廣州自由行

好耐都冇帶亞媽去旅行喇,趁住重陽節假期我同大家姐,大力佢哋就帶咗亞媽去廣州玩,話就話去3日2夜,不過星期六下晝5點幾先搭直通車出發(到步都7點食飽飯就番酒店瞓lu),星期一下晝搭2點幾車走(食完lunch又趕車),夾夾埋埋得一日玩咋,行程雖然唔算緊密,不過都算幾好玩!

其實我都有十幾年冇搭直通車去廣州,家陣啲坐位又幾靚喎,重不時有啲哥哥仔同姐姐仔推住架餐車問你要唔要tea or coffee,重有茶,果汁比你飲....唔知重以為搭梗飛機添!

原來lee排有個廣州交易會攪到啲酒店好貴重好難book添,大家姐叫咗佢啲舊同事幫手book,佢個同事就幫我哋book咗間什麼"7天連鎖酒店",大慨$400一間雙人房....不過後來大力上網check資料順便睇吓間酒店....無意中睇到個價錢先知原來因為交易會期間間酒店啲房先"貴咗"....原價衹係$198一間雙人房....聽到lee個震撼價...我同大家姐都好驚.....真係好驚間嘢好唔掂!又好彩都ok喎(起碼比想像中好)....不過啲房就似渡假屋多啲!

間房又真係冇乜家俬同擺設,連雪櫃都冇,真係睡房一樣!

不過張床又真係好大張吓,而且都算乾淨!

第二日我哋先搵節目玩,晨早9點幾去咗飲早茶之後就飛的去咗上下九路行,行咗一陣就去咗陶陶居食午飯,我哋叫咗出名嘅燒鵝,奶皇飽重有其他小菜好似蟹粉豆腐,什菜海鮮煲同埋果汁猪扒....又幾好味喎(可能佢煮得好香港口味啦!)

人來人往嘅上下九路.....

可能係星期日嘅關係勁多人去陶陶居飲茶,不過好在間嘢夠大,唔駛等好駛就有位!

陶陶居入面有個小魚池架.....好多小朋友鐘意喺度睇魚仔....

食飽再行咗一陣下九路就番酒店休息一陣...抖完之後就去咗搭觀光船"夜遊珠江",由於隻船上面冇嘢食,重要由7點半坐到9點於是我哋就買咗外賣上船食......坐完船再行咗一陣街街就番酒店休息....雖然晚晚十點唔夠就番酒店瞓覺,不過兩晚都瞓得唔多好(兩日夾埋都瞓唔到5個鐘!),好彩星期二朝早請咗半日假瞓啫!

 

醒神早餐!!

尋日lunch去咗supermarket諗住買生果,見到啲蜜棗(青色新鮮嗰啲)同蓮霧好似幾吸引咁(我諗點都好過屋企樓下間惠康啲爛蕉同爛蘋果!),所以就每樣買咗pack拎番公司,諗住可以當早餐食.....

今朝番到公司就拎咗個蜜棗嚟食....不過好似唔多好食....身為一粒蜜棗佢居然一啲都唔甜,真失敗.....咁都算啦,又唔想嘥嘢咪咬多兩啖先掉囉.....之但係當我無意中望吓食梗嗰粒蜜棗嘅時候....見到喺粒核附近好似有啲嘢郁吓郁吓.....初時重以為未瞓醒眼花啦.....但係再睇真啲先發現原來有條白色小蟲喺粒核附近散步.....好嘔心呀......我重樣衰到比條蟲仔嚇到大哎!攪到成村人走過嚟....真係非常樣衰!幸好條蟲係完整無缺......不過之前係咪已經食咗幾條蟲落肚就不得而知喇!!

意粉

lee排學人整幾味,有時都會同姐姐、師奶仔佢哋交流吓心得,下面嗰碟"翠玉瓜什菌炒意粉"就係佢哋嘅推介,不過得翠玉瓜同什菌好似齋咗啲,所以我加咗少少帶子粒......咪以為真帶子咁富貴,日本帶子嚟咋

!由於啲料太多要落多少少意粉(1/4袋多啲),攪吓攪吓炒咗兩大碟出嚟,要分兩餐先食得哂.....

之後食飽諗住pack番好嗰袋未煮嘅意粉.....殊不知搵極都搵唔到,淨係煮咗少少啫應該重有成袋架喎....唔通啲意粉有腳嘅?好邪呀

.......意粉呀意粉....唔該你乖乖哋行番出嚟啦!!

感同身受

今日lunch買咗麥記嘅飯tastic番公司食.....唔知係咪劣評如潮嘅關係食落又冇想像中咁肥同難食喎!橫掂喺公司食lunch冇乜細藝咪睇住she.com餸飯囉.....睇睇吓見到個好有趣嘅topic,簡直講哂我嘅心聲出嚟,我諗亦都係唔少I.T.人嘅諗法!

http://community.she.com/messageboard/index.cfm?bdid=11&topic_id=1770455

今餐食咗.....

難得今晚好早番到屋企,又煮番兩味食吓先.....

又係節瓜煎蛋....but冇乜進步添!

蜜糖豆炒雞柳.....蜜糖豆好味呀!

之後意猶未盡....再嚟多碗番薯糖水.....嘩~超飽

奪命追魂call

尋日12點幾肥師奶放咗學冇嘢做打比我,我見就嚟lunch就同佢講過幾個字lunch先再打電話比傾偈啦,到咗lunch咁啱得我一條食(師奶仔去咗東瀛遊玩,姐姐就去咗搵神呀救救我....), 橫掂悶悶哋.....就打電話比肥師奶吹吓水......嘩!唔打由自可,一打比佢就唔肯收線,我話要食飯佢都唔肯收線呀(重要陪佢講埋啲bb話同埋啲傻嘢).....本來想狠狠地收佢線,不過佢又無啦啦彈咗句"咁你一個人食飯咪好悶囉.....一個人識唔識路架......",就係lee句說話攪到唔捨得cut佢線....家陣啲細路講嘢真係好叻,好似真係好關心你咁,就係咁一路拎住個電話一路爬飯,爭啲啃死!....最後講咗參唔多成粒鐘先收線!!

