佳句

以下係尋晚我同六舅父嘅對話

.....

六舅父: 「有冇攞個電子咪嚟試?」

亞祖: 「拎左喇, 但係唔知點解用唔到....」

六舅父:「 點解用唔到呀,我見人好易用咋喎,應該有得教大細聲,可能冇得教大細聲,一係有一係冇.......應該好簡單,可能得一粒掣或者兩粒掣.....」

亞祖: 「唔知係我哋唔識用,定係個咪壞壞哋....」

六舅父:「可能係個咪壞咗, 一係就唔識用 ....」

問你服未.........我真係對佢五體投地!!佩服佩服!!!

 

 

 

又試

今朝晨早流流8點半就起身,因為今日又搵咗個印傭9:30嚟試工,試咗幾個之後我哋家陣唔敢約咁早,之前嗰啲約9點喺我屋企樓下等,但係個個都晨咁早8點半就到咗(試過有個重8點到添),真係瞓都未瞓醒就仆落街迎接!!果然不出我哋所料,今日嗰個9點真係就到咗,真係時間啱啱好

!!

不過今日嗰個都算經典,一嚟叫佢幫手買餸,重已經講埋比佢知要買乜,但係去到街市佢真係一臉汒然,我以為佢人生路不熟啫,點知佢同我講...."我唔係好識買餸....",

吓?!之前重話做咗4年印傭架喎!咁都算啦,我問佢咁識唔識煮飯,佢又話唔係好識,咁我又再問佢咁你平時做開啲乜?佢又答,佢淨係照顧個伯伯,全屋得佢同伯伯住(但係都唔識買餸同煮飯),佢又話個伯伯自己識行識走,唔駛點攪...咁佢平時即係做乜呢....好拗頭...

既然叫咗佢嚟梗係乜都叫佢試吓做啦,但係.......我諗我真係做得好過佢....佢用咗兩粒幾鐘煮飯(3樣好簡單嘅餸油菜,老少平安,肉餅),食餐lunch好似去飲咁,食完一味餸要等半粒鐘先上第二味.....咁都算啦,叫佢清潔厠所,佢刷都唔刷吓個屎坑,淨係用布探抺吓個屎坑嘅出面,頭皮抺咗十零分鐘就話抺完.....連熨衫都唔掂

(唯一建樹就係執吓房啲雜物)!!唉!簡直係嘥大家時間.......

奇境

頭先番到屋企諗住淋吓擺喺厨房出面啲蘭花啦,點知見到一個奇境....就係有盆垂死嘅蘭花(其實盆花已經係死咗9成)竟然長出2條新芽,重一嚟就已經大大棵添

.....之但係睇真啲又好似好唔對路,嗰兩棵嘢嘅根飛哂出嚟, 唔係插喺啲泥度, 而且啲葉一啲都唔似蘭花嘅?? 唔知大家睇唔睇得出lee盆係乜呢

.....話時話我都要諗咗一諗先知lee盆嘢係乜東東!

估到未呀? 其實.....lee兩棵就係......"蔥"嚟架......真係非常拗頭,唔知乜水無啦啦插兩棵蔥喺盆蘭花度,斷估大家姐同大力都應該做唔出lee個咁頂隱嘅行為!最可疑嘅疑犯應該就係星期日嚟試工嗰個印傭....可能佢誤會咗啲蘭花係蔥掛!!!

不過橫睇掂睇啲蔥一啲都唔似蘭花架喎.....好明顯左邊嗰棵先係蘭花......真係比佢激奀!!

 

 

今晚食乜餸

今晚番屋企途中諗梗今晚食乜餸嘅時候,又諗番起屋企嗰兜冷飯,諗諗吓都係番屋企食埋啲冷飯算喇(好似好慘咁

),但係兜飯真係名符其實嘅石頭飯,硬到不得了, 真係掟死狗架.....唉!又唔想再食炒飯,好似好熱氣咁.........若果煮餸又煮唔切,已經9點幾,再要煮餸就變咗食消夜!

