心連心步行籌款

今日又係一年一度嘅心連心步行籌款喇...其實上年都有參加架...咁快又一年喇....今次都係再MEME一家一齊行...

記得上年同MEME行佢真係行得慢吞吞架…重一路行要一路拎嘢食引佢先肯行…今年…HAHA...其實都係一路行要一路食零食….不過真係行得快多好多呀!! 叻叻呀!

 

再接再厲~終於成功烏....

星期六又晨早醒咗...本應都十五十六想再戰蛋撻架喇....見咁早就整多轉先!! 上次應該係焗時間太耐...睇嚟啲太繁複嘅焗法都唔太啱自己...唯有再溫書睇吓點焗好啲啦....最後搵到兩個比較可信又方便嘅焗法...兩個方法都試咗, 最後都算成功喇...

一如所料....蛋撻本身唔難整...係焗嗰嘢有啲難攪...焗得太勁啲蛋又會太漲甚至爆開....蛋太漲嘅話焗完之後啲蛋會勁凹...第一個方法就係咁..攪到唔靚仔...之後再試焗15分鐘之後將火力教到0再用爐嘅餘溫焗多5分鐘就攪掂喇...

不過我個焗爐嘅爐溫實在太唔平均喇...一啲就爆蛋..一啲就冇離反應...下次再焗再中途轉一轉焗盤睇吓會唔會好啲...

由於有隻撻爆咗蛋...得4隻靚仔啲...不過呢隔咗一晚後啲皮淋哂...再番熱都冇咁好食喇...睇嚟要再搵吓有冇啲食譜可以整到個揵皮冇咁易淋先得喇!

南瓜蜜桃萬聖節蛋糕

呢期愛上整cake, 因為將屋企個焗爐搬咗位家陣焗嘢超方便唔駛將個焗爐搬嚟搬去...不過自己喺屋企整都祗係會整清蛋糕曲奇之類...太繁複嘅都係太花巧嘅都係出去整開會心啲!! (除咗因為我技術有限之外....主要係....因為唔想洗咁多嘢嘛!!)

呢個係工聯會course嚟架...一排冇整成個蛋糕喇.....其實mousse cake真係唔係我杯茶....不過報名嗰陣佢淨係話"萬聖節蛋糕"...我又真係好無聊地想八吓萬聖節蛋糕即係乜東東..HAHA...確係幾低B! 當然...我相信乜cake都好..一定有人幫我包底啃哂佢唔會嘥嘢嘅!!

其實乜蛋糕都係網名嚟...都係一舊清蛋糕再加mousse...學整蛋糕我始終都係buy工聯會多啲...起碼真材實料...實而不華...家陣好多團購都祗係教整色整水...忽略基本功!!

今次老師重教埋我哋整古古力鬼仔同搓糖皮....

攪咗參唔多3粒鐘...終於完成喇.....

見鬼仔有多...撻多隻先...haha!

蛋撻....超失敗篇!!

見近排焗蛋糕嘅手風幾順....諗住搵啲難度高少少嘅嘢焗吓啦...拿!! 未得即係未得....幾粒蛋撻已經考起我喇....成日都唔知幾時先熟....好似焗整都唔對路咁....最後焗到OVER哂....寧願OVER都唔想唔熟食痾人嘛!

一如所料...整個撻皮同蛋漿好簡單....不過焗嗰嘢真係好呢HEA...個焗溫又唔平均...啲撻皮又不厚薄不一...整到有啲熟又有啲唔熟....最後唯有穩陣啲焗多幾焗攪到佢一鑊熟!! 唉!超樣衰...好在個食譜靠得住味道ok啫! 整得咁樣衰..斷估下次可以有進步掛!

黏土功課之菜檔(六) ~ 完成篇!!

終於完成喇...好耐冇整咁大檀嘢真係有啲緊張呀!!唔覺唔覺斷斷續續咁整咗幾個月喇...完成咗真係好開心...以我搓泥嘅速度睇嚟真係要耐唔耐skip一次course先可以清哂啲爛尾功課呀...下個target係插埋盆劍蘭同菊花!!!

