食、玩、hea的一天，爽呀!

YEAH....暑假喇...唓!關你鬼事咩亞祖...你畢業咗N年啦...咪扮細喎! 大家冷靜....你啱...暑假關我鬼事咩...我又冇暑假嘅...中暑就有我份!!

之但係...暑假關我啲姨甥事嘛....家陣讀書真係幾辛苦架....壓力又大....當然我讀書嗰陣都有壓力啦....可能我當年真係傻更更....壓力頂多來由考試嗰兩個禮拜咁大把!! 聽排骨仔講佢間學校個個星期唔係考試就係測驗...好忙呢!! 佢哋終於捱到個暑假真係戥佢哋開心!!所以佢哋一考完試就急不及待約佢哋去"威"喇!!

其實咪又係約佢哋出嚟吃喝玩樂....食吓好嘢佢哋都好開心架....呢間我都係喺OPENRICE搵...確係冇令我哋失望呀...好味!!

食飽又未夠鐘去SNAP影相...行陣街先....咦!佢哋又幾乖喎...冇屈我買嘢,算你哋啦...抵我帶你哋出嚟威嘅! 行完一大輪就去SNAP影相喇...呢期啲"少女"們好興嚟呢啲地方影相架...有間獨立房比你自拍,重提供一堆道具再衫比你....位位一舊水左右....越多人越平....肥C奶今次已經係第三次影喇...呢間嘢都係佢卜架...

 

影完就去Pizza Express開飯...之後再去甜牙牙食埋甜品先番屋企...超滿足呢!

黏土功課之魚樂無窮(二)

上文講到啲魚仔已經整好喇...重擺咗落魚缸,不過重未有石仔呀...最後去咗花墟搵石仔....搵細SIZE石仔真係唔容易, 千辛萬苦行幾條街先搵到!!...啲石仔重有好多泥添呀...番到屋企洗咗粒幾鐘先攪掂!

加咗石仔遮遮掩掩,重可以黐啲烏龜仔喺啲石仔度以防佢哋走甩呀.....

最後整咗兩缸魚....

點解啲石仔要洗得咁乾淨? 因為重要加彷真水嘛....如果啲泥沙溶咗喺啲彷真水度咪成缸泥水咁...超肉酸呀....到時真係前功盡癈呀!

好彩兩缸水都好清徹,啲魚仔都冇甩魚.....太好喇!

影番張合照先! 重有缸熱帶魚未整好呀(同呢兩缸完全唔同款架)....努力中呢!!

香道心靈體驗之旅

呢個純粹因為好奇而參加嘅COURSE...之前玩過曼陀羅幾得意...跟住個導師介紹咗呢個香道COURSE於是又同朋友仔一齊嚟見識吓...

其實導師都係介紹吓香嘅由來...用乜嘢香料整香...之後就介紹點整香...比想像中容易喎!原來只係香料+水搓埋已經得(不過導師就比咗蜜糖水我哋, 而香料方面導師都將幾種香料混埋一齊比我哋有檀香、丁香、龍腦、炭粉等....)

今次整香粒呀....搓完等佢乾就得架喇...之但係....典解隻味咁似中藥味嘅?!!!好難聞呢....

Back to Priscilla.....

一個不折不扣嘅老餅演唱會....由逝去的諾言開始已經好喜歡佢嘅歌(亞祖當年真係好細架咋....若然唔係大家姐日聽夜聽什麼"少女雜誌"我真係未必識呢首歌呢!!)...之後我再大少少就開始籌旗買佢嘅專輯...嘩!嗰陣真係勁窮架...咁都捨得比錢買可想而知有幾LIKE呢...

記得中一嗰陣...無啦啦比音樂老師隊我出嚟唱合唱團(我都唔明...明明試音嗰陣唱得好頭皮都重要隊我出嚟....真係好謎!!)....嗰陣我真係幻想唱唱吓合唱團會唔會唱到好似陳慧嫻咁好呢?話哂大家都叫"亞嫻"嘛(雖則寫法有啲唔同..HAHA)....好明顯呢個祗係幻想啦....以前唱合唱團唱女高音....唱到扯哂蝦最後上到台我都係夾口型算(一係唱細聲啲費事太影響市容)....非常之流! 最慘係明明放假都要番學校練歌...終於捱到中二下學期就冇再唱喇!!

講番個CONCERT...重以為唔FULL...點知....好FULL吓喎...相信坐得喺度嘅大郭份都係忠心FANS...好似坐我前面嘅嗰幾位男士...真係超級投入呢!!雖然好多歌都已經冇聽N年...不過仍然會記得...仍然動聽....食力派即係食力派!!!GOOD!

