黏土製作の乜檔物檔~第一回

整完個嫁女餅又開始新一個course喇...呢次係學整煨魷魚檔、燒肉乾檔同埋唔知乜檔...其實上咗幾堂架喇...家陣先有時間寫咋...嗯...查實最初諗住上呢個course會教吓點搭個檔口出嚟架嘛...不過...好似冇乜點講...家陣好似連塊木點据都唔知...點搭呀?!我呢啲懶鬼最後都係可能自費買個車仔檔番嚟算喇...算啦...搓住啲嘢先啦...個檔口遲啲先諗點攪好!

先嚟整個煨魷魚檔先....咪以為煨魷魚檔淨係得魷魚同魷魚先得架...重有其他串燒架...有青椒啦.....

重有菠蘿...青椒併菠蘿....都幾好味吖....

燒雞翼..我鍾意食....不過未上色所以睇落好似有啲蒼白....

主角出場喇...土魷....

當然唔少得風琴魷魚啦......

都話有其他串燒架啦...有牛肉同雞肉...有啲係未燒架...所以紅卜卜囉...都係嗰句啦...啲雞似未化妝呀...所以白雪雪呀....

午間小鈙

捱咗成個星期終於又可以抖吓喇....今日下晝就約咗幾位麵包班同學仔出嚟high tea兼吹水...難得有時間high tea...梗係要搵個舒舒服服嘅地方啦...呢度真係唔錯! 呢度係邊? 就係Four Season Hotel喇...真係未見識過...一試都無防呀!!

呢個tea set係咪好靚呢....呢個係二人份量嚟架...真係太多嘢食唔哂呀!

我哋有7個人...一人一份....何其壯觀..haha!

啲食物好精緻呀...味道當然好啦....嗯...不過...可能真係年紀大...對啲太甜嘅食物真係冇以前咁大興趣喇!!

 

 

喜

呢排番工真係忙到顛咗...日日番工都頭痛...真係連寫卜嘅mood都冇埋! 難得想寫篇嘢...一於寫篇"高興"嘢先!

呢日係上星期六....呢度係沙田嚟架...我同咗幾個同樹去咗舊同事"利奧"仔嘅結婚酒會....朝早重落狗屎架....好在下晝天氣好轉...你睇呢度佈置得好靚呀....重掛咗好多相喺度...靚之餘重好有心思...good 呀!

由於時間尚早....唔算太多人.....buffet時間都未開始呀....

由於要趕住番黏土班...hea咗陣食咗少少嘢就閃喇...之後重去咗小青蛙屋企又玩又食....過咗一個超忙嘅星期六!

關於跑步....

近排亞祖愛上咗跑步....大家可能問....何解咁多運動都唔揀要揀跑步呢? 嗯...因為...對一個運動白痴嘅人嚟講...跑步係最簡單不過嘅運動...唔需要有特別嘅技巧....基本上只要有對運動鞋就可以到處跑...超方便! 咁大家可能又會問....點解一個運動白痴又會無啦啦學人做運動呢? 唉!一日都係比香港咁污濁嘅空氣考起啦...話說前排啲空氣污染指數勁高...有幾次行行吓啲鬧市....真係有呼吸困難甚至扯蝦咁滯...真係難頂!正所謂日日運動身體好嘛...雖則我頂多都只係"週週"運動身體好嗰隻...都總好過冇吖!而且跑步可以練練氣...對我呢啲氣管麻麻嘅人都應該好啲掛?!

為咗唔好吸咁多癈氣....搵個好啲嘅環境跑步都相當重要架....樓下嘅海旁就合哂我心意...近近地又舒服!

唔同時段都跑過架...晨早,黃昏同夜晚...各有各好呀...晨早陽光充沛特別醒神...黃昏嘛陽光比較柔和舒服...日落重好靚添....夜晚就更加涼爽喇!

講開跑步...近排買咗呢本書呀....其實我淨係睇過佢嘅"挪威的森林"咋!呢本書係講村上春樹一路跑步一路思考架....因為跑步比咗好多寫作靈感比佢....話時話...其實我次次跑步都有諗吓嘢架...不過次次都只係諗我吓下一個跑步目標啫(通常都係"今日要跑耐啲先抖")....記得第一次跑嗰陣....跑咗5分鐘已經頂唔順要抖吓喇....之後10分鐘...15分鐘.....20分鐘先要抖....總算有少少進步....其實....尋晚跑步嗰陣我又諗到一個頗"遠大"嘅目標...希望....下年可能或者估計may be會學人參加吓馬拉松哦! haha...一個非常之冇信心訂立嘅目標呀!

