大棠親子遊....又關我樹?!

話說十月某一晚...我如常咁去大家姐度黐餐....大家姐無啦啦問我12月11得唔得閒...咁早問實得啦! 原來呢日係Meme學校攪嘅親子燒烤...大家姐諗住預埋我...其實由Meme至排骨仔....兩歲至十二歲....親子活動呢家嘢都係預咗我嘅....當然亞祖非常樂意啦....通常都有得玩又有得食嘛...而且...亞祖又確係幾喜歡同小朋友玩....喜歡佢哋單簡又開心(其實小朋友真係好易滿足...haha)...

就係咁...呢個星期六晨咁早8:30就喺我屋企樓下集合...個個都好準時喎....連Meme都起到身...勁! 今次重搵埋肥表姐(肥師奶)一齊去...一行5人真高興!!坐旅遊巴好快就到大棠喇........第一次去咋....環境唔錯喎!

呢度都有幾多嘢玩...可以摘士多啤梨...騎馬...騎牛車...餵魚...餵羊同撈金魚等(呢啲活動當然要自費啦)...不過我哋太hea嘢...淨係玩咗騎牛車咋....

hea完一輪終於可以開始燒嘢食喇....Meme就專責食同食.....嗯...一個爐要3家人share...真係慳水慳力咗少少...重要得兩粒鐘燒...真係唔多夠...(不過佢都冇趕人...最後我哋都燒咗3粒鐘有多....haha)

燒到咁上下開校方面就安排咗啲親子遊戲....啲game都幾攪笑...Meme都玩得好開心呀....不過啲相喺大家姐度....未有得post住....其實....Meme淨係玩番梘泡都已經好開心...佢都係第一次玩咋......

4點就回程喇...番到屋企都5點咁滯...梳洗一吓就去咗深水埗開飯喇....今次去咗泰潮食....食咗海南雞...馬拉盞炒通菜....蝦餅....粉絲沙律...雞翼同冬蔭公....再去松記隊多碗糖水...真係超滿足.....