一日假期

今日請咗一日假,大家咪以為我請假休息咁嘆,查實因為我屋企度度都爛爛地嘅關係(個廚房唔知邊度漏水,廁所個水喉又虧虧地,個冷氣機又壞咗九年,連個寛頻個short埋成日斷線……),今日要留守喺屋企等房屋署啲人嚟睇吓邊度漏水,重要搵師傅仔整水喉同埋等人嚟裝部新冷氣…

重諗住放假可以瞓晏啲,殊不知房屋署個姐仔9點瞓都未瞓醒就話上嚟睇睇先,若果啲喉壞咗先再搵師傅!攪完一大輪先知原來係洗衣機條喉駁得衰,拿拿淋落街搵個師傅仔上嚟整番洗衣機條喉同埋廁所個水喉….之但係攪完一大輪都等唔到冷氣師傅上嚟,跟住打電話去問,頂原來佢哋攪錯咗送貨日子,跟住大家姐打佢炳佢先至arrange 下晝再送嚟,真煩!攪完哂屋企啲嘢重要去旺角配藥,再去電話公司整埋啲嘢,之後再去shopping……真係忙過番工!

Lee個就係條漏水嘅洗衣機喉,好可惡!

由於喺屋企等師傅仔嚟又冇乜細藝嘅關係所以去咗惠康買材料試吓煲冬瓜薏米水(自從之前去健康工房買過嚟飲之後就鍾意咗飲,不過好貴吓$15一支,所以一路都想試吓自己煲)…好在又真係好易整,煲一粒鐘就得,幾蚊材料就可以煲一大煲,聽日可以帶番工飲添呀,超抵!不過聽講薏米好利尿,不宜多飲,都係耐唔屎飲吓好喇!

晨早浸定啲薏米先.....

巨峰提子

尋日又有幾個親戚嚟咗我屋企,我已經叫家姐呼籲啲親戚唔好再買嘢嚟,lee啲嘢有心就得啦.....點知....大家姐唔記得咗同啲親戚講!就係咁又出事喇.......尋日又收到兩大pack巨峰提子......雖則我都好鍾意食提子,但係又點食得哂咁多呢!

既然拎到嚟我哋唯有盡量隊哂佢啦......我同大家姐諗住食兩粒試吓味睇吓啱唔啱亞媽食.....嘩!真係不得了......酸到唔識形容,連我lee個'咸濕大王'都頂佢唔蒲!啲皮又超勁厚,真係好奪命,完全唔知食梗乜,飲酣都冇咁難頂...... 其實我哋食之前睇個packing都已經覺得唔對路 (喺百佳買$11蚊pack巨峰提子,重要係國產嘢......好信唔過吓!)....有哂心理準備先擺落口,點知真係估唔到咁難頂!

嗰兩pack嘢真係完全唔掂,我同大家姐每人'捱'咗幾粒之後就一致通過掉哂佢(又要做埋啲節墮嘢),不過都冇辦法,費事食到胃痛!

p.s. 奉勸大家買lee啲所謂巨峰提子嘅時候真係要小心,嘥嘢就唔好啦!

 

生果檔

lee排我屋企好似開咗生果舖咁,攪到一屋都係生果....簡直覺得恐佈!!其實我哋已經勸過啲親戚....去探亞媽真係無任歡迎....但係千祈唔好買嘢嚟,最幣係佢哋劑劑都買一大堆生果,有啲重唔多啱亞媽食,天時暑熱啲生果又唔可以擺太耐,真係次次都食唔切....好鬼嘥.....啱啱過咗嘅生期六、日又有一批新貨.....救命!!!

頭先數過總共有兩條蕉,三個李,廿幾粒西梅,廿幾粒車厘子,九個大桃.....淨係得我一個人食....真係當飯食都要食幾日先食得哂....

 

打錯電話

前晚夜晚晚參唔多12點咁滯個手提電話無啦啦响,咁鬼夜都唔知邊條茂利打嚟,個電話號碼又好陌生吓......

跟住就有把陌生男子嘅聲音就話:「喂!聰仔呀.....」

亞祖:「聰仔?」(真係有啲猶豫,我個姨生仔又係叫聰仔......)

