銀禧紀念日

尋日lunch 嘅時候中學同學仔Fanny無啦啦打比我,原來今日係我哋間母校嘅銀禧紀念日佢話想番去睇吓問我有冇興趣...話時話畢業咗咁耐真係一次都冇番過去,真係好想番去睇吓,所以我二話不說就應承咗佢, Fanny重話帶埋佢honey去添呀!

查實我同Fanny喺讀書嘅時候真係超低調,又唔夠叻又唔夠醒又唔夠曳更加唔係靚女,真係文又唔得武又唔得唔慌有人認得....不過我哋都好想番去懷緬吓.....睇校間學校同埋啲老師有冇乜嘢唔同!

一嚟梗係整番張到此一遊嘅相先啦,有咪有啲遊客feel呢!

原來起咗座新翼,入面重有lift架,連個教員室都搬咗去新翼!

踏入校門見到嘅第一個老師就係訓導主任曾sir,我哋走過去打招乎,估唔到佢居然話認得我 (但反而話唔多記得Fanny),記得以前見親曾sir都好鬼驚,今日見番當然冇再驚啦,不過就好似見番一個舊朋友咁,感覺好得意!

唔影過相都唔知,乜原來曾sir係咁高!

之後又見到以前教Ehics嘅麥太,不過佢真係唔多認得我哋,重問係咪做過班長,查實讀咗咁多年書真係半次班長都未做過!

冇見咁耐麥太都係咁nice,咁好笑容!

行咗陣又見到F.2個班主任Mrs Chan,可能係班主任又帶合唱團(想當年我同Fanny都係合唱團成員嚟架),所以佢都認得我哋....見到教體育嘅楊sir,又同佢寒喧咗幾句,佢重話lee個銀禧紀念日足足籌備咗三個月,制作認真咁話....不過咁多個老師之中最好記性嘅都算係Fanny F.3個班主任Ms Cheung, 居然可以噏得出其他同學仔啲名,重好nice好好偈添,不過可惜佢未教過我!

之後我哋就坐咗低一陣睇表演,足足hea咗4粒幾鐘先閃....lee個就係西樂團,重有個中樂團添呀

重有師妹們嘅舞蹈表演...隻舞好in,有啲日本街頭表演feel

亦有傳統嘅red cross步操,成日都覺得啲制服好靚,好後悔以前冇參加

連雜耍同劈木板都有...好似賣武咁,堅呀!