周遊烈跑-快活谷

夜晚打邊燼同BBQ都未算激, 呢劑先勁呀, 烈陽跑呀...揀直係癲架, 又估唔到我咁都頂到, 我開始懷疑自己真係跑到癲咗! 由西營盤跑去跑馬地再跑番轉頭, 難得今日狀態唔錯, 跑到又唔死得, 不過最後8K真係超熱係咁隊水先跑到咋 (其實中間已經有好多位係有遮檔唔係直曬架喇)...最後飲咗一支水, 一支維他檸檬茶再加一支椰子水先跑得哂21K, 真係未試過飲咁多嘢....一邊飲一邊爆汗真係超堅!! 跑完又黑咗兩度...嗚......

 

可能真係太熱喇, 跑完都食唔落嘢, 去茶餐廳飲咗杯凍檸茶就算, 夏天跑步實減到肥囉!

爆熱BBQ

好耐冇見啲卜友仔喇, 今個月又有生日飯....前兩日打完邊爐呢日又BBQ, 我真係幾服我啲朋友架...唔熱唔玩...HAHA...不過我仲服咗自己,幾熱都照去!

 

6月之星飯@禾牛薈

睇番今個星期食同玩先至發玩, 原來我識親啲人都係傻架, 明明家陣係大熱天時但係一個二個唔係去打邊爐就係去燒嘢食, 再唔係就去烈陽跑...正所謂黐黐呆呆坐埋一枱, 你癲咩我又奉陪喎, 先嚟生日打邊爐...YEAH....

 

之前食過一次印象唔錯, 其實啲嘢都唔錯唯獨碟手切牛又真係爭啲又碎濕濕又韌....

熱辣辣整番杯冰凍啤酒爽呀...

仲有我至愛嘅午餐肉...正!

澳門爆汗之旅

前排跑友吹雞去澳門, 我見星期六可以JOIN到又去玩吓先! 呢期時晴時雨重以免澳門都會落雨啦, 點知熱都爆我哋重周圍"觀光"真係一路行一路沖涼, 成身濕到亞媽都唔認得! 我又冇帶後備衫換,個身真係超臭囉!

全日最嘆嘅行程當然係去食lunch buffet啦, 終於可以坐低嗽冷氣又可以食餐好...正呀!

食飽就繼續觀光, 大三巴當然必去啦, 睇埋大炮就番氹仔換衫去跑步喇....18:30起跑太陽伯伯終於收收皮喇....重有少少風添! 我哋圍住啲酒店跑邊跑邊影相...唔覺唔覺又7K....爽呀!

兩個難忘嘅團跑...

呢期天氣堅熱, 我重要皮膚敏感得好嚴重吓, 有時見到啲團跑event真係好掙扎, 好想去玩吓但係一勁流汗嘅話皮膚敏感就更嚴重, 之但係一個難玩嘅人又點會怕皮膚敏感呢?! (其實怕架, 不過玩完先算啦HAHA)....

 

就係咁上上上個星期日就由東涌跑去天檀大佛, 又係我死敵斜路喎(上斜冇力, 落斜又驚傷腳) ..... 中間有段路重好曬添, 好在中間有豆腐花做補給...最後要行條大斜路先到...真係行都覺得攰呀! 難得有跑友重話跑番落山....重難得嘅係成班傻人又真係話一齊跑番落山...最後大家一齊隊完碗餐蛋麵就跑番落山...嘩!落山又係超曬呀頂!又黑咗一度, 救命!

原來上大佛都未算癲, 落狗屎都照跑先癲呀 (真係落狗屎架, 大雨過渣馬), 同樣都係半馬, 今日呢半馬好甘呢, 斜都當然係唔少得啦, 尾段重要落狗屎, 全身濕哂啲衫褲鞋襪都變得好重好難路, 跑完重凍到黐肺呀...不過...咁惡劣嘅天氣都可以完成到真係要比個叻比大家!

通山跑....XTE Midsummer Race 1

話說前排有跑友報咗個XTE Midsummer Race...噢!呢個係山賽嚟喎(山賽=跑山), 雖然跑咗幾年街啫, 不過路跑同跑山完全係兩回事囉, 之但係呢個比賽都係十K啫, 我估用山行MODE都應該攪得掂, 預計兩小時左右應該可以完賽!

 

上星期就係比賽嘅日子, 其實開跑前有少少淆底, 因為呢日應該會落雨, 山賽落雨除咗增加難度之外重會增加咗危險度...幸好最後只係灑咗少少雨, 反而清涼咗行得舒服啲(當然對鞋就遭殃, 行完同山之後成難鞋如同踩完狗屎一樣dirty)....不過...行吓行吓(由於真係行得太慢,行到日落) ,你睇....竟然見到咁靚嘅日落呀...真係好靚! 個比賽包尾都抵嘅...HAHA, 堅係好包尾架....

6)

朱古力小蛋糕

好耐冇整餅喇....就趁端午節假期玩吓先, ME姐話想食古古力蛋糕...嗯...其實我咁多款蛋糕之中至唔LIKE古古力...不過ME姐叫到就整啲比佢吃當賀佢考完試啦....好在冇整一排都冇失手啫!

E Plaza

嘩, 乜解救成個月冇寫卜架? 想放棄唔寫? 當然唔係啦....呢期一係病病哋太攰乜Q都唔想寫, 一係部notebook死死哋(整佢個掣部機無啦啦迫人哋 upgrade個死人Windows去Windows 10, upgrade完之後又死, 都唔知佢想點中都癲!) 好在最後整番好啫, 終於可以寫番卜喇.....

 

其實我啲卜都係無聊架啦, 都係食食跑跑....今次都寫吓"食"....呢期同啲舊同事一齊去觀塘番吓啲Yoga 同 TRX course...上完就去搵吓嘢食, 無意中去咗E plaza搵食, 又估唔到呢度又有幾多嘢食架喎, 而且質素唔錯! 幾十蚊又好味又夠份量, 超正!

 

呢間叫四季餅店...一個SET有三文治, 湯,沙律同飲品....做完運動唔好太heavy食呢個set唔錯...

v

 

 

呢間叫My Burger, 個牛肉burger好味呀, 啲肉重好juice啲粗薯條即炸架, 好味!

 

呢間唔記得係乜名喇, 喺My Burger對面...個all day breakfast好豐富呀....正!