玩具壽司

其實呢個玩具都見過啲朋友仔玩過架...原來肥C奶都買咗套嚟玩...咁啱今晚上去佢屋企黐餐可以一齊玩...用幾包粉溝少少水整成壽司(製成品係糖嚟架)...每包粉都有唔同顏色、味道...都幾有趣架! 最攪鬼係整魚子...不過舊蛋同魚都唔算好成功喇...明明落咗好少水..不過都好似凝固唔到咁(唔通要用熱水?), 算罷啦...頭皮整番個樣再擺落舊飯度算啦...HAHA!

 

最抵死係連"豉油"都比埋你...幾攪鬼!

周末蒸糕bell....

 呢期幾乎逄星期都開吓爐整吓嘢食...不過通常都係焗吓蛋糕同曲奇....呢個星期攪攪新意思整吓中式嘢"蘿蔔糕"....其實諗住今年唔整架喇.....不過又好想食喎!(想食...不過...其實又食得唔多囉...我都係鐘意整多過食!)

 "蘿蔔糕"對好多人嚟講可能好簡單...不過對我嚟講真係有難度架....又要切又要刨又要炒...不過整完又幾有滿足感嘅! 今次重整咗兩底...幾乎炒都唔夠力炒呀! 足足整咗大半日先完成呢...真係唔玩到虛脫呀!

 

尋日未有時間試...今日同二家姐佢哋一齊試食...今次終於整得夠實淨...不過就略嚴啲料多得滯稍稍蓋過咗啲蘿蔔味!! 都算有進步...下次繼續努力!!

番來喇....日式芝士蛋糕!!

病咗兩星期...呢個星期六終於好番好多做番個正常人...呢個個星期...一係唔舒服瞓唔到,一係就咳到成晚冇覺好瞓...日日頂多都係瞓到4至5粒鐘!攪到越嚟越病...呢個星期六終於瞓到喇...足足瞓到7粒鐘....如果唔係10點幾比人摷醒SUPPORT可以再HEA多陣先落床就更好喇!! HAHA!! 

唉!次次都出事架...又要等消息....瞓飽有精神就整住蛋糕等消息啦...呢次整咗日式芝士蛋糕!! 整細杯啲一啖一杯!! 效果唔錯呢!! 整完蛋糕再落街跑步...係咁"倚"慢跑咗粒幾鐘....好耐冇試過跑咁耐....做番個正常人真係好開心喔!

濫藥一星期....

好耐都冇試過咁病喇....無徵兆之下喉嚨勁痛同鼻發火火....啪咗一小盒幸福傷風素攪唔掂再睇多兩次醫生....唉!睇完醫生啲藥唔得反而嚴重咗...病咗成個星期越嚟越嚴重....前兩晚重咳都瞓唔到...呢個星期所有活動都CUT哂....唯一一個活動就係睇亞ME表演...睇表演坐足3粒鐘就KO咗4包紙巾....連WEEKEND都冇精神整餅喇....至怕係病到咁架喇....未病死都已經悶死咗喇...重要冇啖好食(冇胃口又乜都唔食得)....嗚嗚嗚...快啲好番啦唔該!!