茶餐廳

尋晚夜晚晚10點幾先同大家姐去開飯, 我哋又攰又餓

, 諗住頭皮去茶餐廳攪掂算啦, 入到去坐低睇吓四周圍啲餐牌, 有晚餐、常餐、粥粉麵飯、多士、三文治嗰啲嘢

, 正當我哋研究梗有乜嘢食之際, 諗住問吓伙記叔叔有冇炒麵, 跟住伙記叔叔就話: 「乜都冇呀, 得飯咋…」, 大家姐就再問: 「咁三文治、雲吞麵嗰啲有冇呀? 」伙記叔叔都係答: 「冇呀, 得飯咋…」咁家姐就話要碟西炒飯啦, 但係伙記叔叔又話: 「得中式飯咋…」。情況就好似麥嘜去茶餐廳叫晚餐咁, 乜Q都無, 真激死!

由於荒原百里都冇其他食肆, 我哋唯有夾硬叫兩碟飯食啦, 叫咗碟豉椒排骨飯同斑腩飯, 後尾家姐睇吓張單, 發覺個價錢都寫錯埋! 最攪嘢係隔離嗰兩張枱搵咗第二個亞姐落單, 人哋就哎乜有乜, 炒麵、湯麵、多士乜都有

…比伙記叔叔吹漲!

 

影相

星期六肥師奶嚟咗我屋企借宿一宵,咁啱我下晝又喺度執相簿, 跟住我就拎咗我細個時候啲相比佢睇

(嗰陣我都係得2、3歲咋), 佢竟然認得出邊個係我喎, 好犀利! 後尾我又拎咗啲大學畢業相比佢睇, lee 啲咁近期當然認得我啦, 睇睇吓肥師奶重潤咗我一句 : 「乜你啲friend 全部都高過你嘅…」,  咁我咪潤番佢囉 : 「你啲friend 夠全部都高過哂你啦…」,  跟住佢話: 「我高過鄭XX 架…」車!好叻咩!

睇完相佢重搶咗我部相機話幫我影相, lee張相係佢影架, 得唔得先?

搭lift

尋日朝頭早喺屋企個lift 口等lift, 等咗一陣就有lift喇, 重見倒隔離屋個曲髮師奶一支箭咁喺部lift 度衝出嚟,招呼都冇打就跑番屋企

… 跟住我又不以為然咁入lift, 正當我諗住襟去地下之際…唉…唔係fa, 唔知邊個咁無聊襟哂26 – 28 樓嘅制 (當時我喺25樓) … 晨早流流玩lift 咁賤格

, 重要趕住搭車添! 冇辦法啦出lift 等第二部可能快啲!

正當我繼續等lift 嘅時候曲髮師奶又走番嚟, 重同我打招呼添, 佢又話好彩冇走咗部ift…跟住部lift遊完lift河之後終於喺25樓停低, 我同曲髮師奶就一齊入咗lift去地下….

查實種種跡象睇嚟襟哂26 – 28 樓嗰啲制嘅人極可能係曲髮師奶, 斷估佢係想hold 住部lift, 雖然lee 個方法都有啲乞人憎, 不過話時話識得用lee個方法hold lift又幾醒架喎!

 

相請不如偶遇

尋日放工搭梗地鐵嘅時候老趙無啦啦打電話比我,問我家陣喺邊, 咁我咪話比佢知搭梗地鐵番屋企,家陣搭到去側魚涌囉… 跟住佢話佢約咗人去銅鑼灣攞嘢叫我等埋佢一齊搭地鐵番九龍…橫掂時間尚早, 又一排冇見佢(之前約嚟約去都約唔到佢出嚟開飯), 難得佢叫到, 咁就約佢喺銅鑼灣等啦。

初頭重以為佢係為咗工事添, 原來佢去銅鑼灣交收上網bid 咗嗰啲鐵甲人

!佢一去到銅鑼灣就打電話比個三唔識七嘅接頭人 confirm 番交收地點, 跟住老趙係咁倚噏吓自己著乜衫等接頭人認得佢,接頭人話到時搵唔到咪電聯得囉…

咁我哋係地鐵站個閘口等嘅出現, 老趙話覺得個接頭人應該好型仔 (因為佢係做髮型師架

), 我即刻猛咁係度昅邊個型仔似啦, 當然係一個都冇啦

!睇嚟睇去都係得一個打扮比較潮嘅四眼哥仔喺庶 , but 老趙話個四眼哥傾梗電話唔多似係等交收。 但係等咗一排都等都唔覺有可疑人物出現喎, 等吓等吓都等咗十五分鐘都唔見人, 老就打比接頭人囉, 車! 真係個四眼哥仔聽電話, 真吹漲!

