諗住上次跑寶雲道都OK呀), 所以又膽粗粗赴會! 點知今次高手雲集個個師兄師姐都超勁....一起跑已經唔見哂人......爭啲迷路,好在有位師兄等埋我....如果唔係真係唔識路呢! 由於天氣悶熱好不容易先由九龍瀛跑到去郵輪碼頭, 已經一身濕哂熱死咗...好在回程時候有風(有風就又係超正喎!), 終於完成9K....原來閒日都跑到(當然狀態係麻麻啦,番咗成日工又唔夠瞓)不過天氣咁焗都完成到都要讚吓自己先!

大遷徙~OFFICE篇

唔駛睇相都知今年搬遷運, 幾個月內要搬OFFICE又搬屋, 好大工程!其實每次搬都好唔捨得舊居(包括舊OFFICE). 何況今次真係大屋搬細屋,何止唔見一籮穀, 直情係抄家一樣幾乎所有(公/私)嘢都要掉(私人嘢就拎番屋企啦!!).....執完舊居好乾淨,更加覺得佢大.....

上星期一開始劏房生活, 新位真係超細,重要喺pantry好嘈超唔慣! 而且啲位個個都超OPEN, 一覽無遺,最慘係家陣連著乜嘢裙都要比人管呢(坐低果陣條裙要遮住大脾,呢條RULE真係超型, 九唔搭八又冇潮流觸覺!), 其實...呢度係監獄定係小學呢....真係好奇怪!

由於大家都知搬咗之後堅慘, 所以搬之前去北京樓食個farewell lunch...同舊office say goodbye!唉....睇嚟有排捱....除非...... 　

一公升牛奶杯

話說前排喺FB見到有個跑步group,喺好奇心驅使之下就加入咗呢個group, join咗先知原來呢個世上係有一班咁喜歡喪跑嘅人, 佢哋重會喺個group度吹雞搵人一齊跑....嘩!正合我心意呢, 成日見到啲人周圍跑我都好想架,不過唔識路都唔知可以跑去邊,有人帶路就最好啦!因為咁我就膽粗粗咁join咗佢哋一齊跑....話哂真係3唔識7,真係有少少淆底(驚驚地跑得太慢好樣異相呢!)

等咗個幾星期終於到咗一齊跑嘅日子喇, 點知邪到跑步先嚟落雨(呢個星期明明朝朝都好天), 我哋約咗晨早8點喺金鐘集合, 點知6點幾起身竟然烏雲蓋頂落雨重要有雷暴警告,真係邪爆! 晨早6點幾個個就係whatsapp度討論跑好唔跑好....呢班狂熱份子當然係選擇繼續跑啦! 

其實出到金鐘又真係落狗屎架...唯有等佢細雨啲先出發啦, 結果皇天不負有心人真係8點幾嗰陣停咗雨,可以跑喇! 嘩!一嚟就係咁上斜,攪到爭啲扯蝦(堅扯架,我平時好少練習上斜真係應付唔到呢), 行咗10分鐘斜路已經不斷抖大氣嚇死我喇!好在終於到平路喇可以慢慢跑，跑幾跑又順番，不過又無啦啦出太陽，超熱又焗，好唔容易先跑到半程！抖咗一陣就回程喇，點知又開始落雨，之但係落住雨跑又真係好爽反而跑快咗！之但係中途又比蚊針咗幾吓，超痕攪到跑完連拉筋都唔記得就走去沖涼。。。超低能！第一次同成班人一齊跑,原來又幾好玩架喎,  可以嘅話下次一定再join!

減壓中....

呢個星期爆忙,比突如其來嘅一堆工作攪到措手不及....加上一堆來自朋友們嘅壞消息(有關工作及健康), 真係令我好擔心呢,由其係有健康問題嘅嗰位朋友, 希望佢吉人天相!唉,年紀真係唔細喇,希望各位朋友都懂得注重健康,大家都身體健康!

