繼續...嫺言嫺語: 3月 2007

2007年3月31日星期六

植樹日

繼上個星期同肥師奶去農場參觀後,今日又去咗植樹,不過今次就好齊人喇,除咗二家姐一家人之外重邀請咗肥師奶個朋友仔亞June,我哋一行六人晨早9點就喺青衣集合,然後坐旅遊車出發.....

出發前影張合照先,個個都幾醒神..........

大慨11點幾就去到大欖郊野公園,之後我哋就拎住大會提供嘅樹苗行上山,由於今日天氣好熱,短短半粒鐘程路程已經覺得相當之甘!真係熱到爆炸,我拖住肥師奶行上山,佢一路行一路口噏噏咁話......"好攰呀,撐唔住喇,點解植樹啫,植乜嘢呀植...",又難怪嘅連大人都覺得難頂,何況係細路仔,好彩行到上山又啲風吹吓啫!

今朝真係勁哂....帶帽都唔掂..........都係熱死咗.......

終於行到上山頂,不過唔知係太多人定係地方太小呢,冇乜地方種樹喎!

植完樹我哋又繼續下一個行程就係去富豪機場酒店"食buffet", lee個亦都係肥師奶去植樹嘅目的!食飽飽之後二家姐佢哋就繼續餘下嘅行程(好似係去機場附近參觀),我就要番屋企準備stand by support....真慘!

大會重提供咗啲好啱小朋友嘅活動,可以一路食buffet一路玩, 肥師奶就喺隻肥手仔度劃咗隻kitty...

重有復活兔派朱古力蛋比小朋友......啲小朋友見到不知幾開心!

重有吹汽球扭公仔...個粉紅色波波花好得意架....

打機小皇子

尋日喺打機小皇子嘅last day,唔覺唔覺原來佢喺度做咗1年零10個月,雖則我喺lee間公司嘅年資係佢嘅3倍,不過佢喺度識到嘅朋友仔比我多十幾倍,佢嘅受歡迎程度可以話係歷年之冠....除咗因為佢為人nice同經常笑面迎人又樂於助人之外,俊朗嘅外表亦都為佢帶來唔少fan屎....怪唔知得我冇fan屎啦.....

一路順風喇打機小皇子....記得得閒寫信番嚟呀....(不過尋日放工趕住走唔記得同佢say goodbye添!)

2007年3月30日星期五

等...寂寞到夜深....

今晚又要踎喺屋企做standby support喇, 要stand by 到夜晚12 點....唉!公司個system今日好唔生性,無啦啦瓜咗重足足瓜咗半日,放工嘅時候個system都未番生,重係生死未卜,我都知今晚做support實死梗架喇

....

不過結果都比我想像中好,淨係得一個call重係"誤鳴"嗰度,之後我叫user試吓再覆我....可惜我由10點幾等....等到11點都未有消息(又唔好意思催得user咁密)...終於等到11點幾頂唔順再打電話

比user問佢乜情況,佢話一陣先覆我.....咁我又繼續等....攪到我連沖涼同去沖廁所都唔敢

.....終於等到12點....user都係未覆! 正所謂過咗海就神仙...過咗12點我即刻標去沖涼...唔鬼等喇

.....

由於要做stand by support嘅關係,連大茶飯都唔敢整,頭皮煮個鳥冬食算喇....唔知lee碗嘢乎唔乎合3+2+1比例呢!

2007年3月28日星期三

腐竹薏米雞蛋糖水

無驚無險又到12點....好嘢,今日stand by support好鬼平靜,正

! 難得今日一放工就即刻番屋, 見踎喺屋企冇乜細藝,所以又玩吓煲糖水....

lee個就係新嘗試"腐竹薏米雞蛋糖水",我諗雪凍佢應該重好食

.....

係喎希望今晚lift口個警鐘唔好再傻落去,可以比我瞓餐飽

....早抖喇咁多位

2007年3月27日星期二

火燭驚魂

尋晚半夜三點幾,瞓到矇矇矓矓之間無啦啦聽到警鐘响,重係勁嘈嗰度,好明顯係喺lift口傳出嚟....嘩!...嚇到我即刻彈起身,心諗死啦會唔會火燭架!

我即刻用9秒9碌落床再開門睇吓發生乜事啦,點知出面又好平靜喎, 人影都冇隻,又冇人出嚟八!莫非祗係有人困lift? 不過都係問吓護衛叔叔穩陣......之但係搵極都搵唔到樓下護衛叔叔個電話!又見周圍都冇乜動靜,都係靜觀其變先....就係咁過咗十五分鐘,個警鐘依然响梗.....重係冇停過嗰度....我又諗唔係喎困lift又無理由响咁耐架.....好唔對路喎!