遊車河

趁全回歸有兩日假, 排骨仔又啱啱考完試, 所以星期日我同大家姐就帶咗肥師奶同排骨仔去威! 由於排骨仔話想去遊車河, 所以我同大家姐就陪佢顛咗大半日!

其實所謂遊車河(正確嚟講應該係遊地鐵河) 係由青衣站開始搭地鐵....一路搭....一路搭....搭到去柴灣再搭番去銅鑼灣(係咪好曲折呢)....注意唔係經東涌線架...係由青衣站-->荔景-->金鐘-->柴灣-->銅鑼灣....點解條路線咁型? 無他嘅...可以搭耐啲囉...搭去再去銅鑼灣high tea(不過都係食麥記咋)...重有一樣最緊要嘅就係....一定一定要揀有"蒙牛"廣告嘅地鐵 (其實再正確嚟講應該係要等到有"蒙牛"廣告嘅車先上)....點解要揀lee個廣告? 純屬排骨仔個人喜好....見佢平日都幾乖,所以陪佢傻吓啦!

千辛萬苦先等到架車,真係要影番張相紀念吓....係咪好似自由行呢!

最後我哋搭咗超過二粒鐘...出唔到閘呀...要去詢問處搵個哥哥仔幫手先得...哥哥仔真係唔該哂!

之後排骨仔同肥師奶就去咗我屋企玩同埋借宿一宵.....佢哋當然玩得好開心啦....我哋重整咗雞蛋布丁...不過今次加得太多水稀得滯添......下次再整過啫喱補數啦!