陌生男子:「係呀,聰仔呀....」

亞祖:「打錯喎....」(斷估搵我姨生仔應該都唔會打lee個電話啫)

陌生男子:「噢!我重以為lee個電話係聰仔添....」

亞祖:「哦!唔係呀冇lee個人呀....」

陌生男子:「吖,不過你把聲幾甜喎,下次再打過比你....」

(我諗佢都係齋聽把聲先噏得出lee番說話)

佢當然係冇咁低能真係再打嚟啦,不過嗰一刻又真係唔知點應佢好,淨係葱葱咁收咗佢線,下次打錯電話我都試吓咁講先....唔知啲人會點答呢.......

 

猪仔團

8月又係放暑假嘅時候,每年暑假我哋一家人都會番大陸玩,雖然今年大家都好似唔多得閒咁,但係見排骨仔同肥師奶不繼咁扭我哋....所以我同大家姐就應承帶兩隻小魔怪去玩,重帶埋二家姐個印傭lily去添.....

佢哋兩隻嘢梗係鐘意番去玩啦,排骨仔有得搭佢最鐘意嘅雅居樂van仔遊車河....

屈大家姐買玩具......

揸司家車去游水水.......

獨家泳照....係咪好香艷呢

 

除咗玩,重有佢哋最鐘意嘅乳鴿同糖水.....去supermarket 掃零食.....去魚塘餵魚.....好彩我同大家姐都唔執輸去咗按摩啫!!

不過今日回程嘅時候就慘喇,由於肥師奶唔知做乜勁扭計,攪到遲咗出門口趕唔切搭巴士去碼頭.....趕唔切搭巴士事小,趕唔切去碼頭搭船就大煲啦...大拿拿成千蚊船飛...於是我哋就走去搭的士啦,但係又冇喎,最後連白牌都殺,之但係個白牌為咗慳錢唔行隧道...喺度勁兜路,行埋啲山路同田邊.....戥到pat pat開花又危險喎,重爭啲攪到撞車添,好彩最後都趕到船....真係有驚無險!

 

唔想咁樣,可以點樣.....

尋晚二家姐好早去咗安老院探亞媽,佢重幫亞媽買咗對拖鞋添,不過聽二家姐講大家姐話想辭職唔做去照顧亞媽兩個月,等亞媽適應吓正常生活....唉!聽到真係好擔心大家姐,佢好似走火入魔咁,咁照顧咗兩個月咁又點呢.....正如二家姐所講,大家姐唔祇比好多壓力比自己,就連佢身邊嘅人都會比佢攪到好大壓力!!

過咗一陣大家姐都嚟埋,跟住二家姐就走先,我同大家姐攪到10點先走......食埋嘢番到屋企都11點半....真係好攰好攰攰呀....其實lee 3個幾月嚟都係過住lee 啲非人生活,以為亞媽出咗院可以輕鬆番啲,點知重辛苦過之前....最慘有啲亞姐真係唔多掂,令到我哋唔放心,攪到我哋要成日去昅實

!!

其實捱咗幾個月,無論體力上同精神上都真係好攰,家陣日日都唔知自己做梗乜,好似得番個驅殼咁,番工好似遊魂咁,明明喺公司已經冇乜嘢做架啦,但係放工都係成個人散咗咁

,再去探亞媽都唔緊要,但吓吓都攪到9點幾10點先閃就未免太辛苦.....係時候諗吓點樣過番啲正常啲嘅生活喇,再係咁就算唔黐線都會抑鬱啦....救命....我唔想變黐線婆呀!!

 

 

撞鬼咩

上星期五放工如常咁去牛頭角搭89x去威爾斯,我離遠見有架89x埋梗站即刻用9.9嘅時間飛奔上車,由於勁攰嘅關係一上車就瞓喇,瞓咗一輪先至到大老山於是繼續瞓啦

......殊不知瞓醒一睇...........吓?!去咗"沙田醫院".....唔係fa邊庶嚟架....89x點會去到沙田醫院架......頂!肯定上錯車啦.....又唔知邊度先有車去到威爾斯,人生路不熟咁.....好彩下個站(富安花園)有馬鐵啫,即刻飛落車轉馬鐵.....落車先知原來我上咗架89D...真係鬼黯眼!!

終於去到"第一城"站,跟住就行去威爾斯方向....離遠見到個熟口熟面嘅亞伯,原來係呃錢亞伯(成日徘徊喺醫院門口問人攞錢搭車嗰個).....見佢背向住威爾斯行梗,睇嚟佢應該打算收工番屋企.....我梗係扮時運高睇佢唔到啦

....可惜都係失敗咗,佢見有條水魚(即係我)游梗過嚟,即刻行嚟我前面停低,細細聲咁叫我"小姐,小姐".....