小小嘢都做唔到

唔知大家有冇過比人話:「小小嘢都做唔到!」, 尋日我就比咁話喇, 話說尋日係大家姐嘅牛一, 佢約咗我同亞媽重有大力去荃灣食飯, 去到見到見肥師奶又坐咗喺度

, 原來排骨仔第二日要考試, 所以二蔗弧叩亞媽帶埋肥師奶出嚟, 費事佢阻住哥哥溫書喎!

食到咁上吓, 肥師奶無啦啦停哂手, 跟住就同我講:「我想去洗手間…」, 之但係嗰個係踎厠我著住條裙唔多方便帶佢去, 咪諗住叫家姐帶啦, 好明顯家姐采我都傻啦, 肥師奶見到我喺度hea, 唔想郁咁, 就話:「小小嘢都做唔到,咁渣架你…」, 估唔到比個5歲都唔夠嘅靚妹咁串法, 激死人喇~

之後我梗係不甘示外弱啦, 勁串番佢, 佢夾唔到餸、著唔到件外套, 我都話番佢:「車!小小嘢都做唔到…」,死未!

Your show time ……

今朝晨早流流9點半就去咗開會, 原本個會係要媽媽去架, 不過咁啱媽媽要開第二個會所以叫我去頂… 唉!比媽媽撇甩咗, 得番我一條友去, 淨係對住香港啲user 都已經唔知要吹啲乜, 重要搵埋星洲人開 conference call ,  全程英語對白又冇字幕想恰陣都唔得

。

最樣衰係佢哋想駁部notebook去個projector 嘅時候整極都唔得, 跟住logistic 嗰個亞姐就望住我噏咗句 : “Your show time…”(查實lee位亞姐次次開會都係咁，有乜電掣or電器用唔到都係超住我跟住噏句咁嘅嘢), 聽到句咁嘅嘢皇唔拿拿聲彈起身扮幫手咩

, but我十年都冇嗰間房開會鬼知啲掣插去邊咩,　睇完先知原來條cable 淨係駁咗去部notebook度都冇駁去個projector度, 唔怪得整極都唔得啦!

之但係又搵極都搵唔到個掣喺邊 , 好似低能仔咁周圍搵，最後都係搵唔到放棄咗，勁煨．．．唉！其實我想重申一次，做IT唔係真係乜嘢電器都識整架，而且我係負責寫program 同埋做application support架咋，唔係hardware support 呀!

 

 

拜拜喇愛駒

今日下晝同咗大家姐同亞媽去旺角買金飾, 見lee排金價高企, 我順便拎埋幾年前annual dinner 抽到個隻金馬去賣呀, 不過盒嘢個盒都重重哋, 拎住周街行幾粒鐘都好甘吓!

我哋2點幾開始行, 唔覺唔覺我哋喺旺角行咗參唔多5粒鐘, 睇完先知原來家陣啲龍鳳鈪同錬有咁多款式而且幾靚添喎, 睇到眼花撩亂, 最後家姐都去咗周生生買龍鳳鈪

。

哈!咁啱我隻愛駒又係周生生出品, 跟住我哋就叫sale 屎哥哥幫我哋賣咗佢, 於是我哋就用隻馬去換龍鳳鈪, sale 屎哥哥就拎咗我隻愛駒去磅重, 話時話我都唔清楚隻馬仔幾重, 我淨係記得幾年前嘅市值大約8千蚊(計埋手工)…嘩

!唔講真係唔知原來隻馬仔都參唔多有2兩架, 家陣賣出去扣埋手工都唔只值8千, 發達喇…家陣先知原來"金"真係咁保值架

!

園丁

尋日同姐姐食lunch嘅時候, 姐姐講起佢屋企嗰盆蘭花好似謝謝地, 話時話種蘭花lee家嘢我都知小小架, 我重扮哂專家咁話比姐姐聽應該點種會好啲添。其實我屋企都種咗十幾盆唔同品種嘅蘭花架, 洋蘭同國蘭都有, 近排盆拖鞋蘭重開花添呀, lee盆花通常都要等兩三年先開花架, 好難得

!

查實lee啲蘭花都種咗十年有多, 之前係老豆種落嘅, 後來老豆唔喺度我就做咗園丁負責照顧啲花,對於一個從來冇種過花嘅人嚟講一下子要照顧十幾盆蘭花、四盆紫羅蘭真係拗哂頭架

, 就連隔幾耐淋花、施肥都唔知, 又以為冇乜難度求其淋吓啲花就算… 唉! 唔夠三個禮拜姐就已經有兩盆紫羅蘭比我淋死咗喇, 有啲蘭花嘅葉又無啦啦生咗啲白色一點點嘅嘢(後來睇書先知嗰啲叫"介殼蟲")