講番今日呢檀先...今次真係好勤力架....全部功課都做哂....有多冇少!! 總共整咗31款瓜菜....對我嚟講已經係有史以來最大檀嘢...(不過...對好多人嚟講只係濕濕碎haha!)

又比你哋估吓先...呢條青bb嘅係....青瓜!

三朵花金...係三朵椰菜花先真!

好多毛呀...周身都係毛嘅節瓜....

 呢幾隻係薯仔....

 幾棵蔥...係紅色嗰隻....

小白菜跌到一地都係添....

 真係4朵....西蘭花...

呢幾棵韮菜花整就唔難...黐嗰幾條膠紙就真係有啲煩!!

金菇上唔上色都係咁....冇分別嘅....

鮮冬菰...上咗色醒神哂!!

幾條露筍....

 蒜頭....

兩個萬聖節 ...係兩個南瓜先啱...

濕米兩碌...成日都想整多碌....得兩碌好似少咗啲...等有時間再整過!

原來蓮藕同聖瓜係咁friend架...一齊住.....

芽菜仔...啲黃色豆都有油過架...又係粒粒旨辛苦!

 辣椒一堆....

蘑菇都係同金菇一樣...上唔上色都冇乜分別.....

 又嚟飽死荷蘭豆....話時話...點解荷蘭豆要飽死架呢? 飽死聰明豆又得唔得呢?

唔知大家重記唔記得未上色嘅蕃茄呢...佢同一眾女生都人都一樣...要化個妝先比人認得!

上咗色嘅通菜都靚仔咗少少架....

蘿拔仔一號.....

蘿拔仔二號.....

 

洋蔥...查實見親佢都係生歐歐咁擺喺啲沙律度...生洋蔥真係唔識欣賞...真係冇乜食過!

仍然都唔係幾似嘅唐生菜....

 繼續紅卜卜嘅紅菜頭....

 繼續都係似手榴彈嘅苦瓜.....

又係我至愛嘅紫色....紫色茄子....

呢個重colorful....四色青椒.....

爭啲漏咗....吊咗喺度9年嘅黃牙白...見到佢就諗起kimchi...

禮成...影張合照先啦....

 close up...一二三...笑....

 

再近啲先......

呢個菜檔真係幾好玩....啲菜我唔捨得黐實佢呀, (啲老師好喜歡叫人黐實啲瓜菜喺啲籃攪到佢唔郁得, 可能啲老師慣咗拎啲嘢去展覽唔黐實好危險掛!)...不過我就比較鐘意隨手逐粒拎嚟睇喇...反正屋企都唔會有其他人攪架啦...唔黐實都冇所謂....嘿嘿!

小熊貓與大豺狼

從前有一個森林...森林入面住咗好唔同種類嘅動物, 大至毒蛇猛獸, 小至蛇虫鼠蟻....大家都各自有自己嘅生活....當中有隻小熊貓祖祖...佢好喜歡交朋結友...不過呢佢只會選擇一啲溫柔善良嘅小動物同佢做朋友, 好似佢嘅同類小熊貓啦, 重有小鴨子, 小白兔, 小綿羊等等.....佢哋全部都係祖祖嘅好朋友....

從小到大...祖祖嘅父母都教導祖祖...千萬唔好同毒蛇猛獸打交道, 因為佢哋嘅世界太兇猛太殘暴, 祖祖好容易會受傷害...祖祖重記得....森林入面有種比毒蛇猛獸更可怕嘅動物佢就係豺狼....豺狼好陰險好狡猾...佢哋喜歡披住羊皮扮小婂羊, 然後接近你同你做朋友....佢會趁你一個唔留神張開大口將你吞落肚....所以每當祖祖識穿披住羊皮嘅狼都會好驚好驚...趁豺狼未張開大口就急急走人....永遠都唔會再接近.

