班蘭小蛋糕

搬咗屋之後都係不斷咁執嘢同執嘢, YEAH...我啲嘢終於執得八八九九喇!難得星期六可以喺屋企hea（搬屋前後都好忙，好似好耐都未hea過！）個廚房都開始正常運作喇。。。。等我都整番轉cake先。。。搬咗之後最大嘅好處就係買材料好方便！

 

無啦啦又想食斑蘭蛋糕，又真係比我喺街市買到班蘭葉，正呀！嘭嘭聲整啲斑蘭蛋糕仔先！新廚房真係攪到有啲呢ＨＥＡ，連個＂孤寒刮＂都搵唔到，最後搵咗個＂飯殼＂頂住先咋，好在都冇出事！有驚無險！

 

清涼團跑...

 

星期五又約咗團跑, 呢期幾乎每個星期都約團跑呢, 團跑又真係幾好玩, 好玩在可以去唔同嘅地方跑, 總好過單拖去跑唔識路真係跑嚟跑去都係嗰啲地方!同其他人跑又可以傾吓偈, 跑完又一齊食吓嘢, 好開心架!呢晚天氣真係好正(上次曬傷咗真係唔敢跑早抖住喇, 等再涼少少再跑早抖, 而家都係跑黃昏同夜晚時段好喇!

呢次我哋跑中山紀念公園-->西環--> 中山紀念公園 --> 中環--> 金紫荊廣場 --> 中山紀念公園...原來咁跑都有14K喎....呢晚天氣太爽, 加上成個星期冇跑好想跑吓, 跑跑吓重跑快咗....有啲位竟然去到3點幾彼醒...真係好似衝圈咁....難得做吓快腳....全程勁爽! 最LIKE跑海邊, 搵日自己去跑吓都好! 最正嘅係呢晚清爽有微風, 跑得好舒服, 咁啱跑完先至落狗屎, 沖完涼就停哂雨可以慢慢行去食晚飯喇(應該係宵夜先啱HAHA)....

 



 

Buffet@Langham Hotel

 

 "食餐好"似乎成已經成為我嘅口頭禪...HAHA....大家一定覺得我好為食啦...嗯...你都啱一半啦!! 我確係可以好為食, 不過唔係經常係囉! 其實前排有個識得我耐嘅朋友仔同我講...."見你而家食番多啲嘢真係好喇!"....係呀...有段時間真係連食嘢都冇心情, 我喜歡食嘢架,不過要心情好身體狀態好先係囉! ......若然我心情唔好又或者病鬼咗,你叫我食九大簋我都唔會采你(通常呢啲時候真係食乜都冇味的)....胃口好嘅話麥記呀譚仔呀乜鬼都食一大餐,仲津津有味添!

查實我本身唔太揀飲擇食, 乜都可以食一大餐, 其實同啲朋友仔開飯嘅話我真係食乜都冇所謂, 我成日覺得"同邊個人食" 比 "食啲乜嘢"更重要呢!! 若然同好友食得真係相信食乜都開心架! 不過我啲朋友個個對食都好有要求, 所以我POST啲相出嚟大家成日覺得我去食好嘢囉...其實....真正係"我啲朋友成日食好嘢先啱"HAHA!

今餐我又有冇胃口? HMMM.....超.....級......飽囉!好味!

 



烈陽神功@青公

真係人都癲呀, 乜解救次次約跑友晨跑都熱到痴肺架....星期六又係咁...明明7點半起跑, 出發都好地地...點知回程又曬死咗....大佬呀, 8點幾啫都曬燶咗,激死人喇!!

 

燶都未算最慘, 我至怕係皮膚敏感咋...所以我每次都盡量包到自己實一實...你睇..下面包到成個恐怖份子嗰位就係我喇....淨係得留對眼咋, 我唔太喜歡帶眼鏡所以冇買黑超呢....點知就係咁樣出咗事....番到屋企發現眼部周圍又乾又紅咁重出咗粒粒又痕又乾....又敏感喇......救命呀....已經拿拿淋急救(媽屎+補濕cream), 希望快啲好番....短期內唔敢跑朝早喇...太可怕!!

8月喇星飯@川上龍

星期五又同咗幾位朋友仔食8月喇星飯, 難得今次去食四川嘢....其實8個人之中真係食得辣嘢嘅好似得兩三個人咁...haha! 不過...其實我哋都係叫微辣或普通辣(嗯...坦白講啲水煮牛肉同雞煲....我真心覺得冇乜味....由其係個水煮牛嘅普通辣,我覺得譚仔十小辣重辣啲重夠味啲)...

 

其他唔辣嘅菜式祗屬一般...haha...無啦啦好似寫食評咁...我只係覺得奇怪openrice評語不俗, 可能係我唔識欣賞!



 

 

 

Food Expo 2015

Food Expo vs Sport Expo終於....為食戰勝運動...HAHA....其實都想去Sport Expo架, 想睇吓啲跑步用品, 不過得一條冷去動力確係細啲, 唯有跟喪買兵團大戰food expo啦! 原來上年同一日都係同呢班友一齊去喪買呢, 真係話咁快又一年! 不過今年好節制喇, 屋又未執好真係唔想買太多無謂嘢! 最後只係買咗個蜜瓜(都幾甜又多汁, 45蚊抵啦!)...重有一堆雪條番屋企慢慢嘆!

