苦中作樂...

呢期工作爆忙, 真係忙到連食飯都冇乜心情...上兩個星期日日OT...不過越做越覺得成件事吃力不討好, 有時好心諗坐幫人反而比人誤伯係我問題, 而主角又唔會問口澄清...好在最後有人出嚟評理主持吓公道, 否則死咗都唔知乜事, 曾經有一刻真係好氣餒好想放棄, 不過逃避都唔係辦法就算去第二度咪一樣有呢種人....呢舖點都要堅持!好似跑步一樣, 今日跑咗公益金慈善跑,又上鈄又落鈄堅辛苦, 見到啲同事十個有九個都係FUN RUN MODE果刻真係好想放棄, 不過我明白"怯就會輸一世"嘅道理, 就算跑到亂哂扯哂蝦都好, 頂多都係放慢一吓腳步稍稍休息回氣再出發, 絕對都會停喺度唔會做步兵番終於, 點都要盡力! 儘管盡力都未必得到回報, 至少問心無慚!加油, 正能量come back please!!

2016回顧

懶懶哋copy 番fb算喇, 其實我好少好少寫回顧架, 不過2016年真係好特別好想記低佢(呢年真係衝破咗好多心理關口,渡過咗唔少難關)!  

 

2016年12月31日參加咗本年度最後一個10Ｋ比賽，見呢期狀態好似唔錯所以嘗試全程KEEP住4分尾披醒, 估唔到竟然可以用47:14完成賽事(可惜場比賽爭200米先夠10K, 硬係覺得爭少少咁!)，僥倖得到第６名，令2016年劃上－個完美嘅句號。
其實我好想砌一張放滿今年所有快樂回憶嘅相，但係原來真係好難架，因為今年實在有太多開心又難忘嘅回憶喇！好似跑步咁，好少參與比賽嘅我竟然可以攞到獎(好明顯因為啲高手冇參賽🙊🙊🙊)，由年頭同跑友奪得嘅10K團體獎到近期半馬、10K嘅個人獎都係意想不到架！加上今年喺名古屋順利完成嘅初馬，今年跑步嘅成績可以話係超額完成。💪💪💪
不過今年最難忘嘅其實唔係跑步，反而係工作，今年嘅工作真係高山低谷乜都經歷過！自從3月離開咗工作多年公司之後就開始"玩"轉工喇！仲要係轉完又轉結果今年好似玩咗working holiday咁3個月轉一份工，最後轉到第３份先可以settle down,終於喺聖誕節過咗probation,感恩！其實除咗感恩之外，仲要多謝老細們比機會我去嘗試，幸運地我遇到嘅每一位老細都好nice，亦都好多謝所有舊同事嘅關顧，雖然冇緣同大家合作，希望大家都揾到比我更適合嘅人選幫到大家。😉😉😉
其實今年好多happy moment都有你哋份架！乜話？呢張相冇你個靚樣?!嗯....sorry囉我可能漏咗啫。吓，2016年真係冇同我影過相？嗯，唔緊要啦，2017年嘭嘭聲吹鷄開飯、吹水兼集郵啦！😋😋😋😋
最後辛苦大家睇咗呢篇又長又無聊嘅2016回顧，點都要講番句祝大家新年快樂，身體健康！2017年見喇！

Dinner with running buddies...

 

2016年年尾約咗不同嘅跑友仔食飯, 見跑友仔唔知去邊度食我就介紹佢哋去試吓私房菜, 估唔到佢哋個個都好喜歡呢度! 當然啦呢班跑友仔係無酒不歡架, 不過難得今晚冇人飲醉! 其實咁咪幾好, 盡興得嚟又唔會斷哂片!

 

 

第二晚又約咗另一班靚女食飯, 本來約好都扮得靚靚嘅, 雖則我真係執哂架生帶咗成抽化妝品番工諗住放工頭皮都攪攪佢啦, 點知呢期好鬼忙根本冇時間冇心情攪, 囉有做番自己乜都唔攪就去開飯啦...HAHA...好明顯大家都扮得好"行"....除咗我!(不過我覺得咁先最舒服囉!)