我的小小目標

今日有好多好吸引嘅團跑，不過最後都係選擇去青公自修一吓半馬，睇番紀錄原來我冇試過正正經經練習過—次半馬呢！未JOIN跑GROUP之前我都有目標架....2:15內完成半馬, 自從識咗班瘋狂跑友後, 我個目標無啦啦變咗2:00....真係多謝跑友們睇得起我呢, 一於試吓呢個目標先!

Yeah....原來只需努力做，我都做得到！雖然抆水咗少少，都總算兩個鐘內完成了！希望渣馬會有更好嘅時間啦!

尖東燈飾跑

好耐冇睇過燈飾喇, 今年識多咗啲跑友又JOIN咗團跑, 重有啲跑友攪燈飾跑, 真係幾過癮喎! 雖然尖咀不嬲都勁多人, 不過我哋盡量避開太多人嘅地方,都總算冇人走失! 成班人邊跑邊影相邊睇燈飾輕輕鬆鬆就10K...好玩!

 

 

第一次30K之旅

 

話說幾個月前同跑友約定30K之旅, 嘩!大拿拿30K喎, 開完張空頭支票都驚驚哋呀, 就咁又過咗幾個月喇...我呢最多跑到26K咋....咁30K之旅又幾時先可以完成呢, 唉!呢排重要病鬼埋添!

 

之但係我未死心架....真係好想喺12月完成呢個宏願, 好想話比自己知我可以完成30K, 更可以完成全馬呢!前幾日見到個GROUP有EVENT跑大棠加南生圍, 去大棠睇紅葉喎,而且個路線又夠30K ! 又唔錯呀, 一於去玩吓啦!

 

就係咁, 今日我展開咗30K之旅...唔係掛, 落雨.....好凍喎, 重幾大雨添...不過大家都好堅持跑落去!! 好在去到每一個景點都停咗雨, 可以影番幾張相留念! 去完大棠就去南生圍, 唔覺唔覺原來已經廿多K, 喺南生圍食個麵再回程...食飽上路特別有力, 回程都唔覺太攰呢! 跑到最後先發覺原來爭一K先可以夠30K呢, 幸好跑友陪我跑多一K完咗我30K之旅!

再嚟海鮮站...

呢個星期病咗成日玩自閉, 得星期五同星期六出嚟HEA咋....之但係瞓極都好似未回魂一樣....KEEP住瘟瘟燉燉, 食飽即閃....

 

次次年尾同卜友食飯都唔齊人, 今次都唔例外呢, 希望下次齊人啲就更好玩喇!

BBQ with running buddies....

一提起"跑友"呢兩個字, 好多人都會諗起跑步...其實呢...好多時我都係齋食唔跑架...好似星期五咁, 大伙兒齊齊去咗屯門BBQ, 其實都有跑步環節架....不過放工去到實在太趕唯有齋燒唔跑啦!

 

其實呢....我哋位位都係夾咗$160咁大把(一共16人咁上下), 之但係唔知點解可以買到成村人都夠食嘅份量呢, 最慘嘅係....我病咗成個禮物....去到又乜Q都唔食得咁滯 (我真係燒咗好少嘢咋, 好彩有燴魚同蔬菜可以食), 最後我哋個個又食又拎重要送埋比啲婆婆先清哂啲食物咋!!

綠茶紅豆蛋糕...

呢個蛋糕好想試整咗好耐, 尋日終於的起心肝整喇, 如果實驗成功又可以整比朋友仔食, 之但係可惜唔夠綠茶味，尚有好多改善空間, 搵多個食譜試吓先!

聚舊...

呢位舊同學真係好耐冇見喇, 闊別十年佢已經有兩位小朋友喇, 第一次見呢兩位小朋友當然要去小小禮物仔比佢哋啦, 加埋前一晚上堂整嘅CAKEPOP做見面禮,見到佢哋好開心呀!

 

呢兩個小兄弟好可愛呢, 哥哥斯斯文文, 細佬活潑可愛! 佢哋打兵乓波重好叻添呀, 期待下次再同你哋玩呀!

 

大東山

 

星期四又清吓假先, 說好的大東山終於成行喇, 今次我哋喺東涌飛的去伯公拗包冇死喇! 終於搵到起點, 其實呢個山都幾甘架...對於我呢啲十年都唔行一次山嘅人嚟講真係見到都驚驚哋, 家因佢上山條路全石級咁滯,啲石級重要好高....真係驚PK! 而且...我哋冇人識路, 我其實勁驚迷路囉(好在佢一條路咋)! 不過中途有行山人話山頂好大霧勸我哋唔好上山, 我哋唯有轉戰爛頭營啦.....可惜呢日天氣真係麻麻(勝在唔熱囉,不過上到山好鬼凍又大霧乜都影唔到!)....去到我哋坐咗陣食咗少少嘢見到啲霧殺到嚟即刻雞咁腳走人...

終於碌到落山喇....落到山諗住搭巴士返東涌,點知巴士架架都客滿飛站,的士又架架都有客,我哋唯有試吓截順風車啦,點知又真係有位好心司機肯車我哋同埋另—pair行山人仕返東涌,非常感激呢位司機叔叔呢,唔係我哋都唔知要食西北風食到幾時！

由於同事話行完山腳仔腳加上又未夠鐘食飯大把時間HEA...最後齊齊去咗足君好齊齊按腳..HAHA...順便接埋肩頸, 超爽呀!

Run for Fun (24 round)

又JOIN團跑喇, 我呢啲懶人WEEKDAY唔JOIN團跑真係唔會跑架喇, 夜晚晚一條友跑青公又好似有啲危險, 跑第二度咩又唔多識路,JOIN團跑又可以試新路又可以一齊SHARE吓跑步心得都幾好吖! 本來今日係嚟RECOVERY RUN嘅,點知回程嘅時間啲院友又病發跑得超快! 結果我又係HEA咗喺中間唔快又唔慢嘅位...好在前前後後都有跑友唔怕盪失路啫!

三聖海鮮之夜

 星期一又約咗啲跑友去開飯, 今次去三聖村食海鮮,其實我都係第一次去三聖村呢, 由公司出發去三聖村足足粒半鐘呀, 又地鐵又巴士再要轉車...好在有跑友帶路, 8點鬆啲就去到喇!

 

一去到跑友們已經飯緊酒喇...嘩!支支都威士忌, 咁鬼激見到都驚驚地, 我飲咗一小杯勁加冰嘅威士忌都冇飲喇, 乜都未食就飲已經唔掂檔,重要係烈酒真係算罷啦...我都係安守本份食海鮮好喇! 啲海鮮係跑友喺旺角買入三聖煮架....又平又靚....飽到上心口呢!我哋重順道賀一賀十二月之星嘅生日...好高興喔!