唉!又嚟(記憶之中,佢之前已經搵咗我at least 6次)

......今次真係忍唔住要炳吓佢

,佢一講完"小姐"之後,我就話"亞伯你成日喺度問人攞錢架喎....",佢竟然大大聲碌大隻眼咁同我講"邊有呀"......見佢碌到隻眼大一大,我都唔執輸碌大隻眼同佢講"冇,下次再見到你我報警架!!!".....佢聽到見死死氣行開咋....希望鬧完佢會記得我下次咪再 叫我"小姐,小姐"啦.....

 

大戰

上個星期日有個斯斯文文嘅四眼護士問大家姐搵安老院搵成點,咁大家姐咪話"唉!重搵梗呀,又請唔到工人,亞媽應該未出得院(原本醫生話星期一要出院), 可能要再過多幾日先得......"

殊不知東姑頭sister(護士長)聽到就大大聲搭爹話"唔得架喎,你點都要比個期我...",大家姐就話"真係未知幾時先出得院",東姑頭sister仍然死心不息繼續問"唔得你一定要比個期我(態度好強硬)", 喺lee一刻大家姐已經有啲躁,跟住就答"我而家答你,比唔到個期你呀

,要搵社工跟進....因為安老院收好貴".... 

東姑頭sister就話"你哋唔知價架咩"....嘩!大家姐聽完lee句真係火都嚟, 大佬知價唔代表比得起,吓吓成皮嘢一個月真係好難頂!價錢平嗰啲真係連點護理亞媽個傷口都唔識,點可能擺亞媽喺度住.......大家姐梗係乘乘機機發爛渣話,一時攪到亞媽暈咗一陣又有諾沃克,攪到我哋失哂預算,唔知點好,之前又話可以send去沙田醫院,而家又話冇,咁家陣冇咗個中轉站,一嚟就話要即刻番屋企真,我哋已經個個星期六日去搵安老院同工人,淨係搵人嚟試工都搵咗好多個(但係個個都唔肯做).....好啦諗住搵安老院住,叫個社工幫手申請啲津貼,個社工放咗假又話冇人follow到啲嘢.....

!!!

哈!大家姐都好堅,將lee排嘅怨氣發洩哂喺個sister身上,係咁捉住佢嚟鬧,連個四眼護士都即刻彈開,個sister就越講越細聲,態度都變哂......簡直係幫我哋成家人同埋病房嗰班敢怒不敢言嘅護士出氣(啲護士都好唔like個護士長)!!

其實我哋都唔想做院霸,邊個唔想出院啫,你估住醫院好開心咩,我哋祇係需要多幾日時間處理埋啲手續啫.....我哋都知個病人住得耐得滯(3個月有多)嘅話醫生要寫report, 連啲護士都會好難做,但係叫人出院都唔係咁嘅態度掛,之前都不斷有護士問我哋乜情況,但係佢哋都好友善同比到好多有用嘅意見比我哋,有啲重真係好關心我哋

!估唔個護士長反而講埋lee啲嘢......

好彩亞媽聽日終於可以出院喇

,不過都係要住住安老院先,真係希望佢可以快啲番屋企住(當放假番屋企住一兩日都好丫).....

唔好意思...篇嘢好似長咗啲,不過真係好嬲....不吐不快

!!!

家陣啲小朋友......唉!

繼上之比肥師奶話我"小小嘢都做唔到"之後,尋晚又比佢串我喇......

話說上個禮拜佢學完彈鋼琴打電話比我:

肥師奶:「我啱啱學完琴呀....」

亞祖:「係呀,咁好唔好玩呀?」

肥師奶:「學彈琴唔係玩架....」

亞祖:「咁鍾唔鍾意學丫?」

肥師奶:「都話學絡, 唔係玩架, 冇鍾唔鍾意....」(比佢吹漲)

咁佢尋晚又打嚟, 跟住我又問佢:

亞祖:「今晚有冇學琴呀....」

肥師奶:「你傻ga黐線ga, 星期四同星期六先學ga嘛....」

嗚鳴....好慘呀比個5歲人仔勁串,下次見到佢我實唔睬佢呀....淨係同排骨仔玩, 問佢怕未......