新年糕點

其實今年除咗親手整咗蘿蔔糕之外重出去學咗整芋頭糕同馬蹄糕,其實都係去工聯會學,由於太多學生實在好難一人整一份所以都係睇師傅整, 整完可以拎番屋企(其實因為肥C奶唔食蘿蔔糕所以我先JOIN呢個COURSE,可以學吓嘢之餘重可以拎啲芋頭糕比肥C奶試!!!HAHA)....除咗整糕重整咗啲曲奇同屋企人一齊食! 加埋公司派嘅美心蘿蔔糕,今年真係食咗好多糕呢!!

Alan Tam 40th Anniversary Live 2015

上星期一同朋友仔去咗睇譚校長演唱會, 嘩!之前睇咗黃子華同鄭秀文嘅SHOW已經係超開心....今次連校長都睇埋真係開心到不得了!雖然黃子華同鄭秀文碟係我心目中嘅男神同女神, 不過校長嘅我心目中已經超越神級呢, 冇人可代替, 我LIKE咗佢啲歌好多好多年喇....幾歲開始已經喜歡佢...想當年啲家姐成日聽佢啲歌, 所以我得嗰一,二年班已經開始聽, 細個嗰陣唔知乜嘢係情情塔塔咩, 不過聽落覺得啲旋律好聽就好快會上哂腦(我唔係誇大架...直到而家若果聽到好聽嘅歌我好快會記得佢嘅旋律架喇,可能喜歡聽歌嘅人就係會咁掛!)

講番個SHOW....真係冇令我失望呢 (雖然我覺得對上一次再度感動個CONCERT嘅歌更好聽,可惜錯過了唯有買隻DVD勁煲), 呢個年紀重唱到水準,聽出耳油喔! 睇完個CONCERT真係好唔捨得呀, 呢個新年假不停煲番個再度感動CONCERT呢! 若果你真係唱到80歲我都會一直支持到你80歲!!

後記: 前排二家姐話, "而家校長好似亞伯咁,而家真係唔得呀"....嗯, 可能我都唔細啦, 我接受人係會老嘅(當然好懷念以前嘅佢啦HEHE), 喜歡嘅話無論你幾歲我都一樣會喜歡!! 我相信校長嘅FAN屎永遠都會支持佢嘅!!校長加油!

再嚟生日飯...

今次人少少,不過都食得好開心呢!呢次都係我欽點食小菜呀, 好耐冇食大排檔喇, 果然夠鑊氣!好味呀!!

又話戒口?! 係架.....平時真係盡量食清啲,由其係一個人食嘅時候,真係好清架, 清到自己都悶親自己呢...不過食生日飯就即管放縱一吓啦!戒口都係為咗留番啲quota食好嘢啫!食完再戒過囉....

繼續蒸糕BELL

之前喺屋企整咗蘿蔔糕, 之但係肥C奶唔LIKE蘿蔔糕所以之前應承佢去學芋頭糕同馬蹄糕比佢食, 其實芋頭糕都唔易整架...批芋頭呢家嘢已經有難度,雖則我未試過批芋頭,之但係不朽都有皮膚敏感, 斷估批芋頭都應該係瀨嘢(對芋頭敏感嘅人,批完芋頭對手會勁痕架!!), 都係出去整等人哋準備好材料比較穩陣....

由於病病哋, 呢日全程帶住口罩上堂, 廿個同學仔一齊上堂,不過今次其實係老師一鑊過整廿幾底糕,同員就負責切吓嘢, 嗯....切嘢呢方面我真係冇乜興趣呢, 上次整蘿蔔糕已經切到好夠皮喇...所以今次乜Q都冇切呀, 最後不勞而鑊咁拎兩底糕番屋企喇....哈哈!

 

2月之星生日飯@東海

星期日約咗啲卜友仔去我屋企整餅之後再齊齊去食2月之星飯,同啲小朋仔一齊整曲奇真係好攪笑呢! 好在啲曲奇都冇失手, 大家食得好開心呢! 玩完整餅就去開飯喇...

今次都係食中菜,呢期啱哂我呢, 唔知係咪戒咗口成個月, 好恨食番餐正常飯呀, 尋日有朋友仔問我生日飯想食乜嘢? HAHA...我都係答佢"我想炒餸食飯呀..."....未食厭咩? 老實講, 唔知點解同啲朋友仔去啲long trip(大慨都係十零日左右吧), 次次食多幾日當地嘅食物大家都話厭嘅時候我又真係冇呢個感覺喎! 可能我覺得入鄉隨俗, 又唔係叫你日日食,食同一樣嘢,食足幾個月...頂多兩星期吧, 何厭之有呢?!

好耐冇去東海食飯喇....啲食物又唔錯喎! 有啲都幾特別, 好味!

祖祖生日飯@小蝶...

今年生日流流第一個活動就係搵大夫, 皮膚敏感啱啱先好番, 唔夠兩日又鼻同喉嚨發炎真吹漲, 原來以為生日可以放監食啲正常嘢, 點知又要繼續戒口...真吹啤!

呢餐本來想食泰國菜架...最後都要變陣食中式小菜,  最後揀咗去小蝶,臨近新年恐怕啲朋友仔要食好多餐中菜呢, 怕佢地食到悶所以揀呢間, 中式得嚟啲食物比較有特式唔會悶....

好滿足嘅一餐, 成個月嚟食得最豐富就係呢餐喇...HAHA!一係冇得食, 一係係咁食....第二晚又食annual dinner, 星期日又食另一餐生日飯...HAHA...不過,為免一次過食太多...annual dinner只好戒一戒口...星期日餐生日飯再食過...呢個策略係咪唔錯呢!

繼續絲襪花....

又嚟?! 係呀...話說上次整咗一朵絲襪花之後覺得好玩之餘又可送比啲長首, 所以就認頭整多一朵,反正星期五約咗啲朋友仔食飯又未夠鐘, 索性放工留喺公司整埋佢....原來一粒鐘有啲趕呢....HAHA...其實有排先交功課, 係我心急想整埋先閃....最後都趕得切整埋佢...好玩喔!黃色花花重靚, 襯哂我盆假花呢....就比我擺多陣先交功課啦!!

Mr. Robert Go.....

好快又到農曆新年喇...呢啲節日對我嚟講又真係冇乜特別, 其實農曆新年我只係會諗起"蘿蔔糕"囉...由細到大都好喜歡食蘿蔔糕, 以前有老豆同亞媽整, 重好多時都係年三一晚先整...一屋都係蒸糕味好香好懷念唸....嗯...唔知點解食出面買嘅蘿蔔糕硬係爭啲爭啲咁....所以呢幾年都嘗試吓整....不過不失啦.....希望大家都喜歡!

絲襪花

前兩日公司喺LUNCH TIME攪咗個絲襪花工作坊 (公司喺稍後會有啲探訪活動,啲絲襪花會送比啲被訪人仕), 可以學吓整絲襪花之餘又可以出一分力何樂而不為呢! 

整絲襪花都幾好玩呀....不過LUNCH整又真係趕咗少少....剛好整到一盤....其實之後可以拎啲材料番屋企整多幾盆架....又恐怕唔夠時間整多啲....最後都只可以認頭整多一盆呢!!