House burning 兼九龍城喪食之夜！

星期六又約咗班傻瓜同樹去玩...今次嘅活動就係去同樹"babe"嘅屋企house warming(不過我哋習慣係去house burning...攪吓破壞架囉...HAHA)....babe有自己嘅小天地....佢重好有心思咁佈置,其實室瓦何需大,最緊要係住得開心嘛....其實亞祖細個嗰陣都係一家5口住300多尺嘅公屋...喺嗰度過咗我最開心嘅19年....一家人齊齊整整好溫暖....好懷念哦!

喺babe屋企玩到樂而忘返, 本來卜咗間泰國菜最後都cancel咗...好在我哋夜少少去walk in等位都唔駛等好耐啫....食完泰菜再食糖水...又係飽到上心口嘅一餐...

實不相瞞..次次食到咁飽..番到屋企嘅第一件事都係衝入廁所囉!!頂!! #$^*#)$@#^@&#^@

 

8月之星飯@雲來軒

2014年過咗大半喇...又係8月之星開飯嘅日子....今次去咗雲來軒開飯....食物都OK呀....超級飽添呀....捧住個肚走....

食飽就繼續下半場...同兩位8月次星齊齊去睇"失戀急讓"....其實對呢套戲都冇乜期望架喇...志在捧吓我女神(Sammi)同男神(黃子華)嘅場..點知....真係好失望囉....劇本唔得!!嘥咗我嘅女神同男神呀!!

超低能台北遊~Day 4

好快又到"啦屎"一日喇....今日9點幾已去到上引水產，食肆全部都未開，只有超市部分同魚市場部分開左，所以我哋先買外賣食住先（燒銀鱈 魚及三文魚刺身），食到咁上下就入去“立吞美食區”排隊（食左燒紅蝦，蛤湯，活北寄貝）再出去食BBQ（燒帶子及菇，上湯麵包蟹）嘩！呢餐真係好飽好滿足.跟住就去西門町及台北車站微風廣場買手信，仲有係去新光三越用埋果張抽獎抽返黎嘅100元台幣嘅購物劵啦！

 

買完仲有一個鐘，諗住去咖啡弄啦，點知要等5 張枱，唯有放棄去第二間啦！頭皮一間咖啡店都OK喎!

最後就返酒店攞行李去機場.今次旅行嘅另一重點就係搭下果架Hello Kitty機.嘩！counter,機票，頭枕，餐具……全都係Kitty,我哋緊係狂影啦.....今次旅行有汗水、有口水、有體味、有美味、有笑 聲、有傾偈聲……真係由頭到尾都咁開心呀！ 期待下一個旅程!!

 

後記:其實呢個旅程真係好衷心咁感激我嘅團友仔"搣匙"嘅悉心安排....今次整個行程都係靠哂佢呢...我呢個懶人淨係負責跟隊....搣匙真係好細心..無論搭車,行程同膳食都安排得好周到!查實絕大部份嘅景點搣匙已經去過...但係佢仍然好樂意咁再帶我重遊一遍.....最難忘嘅就係佢冒住大雨都堅持帶我去睇十分大瀑布呢....雖然最後都係睇唔到...不過我已經覺得好滿足好開心! 就連影相同寫日記都做埋....呢啲旅行腳真係好難得!! 今個旅程除咗好感恩天氣不俗之外....亦都好感恩可以認識到一位對人咁好嘅一位朋友,有趣嘅係喺佢身上真係完完全全感受到佢可以將幸福帶比身邊嘅朋友, 喺度希望呢位朋友繼續都係咁幸福快樂,繼續將呢啲幸福嘅感覺帶比其他人....希望有朝一日我都可以好似佢咁!!嘿嘿!

超低能台北遊~Day 3

第三日....晨早流流又去覓食喇...由於前一晚有線人報料呢度有好嘢食...我哋緊係要去試試啦!呢度係台電大樓站果邊嘅“日楞”食早餐, 個早餐又真係幾好食價錢又唔算貴...食到好飽添,之但係呢間餐廳真係悠閒到食左我哋個半鐘頭，搞到我要更改行程!!

 

超趕咁趕去貓空（本來唔包呢個行程架，不過第一日落機嗰陣無啦啦抽到免費票，咁就改行程都用左佢唔好嘥嘛!

遊完貓空就跟住去青田七六,間餐廳係由歷史建築物活化而來，所以我地早啲去影相，再扮吓闊太，high番個 靚tea先，然後去四四南村參觀（呢個眷村座落101大樓旁，一舊一新，相映成趣），去埋“好丘”食貝果（之但係啲貝果即係"bagel"認真把鬼，“un”到死...食到我哋牙較都軟埋....至於咖啡……因剛在青田七六飲完，所以無飲）行完晒景點，再去SOGO閒逛，買手信....

今日嘅最後一個節目係去寧夏夜市（我哋食左草菇排骨湯，臭豆腐，餃子，鍋貼及木瓜/芒果牛奶）今日真係熱到底褲都濕埋，個身臭到自己都討厭自己呀!!

超低能台北遊~Day 2

晨早流流起身緊係要食番個靚早餐啦....其實酒店都有早餐提供嘅, 之但係點都唔及出去食咁正架啦...所以我哋日日都出去食呀...日日都好豐富好好味!

今日嘅第一站就係去蜂大咖啡食早餐喇...同團友"搣匙"傾開偈..HAHA...原來大家都係近期先開始飲到咖啡咋...又真係幾啱架喎!以前叫我飲杯咖啡我真係會耍手擰哂頭架,呢個TRIP參唔多一日一杯啡呢...飲完又OK夜晚又瞓到喎!