所以, 祖祖一直以嚟都好小心...避免結識到壞朋友...不過祖祖有個好大嘅缺點, 佢對眼晴天生有點問題, 視野模糊不清...成日都睇唔清楚朋友嘅真偽.......所以佢一直以為自己所認識嘅都一定係善良嘅動物! 由於祖祖自知眼睛有點問題....穩陣起建...佢唯有自製一本朋友手冊, 手冊入面寫滿哂佢啲朋友嘅名....朋友當中分開唔同級別...有知己, 患難之交, 好朋友, 普通朋友, 點頭之交...等!! 祖祖會將佢嘅朋友分成唔同嘅等級,不過呢啲級別有時係會改變嘅, 佢會跟據平日朋友相處時候嘅表現評分,心地善長嘅朋友仔會升級, 小氣自私嘅會降級....雖然有本朋友手冊...不過大笨蛋祖祖有時都會分唔清楚身邊有冇豺狼出現......

幸好...森林入面有個守護神, 佢會保護森林入面弱小嘅動物! 守護神對於失去父母嘅祖祖寵愛有嘉, 知道笨笨嘅祖祖會誤損友...所以喺適當嘅時間會提示祖祖....有一次守護神用魔法比咗一張記憶咔祖祖, 噢!!祖祖發現原來佢工作嘅地方有豺狼呀....隻豺狼重將祖祖嘅個人資料擺咗喺張記憶咔入面收藏....自此之後祖祖就學會咗好好保護自己嘅私人資料....

又有一次....祖祖比好幾隻豺狼一齊圍攻...佢哋試圖將祖祖都變成佢哋嘅同黨...祖祖當時好驚呀, 好彩守護神又派咗好多小動物朋友幫祖祖度過難關, 而祖祖亦急急咁更新佢嘅朋友手冊...將呢幾隻豺狼嘅名字列入黑名單...

最近守護神又發功喇...祖祖發現咗一隻潛伏咗喺身邊多年嘅大豺狼, 祖祖一直視呢隻大豺狼係一隻小綿羊朋友, 每當祖祖接近呢隻小綿羊嘅時候, 守護神都不同嘅方式暗示祖祖叫祖祖小心!! 可惜....祖祖仍然唔願意相信呢隻小綿羊係豺狼! 祖祖對小綿羊更加係兩脇插刀義無反顧, 就係因為咁經常令到祖祖遍體鱗傷, 不過祖祖仍然願意視小綿羊為朋友, 因為祖祖相信一位識咗咁耐嘅朋友仔唔會害自己嘅! 可能守護神對祖祖嘅愚昧無知睇唔過眼, 佢決定狠狠地揭穿呢隻小綿羊嘅假面具!噢!原來呢隻豺狼係咁奸詐咁自私, 當祖祖見到豺狼嘅真面目之後好傷心好難過,好似被呢隻豺狼兜心口吉咗幾刀一樣...奄奄一息!儘管大豺狼覺得自己無心傷害, 但係祖祖確實係傷勢嚴重, 大豺狼太可怕! 此刻祖祖終於明白"青蛙與蝎子"呢個故事嘅道理!至於本朋友手冊嘛....點改好呢? (呢個係open ending嘛...自己諗啦!!)

嘩!個故事咁悶你都睇哂....無聊呀你!!

伯爵茶cupcake vs 合桃黑糖muffin

三日假期又完結喇....呢三日好似冇乜真正休息過咁....見呢期整餅整得幾暢順...繼續練習吓先....整個伯爵茶cupcake同合桃黑糖muffin, 本來啲muffin有6個架....不過我一時跣手將啲蛋糕跌咗落地...為咗保護剩餘嘅兩粒muffin...情急之下徙手頂住個焗盤...連手都"熟"埋呀...嗚
嗚嗚!

黏土功課之菜檔(五)

趁住呢3日假期....終於完成咗個菜檔喇...不過POST埋呢埋半製成品先....下次再POST上咗色嘅製成品啦!

呢個其實我整錯咗色架..本身老師話要搓紫色洋蔥...點知我就傻吓傻吓搓咗冇顏色...不過上色先發覺錯有錯著原來咁整再上色嘅效果好啲...之後上色你就明架喇!!

 呢堆應該知係乜喇掛...咪就係紅蘿蔔囉...

 佢哋咪就係紅蘿蔔啲FRIEND白蘿蔔乾囉...

呢堆就係磨菇....

 噢....比人剃哂啲毛嘅節瓜.....

 HAHAA....呢個整完都幾似手榴彈! 其實佢哋係苦瓜...

 再嚟大合照...下次就有製成品睇喇!!