於是我就去咗屋企樓下間惠康買舊節瓜,1 pack 四海魚蛋, 1 pack 火腿.....估唔估到我想整乜呢?無錯....就係湯飯喇(本來想買冬瓜,但係惠康冇lee家嘢).......咪睇兜嘢唔多靚仔,查實都幾好味架

,因為....我加咗一罐史雲生雞湯丫ma

......

 

大鑊飯

尋日又約咗另一個印傭試工, 咁我又循例咁叫佢買餸煮飯,又係循例咁雞同鴨講(可能係我理解力同領悟力低掛,成日都聽唔明啲印傭噏乜

)....好似尋日咁個印傭煮煮吓飯,無啦啦問我有冇"茶",我咪話有囉,我重指住個熱水壺比佢睇...但係佢又擰哂頭咁,跟住又指住隻生雞蛋話lee個要用"茶".....

真係拗咗一陣頭先估到原來佢要用"叉" 發蛋....次次好似估謎語咁.....好低能!!

見佢好努力咁做嘢,上晝又得我一個喺屋企,唔好意思成日監察佢

(之前大家姐喺度幫手睇吓, 多個人睇冇咁礙眼),就係咁就出事喇!!!其實佢煮嘢之前我已經同佢講咗下晝得我同大家姐食飯,計埋佢都係得三條友食, 但係唔知佢做乜鬼佢煮咗9個人嘅份量

,尤其係啲飯嘅份量,真係要9個亞祖先食得哂,非常之出事!!!好在之前陪佢買餸啫(其實我都覺得買多咗, but買多啲菜都ok 啦),如果唔係重出事!!!最慘係佢啲手勢真係麻麻,好似夾硬啃咁!!!

尋晚已經炒咗成大碗飯食,飽到反肚

...但係都祗係食咗1/4咋,重有大大碗飯喺庶....都唔知點食,又唔想嘥嘢,but擺得太耐又唔多好,唔通真係要帶飯先得....真係拗哂頭!!!!

 

 

 

 

 

希望工程

今朝晨早流流起身(早得嚟都已經10點)就開始執嘢,又執

......不過今次執得非常之甘,要將我間房嗰張床(重要係碌架床)搬去另一間房,之但係我間房又真係勁勁勁多雜物,真係有排搬

......

頭先執完一大輪都淨係將部電腦由房搬去廳咋(所以家陣係廳試梗機),間房重有成堆嘢要執,唔知點解張床咁細我都可以塞咗一大堆嘢,好堅!!

......之後重要拆咗張床再搬去另一間房, 搬完又要砌番好....唔知lee個希望工程幾時先可以完成呢

 

午夜凶鈴

尋晚唔知做乜喺屋企hea吓hea吓, hea到成點鐘先瞓, 真係一撻落床就瞓著

........但係瞓到參唔多3點嘅時候我個電話無啦啦响,比個電話嘈醒咗但係已經收咗線, 隔咗一陣(幾秒咁啦)個電話又响過,我諗唔通有緊要事(但係照計又應該唔會有乜緊急事掛), 咁即刻爬落床聽啦(好慘個電話重擺咗喺廳,我瞓上隔床架

), 但係爬爬吓落床又收咗線.....由於實在係太攰嘅關係我都係爬番上床繼續瞓

....

但係再隔多一陣, 個電話又响過,又嚟(lee次真係有啲淆底,唔通有乜緊急事搵我

).....今次用咗9秒9 爬落床聽電話,個電話又飛咗去留言信箱.....但係聽番個voicemail又淨係得一埋雜聲....咁咪睇番之前啲來電顯示囉....車!個電話號碼都唔知乜水嚟嘅,九成係白撞,等我重驚餐死!

最慘係爬咗落床之後成個人醒哂,喺張床邊典嚟典去都瞓唔番......4點幾先恰著咋! 今晚係咪應該要熄電話瞓好啲呢?

 

敷衍

尋日朝頭早發現喺System嗰啲job唔郁, 好多嘢都行唔到,咁我咪又問吓星洲啲DBA 囉,但係佢哋又猛話冇同事, 不過之後佢哋都攪咗啲嘢又得得哋咁, 過咗一弭又死過, 於是再問星洲人,但係答案一樣"冇事呀"....唉!嗰陣都參唔多6點,最後都放棄等今朝睇吓得唔得!!