港燦又出動...

好耐冇周圍去咁...星期六約咗幾位同樹去威....下晝熱辣辣打完個冰爐之後去咗探我啲同鄉呀...佢哋玩快閃...又真係幾得意...我都好想領飬番隻細嘅...當留念之餘重可以做善事, 大家多多支持喔!

之後坐船仔去會展睇旅遊展（睇我去嘅地方同埋搭嘅交通工具就知我有幾港燦啦。。。ＨＡＨＡ）...睇完再坐叮叮佢睇林源三,小志強,載志偉同泰來...嗯...不過....點解有我最鍾意嘅大頭妹架?!重有盧比度叔叔呢。。。細個嗰陣覺得盧比度叔叔好型架！

 睇完就去食拉麵啦。。。同樹唔帶我去都唔知有呢個地方。。。好娘呢。。。

陸月喇星飯@喜記蟹將軍

唔覺唔覺同呢班朋友仔識咗N年....今年亦都係大家相識N週年紀念....由讀書到而且都同呢班茂李仍然保持聯絡都算係咁咯....當然其中一個保持聯絡嘅方法都係離不開吃喝玩樂....生日飯就係其中一樣喇...

6月嘛...又嚟6月喇星飯,關太喺報紙無意中見到喜記蟹將軍promote嘅端午節套餐,雖則端午節已經過咗...不過斷估佢總會有什麼父親節餐又或者晚市套餐之類...一於去試試啦!!

HAHA...果然有父親節餐, 我哋8個人叫半圍再加少少錢搭夠8位...加多個什菜煲....食物都算OK呀......有中蝦碌,蟹,燕窩,鮑魚等等...

黏土功課之魚樂無窮(一)

嘩!原來大半年有POST過黏土功課....嗯...對上一個COURSE整得唔多滿意想整好啲先POST...不過...又未有時間整喎...HAHA...所以事隔大半年先有嘢POST....係呀...呢期做咗金魚婆...整吓金魚!!

除咗金魚缸入面又點少得海草呢....

今次學整兩缸魚....除咗普通金魚重有熱帶魚....普通金魚已經接近埋尾階段喇....下次可以POST製成品喇.....YEAH!

三個大食的人....

HAHA..如題....3名中國藉女子....非常大食!! 前兩日約咗兩位朋友仔開飯兼睇戲....睇戲前去朗豪坊嘅八月軒開飯...食正餐都好"正常"架...

點知甜品就...HAHA....太耐有嚟食....原來個拿破倫係超大喲! 重叫咗個蕉蕉3重奏....超超超超飽.....

小王子

趁呢個展覽結束前走咗轉....雖則呢個展覽比較細, 不過行一轉都等於睇咗本書一樣...都唔錯呀!其實喜歡小王子都只係近十年嘅事....記得第一次接觸小王子係因為呢幅畫....記得有一日有位舊同畫咗呢幅帽唔似帽,山唔似山嘅畫,然後拎住幅畫問大家呢個係乜東東...當然...最後係冇人估到啦...而嗰位畫畫嘅同事就話咗比我知...呢幅畫其實係來自小王子呢本書...(話時話呢本書聽就聽過...不過從來未睇過喎,睇嚟呢本書都好似幾得意幾有意思)....呢個就係我對呢本書嘅第一個印象...

 

之後又過咗一段時間.....有一次我同師奶仔無啦啦要去上海出TRIP....嘩...成個星期...都唔知做乜好....最後無聊到要去書局買書睇...HAHA...就得當時我其實係想買張小嫻嘅書, 不過無啦啦又比我見到小王子同茶花女呢兩本書...最後就當然帶哂佢哋番屋企啦...

就係咁...我就買咗第一本小王子喇(HAHA因為有啲唔同嘅原因....前前後後買咗3本呢,家陣手上嗰本繁體袖珍版係我最喜愛, 絕不外借呢)...第一次認真地睇小王子.....已經好喜歡....唔知點解我睇完本書之後就覺得排骨仔好似小王子(我第一次睇小王子嘅時侯排骨仔祗係得5歲左右), 佢哋共通點都係天真而且心地善良嘅小朋友, 唔知係因為我喜歡小王子所以特別喜歡排骨仔吖,定係因為我好喜歡排骨仔所以咁鍾意小王子呢?!

  

係架...我認我偏心架....我真係o錫排骨仔多啲架....話哂識得佢最耐,而且一直以來佢真係最乖最善良嘅一位姨甥嘛...希望佢長大之後仍然可以保持善良嘅心(不過唔好比人蝦就得喇HEHE...)!!