今日lunch就衝咗去bank整嘢,去到bank唔夠兩個字個電話響,原來係肥師奶,佢一嚟就問我"你係咪食梗飯呀...",跟住我答"未呀有啲嘢做梗,不如遲啲打比你....",之後就收咗線繼續整嘢,但係過咗兩個字,肥師奶又打嚟問"你食得飯未呀?", 我又答"未呀,要等多一陣先,一陣再打比你".....如是者每隔兩個字肥師奶就打比我, 喺銀行嘅短短45分鐘裹面就打咗4次電話比我.....

由於時間嘅關係食唔切大茶飯於是就去咗買三文治食,買完三文治番到公司櫈都未坐曖啫又收到肥師奶電話,見佢打咁多次嚟咁有誠意就同爹陣啦,不過食三文治冇手拎電話唯有用個頭夾住個電話傾啦.....我一路傾周圍啲同事一路笑,可能我講大聲掛(佢哋笑我講嘢低能)....咁我咪細聲啲講囉....講講電吓話坐咗喺我後面嘅姐姐又笑,重話肥師奶講嘢大聲...唔係掛姐姐聽得咁清楚唔通有千里耳,後尾自閉男話我知"你開咗個speaker呀"(都唔知幾時唔覺意開咗speaker添)....吓!唔係掛講咗咁耐先提我....死啦,頭先重一路傾一路行去pantry斟水....成村人聽到我講埋啲低能嘢......好魚皮呀!!

 

 

大茶飯

今餐又咁好餸.....頭先煮咗3餸一湯嘅大茶飯.....好豐富呀!

有滑滑三色蛋

.....

肉片炒青綠韮菜花.....

滋味滷水雞翼.....

熱辣辣節瓜肉片咸蛋湯....

3餸一湯再加碗白飯.....真係飽到扣喉!!

 

你哋又覺得邊碟最得呢?不如評吓分比啲意見丫......

 

家常小炒

過咗獨居老人嘅生活都有一段時間,初頭覺得做家務係一件好煩嘅事,不過隔咗一排之後我就發覺最煩嘅事原來係"一條友食乜好呢",真係餐餐都諗餐死先諗到食乜!

初時貪方便都會出街攪掂算,不過一條友多數都係快餐店,食得多真係非常之厭,重好似冇乜益咁!其實有時都想自己煮吓嘢食,不過自己煮嘢又唔叻,整嚟整去都係嗰幾味!今日終於的起心肝用咗28蚊買本食譜"家常小炒" (重要係"菲傭廚藝班"嘅level)....由低學起,本嘢教煮嗰啲餸夠單間同方便啱哂我!

今餐想食欖菜肉碎四季豆同蕃茄炒蛋....不過本食譜都冇介紹lee兩味餸!

打電話

今朝一番到公司就晨咁早打電話比醫院社工問申請津貼啲嘢,但係我又乜q都唔知比個醫院社工點,叫我打去社會福利署嗰邊問,但係社會福利署嗰邊又話唔關佢事,就係咁社會福利署嗰邊同醫院社工推嚟推去,期間重要問埋安老院嗰個傻吓傻吓態度又差嘅彭護士,問到唔清唔楚又再要打電話去問吓食咗火藥嘅大家姐究竟之前係點攪....半個鐘打咗十幾個電話真係勁煩!

以為打完一輪電話以為告一段落啦,點知一個出名超串嘢user又打嚟問嘢,唔駛講佢嘅態度同語氣梗係極度差啦!大佬,我都係幫佢改個program啫,搵人幫佢做嘢重咁串,講嘢又九唔搭八,烚吓烚吓咁......我梗係不甘示弱串番佢轉頭啦, 正所謂先聊者賤(重咁啱撞正我今朝心情極唔靚)...咪怪我唔客氣呀!

大陸三日遊

lee幾日國慶假期又同咗屋企人番大陸玩,不過今次我哋選擇咗搭巴士番大陸,重要係晨早流流7點8搭車,由於喺二家姐屋企附近上車所以前一晚就索性喺佢屋企瞓,之前我重驚兩隻小魔怪唔知醒,但係7點唔夠排骨仔就自動自覺彈咗起身,起身嘅第一句話就係"好嘢,起身去玩喇...."...重鬼打都冇咁精神,真係比佢笑鬼死!之後肥師奶都好醒目咁起埋身,不過攪完一大輪又攪到遲哂,最後都係要跑餐死去趕車,真激死!

坐咗3粒幾鐘車終於到目的地,跟住又係好頹廢咁過咗三日吃喝玩樂嘅生活(都係同啲小朋友去游水,揸車車,買玩具同掃零食,遊吓車河,嘆吓茶同揼吓骨咁).....

今日我哋就搭船番香港喇,殊不知搭船嘅有意外發生呀,我重係受害者添.....話說住隻船就嚟到香港嘅時候,隻船無啦啦勁搖,坐咗喺我大脾嘅肥師奶已經粒聲唔出咁有啲唔對路,之後肥師奶就話"我想嘔呀...",大家姐已經好醒咁飛咗膠袋比我,好彩都接得住肥師奶啲嘔吐物,正當大家以為佢嘔完收哂膠袋之際佢又嚟過,喺毫無防避嘅情況之下抱住肥師奶嘅我當然係攪到一褲都係啦....真係好難頂呀!!