身心受壓嘅一星期,真係攰死! weekend要輕鬆一吓, 飲飲食食減吓壓又可以同朋友們吹吹水....

好耐冇食泰國嘢喇....無啦啦好掛住泰國,好想去relax一吓! 好在工作上暫時忙完, (其實重有一大堆嘢等住我不過唔係勁趕) 終於可以稍為放鬆抖一抖!!

親愛的....

又係一年一度嘅母親節,對於我嚟講呢個節日好似已經冇乜特別意義呢....已經好耐有興祝過母親節同父親節喇....咁啱尋日去將軍澳拜山,忽然間醒起原來我未整過蛋糕比老豆同亞媽呢, 好多朋友同事食過, 反而對我最重要嘅兩個人就冇機會食....好遺憾!咁啱星期日就係母親節, 一於整個蛋糕去拜山孝敬吓兩老!

本來想整個有CREAM嘅靚靚蛋糕架, 不過前一晚想開工整餅先發玩冇哂麵粉,唯有等第二朝先整啦, 臨急臨忙只好整個簡單啲嘅檸檬蛋糕啦! 希望你哋鍾意!! 

媽, 母親節快樂, miss u......

海鮮站...

海鮮站呢個名聞名已久,聽咗幾年終於有機會一試, 重以為會好多人,點知又唔係喎, 可能夜咗啲啦! 都好唔駛等位就有得食....睇完個餐牌樣樣都想食呢, 不過兩個人食唔到太多嘢, 隨便點咗幾樣....味道都唔錯, 每人百零蚊都已經好飽吓!!

Farewell Dinner....

舊同樹好快去玩working holiday喇...一年後先再見(其實6月都會見到佢嘅..HAHA), 之後就真係一排都見唔到喇....所以同佢食餐飯薦行, 上次冇手撕雞又冇飲朱古力今次補番, 好味!

由於太飽而且時間尚早,食完晚飯就行落太子食甜品, 超級飽呢!

周街跑....

呢期繼續忙於搬屋搬廠搬寫字樓, 上星期先執好公司啲嘢(基本上係掉嘢唔係執嘢囉!), 跟住呢個星期又開始忙搬家, 家俱裝修又要參與, 當然大部份都係家姐幫手整, 我主要都係諗自己間劏房點整, 原來諗間隔都唔容易, 家陣先開始有少少頭緒....

雖然有啲心身疲累,不過仍然好想跑吓, 跑吓反而可以放鬆心情....上網成日見到啲人由尖咀跑去紅磡好似好好玩咁, 星期六一於去跑吓! 諗於第一次跑就早少少出發啦, 去到8點...頂!遇著幻彩FING啷啷, 成村人企咗喺海旁, 勁無奈!!唯有同一眾遊人一齊睇幻彩FING啷啷啦，睇完再ＨＥＡ陣等啲人散咗少少先跑得（不過尖東一帶都係超多人，避人避得好辛苦，有好幾次爭啲炒埋一碟！），下次起碼９點先開始！

除咗尖東一帶比較多人之外，去紅磡方向真係超爽呀！沿海有少少風好舒服！

 

星期日晚食飽飯番到屋企又無啦啦黐起條筋好想跑吓，參唔多１１點先落街午夜狂奔（其實都重有一堆人跑緊架），爽！

 

黑糖紅梅muffin

好耐冇整muffin喇, 前幾日大家姐拎咗啲紅梅乾比我最啱就係用嚟整muffin, 整番個黑糖muffin食吓先! muffin同蛋糕有乜唔同? 其實材料都係大同小異都係牛油,麵粉,雞蛋,糖同牛奶, 不過粉量唔同所以整出嚟嘅質感都會唔同, 蛋糕比較鬆軟而muffin就比較實淨, 其實兩樣我都喜歡呢! 嗯, 重有好多紅梅乾呢, 下次可以整埋曲奇!!