其實今朝都已經有心理準備啲job又係行唔到架喇, 斷估lee啲問題唔會瞓醒一覺就冇事掛!果然咪係繼續死落去!唯一解決嘅辦法就係搵番嗰班唔會幫手嘅DBA幫手(真係非常矛盾

).....

姐姐就幫手搵吓嗰邊嘅老細幫手叫DBA check 吓啲嘢, 但係唔搵由自可一搵就真係把幾火, 嗰邊個老細淨係識叫人唔好run 嘢同cancel 啲job, 一係就噏埋啲都唔合羅輯嘅理由話賴我哋啲job有問題, 咁我哋梗係反駁佢啦, 佢唔夠講又話啲嘢係DBA講嘅.....頂!如果係DBA講嘅嗰個DBA都好有問題,至於個老細.....DBA講完比佢知,佢諗都唔諗就咁同我哋講埋啲廢話, 佢都非常之堅

.......

大件夾抵食

由於今日lunch time要開完會嘅關係,攪到下晝兩點鐘先食lunch,橫掂lee個時間食嘢都唔駛等位,姐姐就提意去西灣河食日本嘢,佢話之前去過食嘢啲嘢大件夾抵食....講到咁吸引....我哋就決定去試吓,就係咁我同姐姐,咀神,palm神向西灣河出發!

我地4個人點咗一碟炸蠔,雞軟骨,炒飯,三文魚刺身 , 甘蝦,帶子,象拔蚌同唔記得乜嘢魚嘅壽司 .....啲嘢食又唔係貴(quality 都ok), 啲壽司係平時size既2-3倍（尤其係舊飯真係勁大到好似飯團咁）.....真係食到勁勁勁飽......食食吓重比咀神影咗個勁樣衰嘅食相添,為咗唔好影響市容我一定唔會post lee張相出嚟,大家可以放心!

跟住夜晚又去咗二家姐屋企食飯,lunch嗰餐都未落格又食晚飯喇，查實得幾條友食飯，但係煮咗４大碟餸,碟碟都好似座山咁大,好鬼堅

!!!隊完啲餸,二家姐又叫個工人倒幾碗湯比我哋飲.....連啲湯都係用湯碗裝,隊埋碗湯真係飽到郁都郁唔到.......

最慘係已經飽到唔郁得架啦,肥師奶同排骨仔重叫我陪佢玩拋波波同埋大兵步操(15/16嗰個遊戲),肥師奶重喺度玩對聯添"15/16唔玩唔舒服，亞仔(我個花名)今日去咗買猪肉",係咪好好文彩呢!!!

 

習慣

尋晚放咗工冇特別嘢做,一心諗住早啲食飯早啲番屋企可以早啲休息.....不過唔知係咪lee排慣咗9點幾先食飯,7點幾8點竟然食唔落嘢.....終於都係hea到9點先去食飯,非常之變態!

以前過咗夜晚10點就乜都食唔落,12點前一定要瞓覺.....但係近幾個月lee啲習慣都不知不覺咁改咗, 家陣9點幾10點食飯已經係閒事, 12點前瞓都好有難度, 家陣我先知原來幾十年嘅習慣可以喺三個月內改哂....好堅

!!

節瓜煎蛋

今朝10點幾起身諗住去惠康買嘢煲湯,諗住煲彿手瓜湯,唔知係咪早得滯, 亞姐pack唔切啲湯料,咁唯有自己買材料啦.....横掂都買開嘢,就買埋luch嗰份順便整埋! 好耐冇食過亞媽整嘅節瓜煎蛋喇 (可能好多人都未食過,亞媽話鄉下好興lee味餸架).... 好!就試吓整啦(lee個應該易整啲).....最後就買咗一舊節瓜, 重買咗埋菜心番屋企整....

本來以為節瓜煎蛋好易整啦,不過原來都幾花時候架, 淨係切節瓜絲都切咗好耐, 啲蛋撈埋落啲節瓜度又好難煎到一餅餅喎......比起亞媽整嗰啲真係爭啲(不過都有7成似架).....