 

食飽就去台北車站搭火車去瑞芳，之後再轉公車上第二站"九份"喇....

我哋行完九份舊道，就去買 白桃烏龍茶包，再行去阿妹茶樓及昇平戲院影相，最後以食肉丸、魯肉飯、芋圓及烤菇當lunch, 雖則立立雜雜咁,但係又幾飽架喎....重好好味添....

離開九份，就入平溪線去第三站是猴硐,真好彩喇睇完貓先開 始落大雨（感恩），又剛走左班火車(我哋好型...成日都唔多理啲火車班次....HAHA)，唯有再逛逛，買下手信及食刨冰啦！

終於有火車喇,繼續第四站"十分,.入到去雨重未停，不過已經無咁大喇....我地行過老街、靜安橋， 就膽粗粗兩條友行去十分瀑布(嗰邊真係好靜焗吓),點知去到先知瀑布封左(怪不得咁靜焗啦...)，咁就唯有行番去火車站,我哋之前見啲人落雨放天燈，個天燈俾雨淋到跌番落黎，我哋覺得咁樣唔“老黎”，所以 我地諗住唔放.....點知睇唔到瀑布，失望之際，返到車站居然停左雨（再感恩），咁就當然放啦！放嘅代價係走左班車要等個幾鐘先有下一班 (不過放天燈嘅過程又幾過癮,寫埋寫埋啲低能嘢超攪笑!!

等咗粒幾鐘終於有火車番瑞芳喇...再轉多程火車番台北車站,由於太夜，我哋決定唔去夜市喇，變陣去度小月, 呢餐好美味呢！食到好飽，就行去搭捷運返酒店.今日真係好攰呀！  

超低能台北遊~Day1

好耐冇去過台北喇....對上一次去應該係4年前台中之旅....上次祗係喺台北立留咗一晚,印象模糊呢! 今次終於可以認真去台北玩吓....呢次隻旅行腳重相當特別....難得同位卜友仔一齊去...呢位卜友仔重好熟識台灣添,所有行程都係靠哂佢...真係唔該哂呀!!

最正嘅係呢位卜友仔每晚番到酒店嘅時候都係喺FB UPDATE番當日嘅行程, 真係超正呀(咁我咪可以COPY & PASTE咁寫卜囉...KAKAKA)!!

超低能台北遊第一天~到台北機場，玩完抽獎、搞電話卡，唱埋錢，再出到西門町已兩點幾.我地今次間 酒店只屬麻雀雖小型，ok啦！推行李去酒店時，有啲落雨，不過打點一切後，雨就停，我地都出去玩喇！第一站係去淡水掃街(食左千層酥，銅鑼燒，牛角酥，飲 蜂蜜苦瓜，扭紋長雪糕)，跟住去紅樓影相，再乘船去漁人碼頭睇日落，行埋果條情人橋(入OK買嘢飲，抽到第二次獎)，之後我地回酒店梳洗休息，然後去西門 町亂逛.行下行下，屎喇！落雨又食肆陸續關門，好不容易才找到一間西餐廳未關門去食嘢（好彩食完嘢又停雨）.呢日嘅句號，係好好味嘅老天祿鴨舌，食埋就瞓 得喇！

 

愛心通粉....

咪睇呢碗通粉咁普通,呢碗可能係我呢世女食得最開心覺得最好味嘅一碗通粉....我唔係誇張架....家因呢碗通粉係排骨仔親手整架...連佢爸爸媽媽同肥妹都未食過呢...HEHE...我係咪好威呢!!

食通粉前....肥C奶同我講...咁我去沖涼架喇....我話"OH....你咪去沖囉"... 肥C奶有啲唔好意思咁答..."我驚你走嘛!!"...HEHE....比呢兩隻冧死咗!

米妮洋菓子

又嚟團購course,呢個就係上次我鬧爆嘅嗰間....因為一時衝動買咗兩個course(好明顯係比佢啲製成品嘅外表坤咗)...點都要上埋佢架啦....橫掂都係..上個比較鍾意嘅....呢個好似幾得意..(又係有搓泥FEEL...HEHE)....

唉....呢間SHOP....坦白講...好欣賞佢咃嘅創意....佢哋整嘅糕點又真係幾別具一格....之但係.....用料真係差啲囉....次次都唔好食嘅....今次件嘢超甜不特止....個餡都唔知似乜....真係好難吃呀....不過...又坦白講....我又幾享受個製作過程, 老師都算有心機教.....就算overrun咗成粒鐘都冇乜詐型....呢個又抵讚!!

HAHA....其實上課之前要揀定公仔架...我睇完一輪就估米妮應該比較好玩....因為....真係比較有難度同挑戰性....連老師都話呢個公仔比較多DETAIL, 係全場最難整嘅一個.....嘩!又真係幾難....搓慣泥都有啲呢HEA.....最後要攪多成粒鐘先完成...好彩有另一位同學仔都係整米妮先有人陪我咋....

熱辣辣自殺式烹飪班

呢期天時暑熱最好緊係喺室內嘆吓冷氣架啦...點知前嗰排無啦啦好睇唔開咁同個朋友仔參加咗個工聯會烹班...即係咁...整蛋糕西餅都唔駛對住個火咁熱...之但係煮餸呢家嘢呢就要對住個熱辣辣嘅煮食爐...真係齋企都標哂汗....所以呢....呢次堅偷懶....真係唔多願郁喇....

好彩啲組員好熱衷咁試整..HEHE!! 整咗3款菜式...樣樣都好味呢...有蘑菇湯, 煎鵝肝同焗魚卷...食完真係飽哂....晚飯都食唔落...呢個COURSE超抵!