。

喺咁多嘅打擊之下我終於的起心肝, 去書局搵啲關於種花嘅書睇, 唔睇真係唔知原來蘭花真係有好多品種架, 有成過萬種, 所以大家千祈唔好問我屋企種嗰啲係乜品種,種蘭花同紫羅蘭嘅方法又唔同架喎,早知晨早就搵本書睇吓啦,嗰兩盆紫羅蘭就唔駛白白犠牲

!睇完書果然係唔同啲, 起碼知應該點種, 種種吓啲蘭花同紫羅蘭都有開花。

就係咁一種就種咗3、4年, 不過早兩年公司超多嘢做, 晚晚十點幾先番到屋企冇時間打理啲花, 我就將園丁lee個重任交咗比亞媽lu。亞媽種蘭花都有一手架, 不過種紫羅蘭就…唉! 一時睇漏眼, 上兩個月連最後嗰盆紫羅蘭都瓜埋呀,好心痛!

 

放榜

前排同師奶仔讀嗰個logistic course,自從一月尾考完試之後就冇哂消息咁, 若果唔係師奶仔問我收唔收到消息我真係醒唔起有lee樣嘢,不過其實我哋唔係緊張啲成績,我哋淨係想拎番張嘢去claim 錢姐

。於是上個禮拜師奶仔就打咗去問, 個姐姐仔話考完試要等兩個月先至有消息喎, 咁就唯有繼續等啦…

殊不知尋晚番到屋企就見到張摺到好似梅菜咁嘅成績單擺咗喺枱面,無啦啦又咁快寄到嚟, 真係冇乜心理準備!拿拿聲拎張成績單睇吓先… 嘩! 好堅! 攞"A" 呀

, 真係九十幾年冇攞過A! 查實都係多得亞sir,佢真係冇得頂,毫無保留咁放水,慌死我哋唔合格咁款,唔係靠佢啲貼士真係唔駛旨合格, 不過我都開turbo苦讀咗成晚架! 斷估其他同學仔都同我一樣咁鬼"好"成績!

後尾再睇番張成績單個issue date, 車! 張嘢係3月1 號issue 架喎, 就算飛鴿都唔駛一個月先飛到嚟啦, 個姐姐仔叫我哋等兩個月未免誇張咗小小喎!

 

「儂」

尋晚好難得咁請咗lu lu, 骨妹, 山潺同小李食飯,對上一次請佢哋食飯真係N年前嘅事,咁難得梗係要寫低佢啦!之前小李提意去食北京填鴨, 但係諗嚟諗去都諗唔到去邊度食好, 最後山潺提意咗我哋去尖沙咀嗰間叫"儂"(個名真係好奪命吓) 嘅京川滬菜館開飯, 跟住我就拿拿淋睇吓openrice 冇乜comment, 睇落都好似唔錯, 又不妨一試喎…

唔知係咪尋晚week day嘅關係, 間嘢真係好冷清吓, 不過都好起碼唔駛等餐死!but 當我哋叫哂嘢食之後先發覺原來用匯豐卡簽脹滿$200送石頭飯, 我哋5條友實食到$200啦, 於是問伙記做乜唔早响, 佢竟然答:「係架,我哋唔講架,你哋要自己睇架…」, 今時今日咁嘅服務態度真係

…我哋當然都唔執輸叫佢送埋啦!

之但係尋日下晝咀神又係好難得咁請食tea,忍唔住口食咗件多士, 夜晚個胃重頂住頂住咁, 所以尋晚食咗小小經已好飽吓, 不過啲食物都算唔錯,埋單都係5舊水,比我想像中平添!

十年不變

尋晚又約咗中學啲同學仔出嚟開飯, 同上次一樣約咗慧慧, 亞心, 亞霞同Fanny, 慧慧啱啱去完日本honeymoon

番嚟,重幫亞心同亞霞買衫同袋添!

亞心一嚟到見到慧慧幫佢買嘅T-Shirt已經非常之開心, 之後慧慧又拎咗個袋比亞霞睇, but亞霞好似唔多like個袋咁, 慧慧問亞霞: 「係咪唔鍾意呀,其實我都鍾意個袋架,你唔要我要番囉…」, 亞霞猶豫梗之際,亞心昅到個袋就愛不釋手,一手拿咗個袋去試添, 重話: 「亞霞唔要我要呀,不過家陣冇錢分期付款得唔得呀

…」。慧慧見到又心郁郁想自己要番個袋, 又拎住個袋左試右試唔肯比番個袋比亞心, 又猛問亞心: 「你係咪好鍾意姐? (問咗十幾廿次), 不如我用兩個月之後再半價賣比你喇

…」。

佢哋就係咁為咗個袋爭咗成晚,似爭仔咁比佢哋吹漲! 不過lee個情景自從中學畢業後都冇見過喇, 好似番咗去中學時代咁, 佢哋啲性格重係一啲都冇變, 好攪笑!