今日放工去咗安老院探亞媽,一去到安老院有個亞婆就叫住我, 但係佢係咁講鄉下話完全唔知佢噏乜!我問亞媽知唔知個亞婆噏乜鬼,亞媽又擰哂頭
! 其實我已經冇乜理個亞婆,但係佢又係咁噏重越講越大聲....我心諗,死啦佢係咪鬧梗我呢,又唔知亞媽有冇唔覺意得罪咗佢喎
!都唔知係咪要耍個冧先得.....
個亞婆不停咁嘈,嘈咗半鐘終於有個亞姐頂佢唔順咁話"你自己攞人哋啲廁紙仲咁大聲鬧人".....唉!原來係個亞婆撻亞媽啲廁紙但係又比個亞姐撞破, 亞婆見東窗事發咪發哂老皮話亞姐屈佢囉,為咗幾階廁紙嘈成晚,吹漲
...
之後又有另一個亞姐同我講"聽朝亞媽睇醫生要身份証喎!"...嘩!唔係fa,我心諗你唔好聽朝至講...頂!個身份証重擺咗喺屋企!冇辦法啦唯有番屋企攞啦....由於搭的士由安老院番屋企實在太重皮,而且由屋企去沙田啲亡命飛van怕且快過的士,所以最後都係搭的士去沙田再轉van番屋企(有一程重等唔到的士搭巴士咋
)....就係咁由安老院番屋企再由屋企去安老院....係咁來來回回....由8點攪到10點....足足搭咗6程車....計埋放工搭車去安老院....即係4粒鐘搭咗8程車.....真係堅過石堅!
沒有留言:
發佈留言