怪談 (PG家長指引)

注意:此篇日記涉及驚嚇情節,請家長陪同收看.....

日期:2007年7月30日

時間: 晚上7:30 分左右

地點: 威爾斯親王醫院隔離嗰個地盤

人物:一條茂利(亦即係亞祖)

話說今晚放工如常去探亞媽, 由於今晚要先去第一城攞中藥再去探亞媽, 拎完中藥就選擇咗另一條比較僻靜嘅小路去探亞媽....(即係威爾斯親王醫院隔離嗰個地盤隔離個地盤嘅一條小路,小路隔離就係行車路....)...

我一直沿住條小路行...行到半路中途....無啦啦就聽到有啲小朋友嘅笑聲喺我背後傳出嚟(聽啲聲...應該唔只一個小朋友)....初時只聽到細細聲嘅笑聲...我不以為然咁繼續行...後來聽到一把小朋友嘅聲音叫咗聲"姐姐"...都係細細聲咁...不過由於趕時間嘅關係所以繼續行冇理到...之但係....突然之間我好清楚聽見同一把小朋友聲音,好大聲咁叫咗一聲"姐姐"(之後又傳來一班小朋友嘅歡笑聲)....今次真係好大聲,好似喺我耳邊叫我咁! 於是我好奇咁向後望....不過.....一個人都冇, 連啲小朋友嘅歡笑聲都冇埋, 四周好變得寧靜...注意...條小路唔係好長而且好窄, 其實只係一條短短嘅直路...真係一眼望哂, 真係冇人! 我再望去地盤嘅大門口...亦已經鎖埋....而且條行車路周圍一架車都冇....既然四周一個人都冇....究竟聲從何來呢! 嗰刻真係超勁驚....只好行快步急急走人!

經過反覆思量,得出以下三個可能性會出現上述情況:

1. 有班小朋友夜晚晚偷偷走入地盤玩(因為條小路好窄根本冇地方喱埋), 見到個靚姐姐(即係亞祖)就諗住打個招呼!

2. 亞祖lee排太攰,黐咗線有啲幻聽 (表面睇嚟lee個好成立,不過上個星期一同一時間同一地點亦出現同樣情況,不過聲量較少我冇理到)...莫非...幻聽只係出現喺特定地點同時間?

3. 亞祖時運高乜都睇唔到...不過聽到...若然係咁我聽日要買番張六合彩...實中!

比我揀...我梗係希望係第一樣啦!