黏土製作の嫁女餅及盤菜~大功告成!

yeah....終於攪掂! 一直都希望喺下一個課程開課前完成佢....最後都趕得切..開心! 其實我笨冇偷懶架....幾個星期前已經將佢哋上哂色攤哂喺餐枱吹乾...點知成個月啲天氣都係咁潮濕....都已經開咗抽濕機架啦...點知啲嘢都係死都唔乾...激氣呀...重要擺到一枱都係黏土功課...真係食碗麵都冇地方呀! 今日終於可以攪掂哂佢哋....搵番我張枱喇....真係"揀動"!

好啦...介紹一吓我努力嘅成果先...先嚟睇吓啲嫁喜禮品....幾個雞蛋糕、合桃酥、皮蛋酥, 重有瑤柱、冬菇同魷魚乾...同上色前有啲分別呀...嗯...不過呢...真係影得麻麻...光線太暗...開燈又反光....攪到啲色水影出嚟同實物有出入添!

呢度重有蓮藕、蠔豉、紅棗、合桃

當然唔少得鮑魚、椰子、五顏六色嘅嫁女餅同埋花生.....

再嚟龍鳳蠋、蝦米、紅綠豆、百合.....

由於今次整啲嘢實在太"鼻屎"太細粒...唯有自己走去買啲盒仔同袋仔pack起佢哋啦...其實last嗰堂啲同學仔同老師都煩梗將呢堆"鼻屎"點處理好....老師重話市面上冇呢啲袋仔賣...殊不知第二日上網嗰陣竟然無意中比我發現真係有呢家嘢賣架...而且價錢都唔算太貴.....可惜我冇攞佢啲contact啦...講唔到比佢哋知添!

教整嫁女餅嘅老師好慳儉...從來都唔鼓勵我哋花錢買accessory....其實老師有教整用嚟擺禮餅嘅盒架....不過我又真係唔太喜歡整呢啲accessory...其實我周不時去其他blog度睇其他人嘅作品架...都見到其他人整呢啲accessory不過通常都整得麻麻咁, 自問功力未夠...真係冇謂嘥時間整.....都係靠外援算啦...呢個盒有兩層架....

其實個盒都幾大....恐怕我啲"鼻屎"太細粒...所以買咗塊紅色"激絨"塾底....

海味方面就好full吓喇...漏咗介紹魚翅添....

影番個全相先.....

跟住就介紹一吓個盤菜喇.....都好豐富架...除咗有頭先出現過嘅瑤柱、冬菇、鮑魚同蠔豉之外重有蝦、西蘭花、雞、燒鵝(由於唔夠位擺,所以舊燒鵝冇擺落個盤菜度...), 重有用嚟整色整水嘅紅蘿白花....查實重有鴨腳架...不過唔記得影佢!

yoy...個盤菜終於煮好喇.....夠豐富嗎?

由於啲瑤柱、冬菇、鮑魚同蠔豉嘅顏色太接近....所以我搵咗啲西蘭花圍邊.....睇落冇咁悶嘛..........

再嚟多張大合照先.....

有新朋友陪吓燒臘檔同點心喇....幾熱鬧!

小豬~

尋晚同咗個朋友仔去睇小豬演唱會...睇concert梗係要開咗飯先啦...呢度朋友仔嘅介紹...大大碗嘅拉麵...真係超飽!

haha..難得今次唔駛跑住去紅館....影咗陣相先開場呀....由於窮嘅關係....今次都係做山頂嘅朋友啦....其實....山頂嘅氣氛都一樣咁high架! 呢個演唱會其中一個selling point係3D...不過....3D呢家嘢都係算罷啦....啲效果真係唔算突出!

其實淨係睇小豬傾力嘅演出都已經足夠啦...重有嘉賓楊丞林...."雨愛"確係好聽呀! 睇完個show終於明白點解啲人咁喜歡小豬喇....靚仔之餘性格都好可愛...學"萬靈妹妹"話齋...."我都有少少鍾意咗佢...."haha!