狂揪夫妻

其實如果唔係同事講我都唔知有呢套嘢, 難得有人吹雞又去睇吓先! 其實都係想睇黃秋生多啲! 



 

 由於8點趕住入場, 6點就食晚飯而且唔多夠飽, 睇完一於食個宵夜先! 好滿足喇, 飽哂!

大上大落太平山

 

星期二又約咗跑友們齊齊跑, 今次跑上山頂, 雖然話係跑...其實都係慢慢爬上山...因為沿路實在太斜喇, 我平日只跑平路一上斜就收哂皮....最後只好慢慢行上山....終於行咗粒幾鐘先行到上山...

 

 

 嘩!呢晚個天好清, 微涼好舒服呢! SONY電話影嘅相質素唔錯喇掛! 好喜歡呢部電話呢! 由於時間關係(上到山再相完一大輪已經係9點幾喇....), 又驚體育館收檔(我哋啲行裝擺哂去體育館LOCKER), 結果一個二個拿拿淋雞咁腳碌落山, 真係雞咁腳碌落山架, 條路真係太斜喇對腳失控似的不斷向前衝...好驚真係失控仆鬼死!好在最後無驚無險落山啫...不過對腳就真係勁攰, 大睥足足痛咗3日行樓梯都覺痛呀陰公! 斜路真係怕怕鳥!

最慘係...番到屋企又攝親, 鼻敏感又嚟料, 最後又鼻發炎, 家陣都未好番....腳仔好番都唔跑得住喇!

 

8月生日跑...熱屎了....

 

8月8 日一齊去8月生日跑, 今次去將軍澳...7:30要去到...唔係約咗跑友真係冇咁神心咁早起身跑步呢 (作為夜鬼應該係夜跑的)....

 

 

其實早起唔係最大問題, 最慘嘅係8點零已經開始曬, 呢日重要係N年以來最曬嘅一日...攞命! 最攞命嘅係重要跑山....基本上上斜係一步都跑唔到, 本身上斜已經係大敵, 加上咁熱都預咗係行山MODE, 點知行到大半太陽伯伯好似癲咗咁曬到皮膚都FEEL到痛, 真係堅想放棄, 好在跑友話就到咋...唔係行番轉頭重傻呀(回程有第二條路冇咁曬呢), 跑咗咁多年今次嘅天氣真係堅熱, 完全頂唔住, 真係第一次辛苦到想放棄! 完成到全程真係要Thank GOD哦! 

慰勞自己。。。^^

如題, 呢期真係堅辛苦, 搬屋已經超攰, 番工又要對住個無理取鬧嘅小學雞, 好討厭堅想打鑊佢!!其實無論你有幾富有,幾英俊,幾高學歷,幾高職位都好, 冇品嘅話有幾叻都係徒然的!(何況...呢位小學雞什麼乜沒有, 除咗"幼稚"之外!_)

 

 

就係因為呢兩個星期太苦喇, 真係要食番餐好對自己好啲...哼!

紙狀銀黏土

呢個星期繼續忙, 而家屋企重立立亂, weekday真係完全唔得閒執嘢, weekend又想抖吓...HAHA...即係執完第一轉就HEA起來! 唉...上次搬屋用咗一個禮拜就執好9成嘢喇, 其實今次我都應該執咗7成架...無耐太多箱嘢堆咗喺底層搬唔到出嚟, 都係等家姐執走啲箱我再繼續執啦!

 

雖然係忙啫, 都係休息吓嘅, 除咗HEA之外, 做吓手作仔都係休息嘅一種! 屋企未執好重未可以開檀搓泥, 出去玩吓其他手作仔都幾好吖! 好似呢個咁, 簡簡單單又唔洗拎番屋企整啱哂我! 其實呢個都係銀黏土嚟架, 不過佢係紙狀嘅, 好似摺紙咗摺好再拎去燒, 今次摺咗個金字塔嘅物體 (摺之前要用普通紙試摺吓先架, 試完先再用銀黏土紙摺),再搵條銀線卷成戒指, 加多粒珍珠裝飾吓就攪掂...又幾有趣喎!

 

 

 

超刺激搬屋之旅....

好多朋友仔都知我8月中搬屋, 冇錯的而且確同咗業主講咗7月搬唔切要8月中先搬到, 原則上大雙方都同意8月中搬嘅....點知....業主喺7月23無啦啦打嚟死都要我7月31搬走.....好決絕嗰隻! 當然我呢邊想企硬維持8月中啦....點知講吓講吓激鬼氣喺28號就決定31號搬! 係架...得番4日...真係人都顛, 好在之前已經PACK咗部份嘢又搬咗少少嘢去新居....開TURBO應該趕到, 就係咁日日都到兩三點先瞓,9點又起身搬走啲嘢, 超級辛苦! 呢4日都渡日如年呢,好在最後都攪掂! 可惜個麻煩業主死都唔放過我哋, 收樓嗰陣九唔搭八揾埋啲冇理嘅問題hea咗我哋兩粒鐘，又話要hold起部份按金！最後比我家姐鬧到佢狗血淋頭先肯收手, 真係好激氣!

 風雨過度是情天, 呢張相就係喺新居第一朝早喺睡房第一眼望到嘅風景, 很美....很好嘅開始!