頻樸

趁有幾日聖誕假,屋企人又番大陸同澳門玩,尋日朝早我就搭船去澳門join 佢哋,由於佢哋早我一日出發,所以大家姐就話喺澳門接我船....不過我一去到澳門就接到大家姐電話,佢話佢哋趕唔接船叫我自己搭車去氹仔join佢哋...本來以為好簡單啦,殊不知啲巴士路線改哂,連邊度落車都唔係好知

,好彩最後都去到啫!

由於澳門多咗好多新景點,啲巴士路線都唔同哂.....

我哋去咗公雞食lunch,唔知係咪好耐冇去食呢又唔錯喎,啲蝦蟹都好新鮮呀

....食飽飯冇耐又走咗去食大菜糕...都好好味呀,肥師奶重揀咗佢至like嘅榴槤雪糕食添(不過真係好鬼臭呀

)....

肥師奶拎住嗰杯榴槤雪糕重勁過毒氣呀!!!

由於帶住兩隻小魔怪嘅關係我哋冇參觀啲賭場,不過我哋都去咗漁人碼頭hea咗陣!可能啱啱正式開幕又係聖誕節,所以都有唔少人呀...我哋lee啲懶鬼坐觀光車兜咗一個圈到此一遊就算喇,不過睇落個環境又真係唔錯喎

!之後帶咗兩隻小魔怪去玩啲機動遊戲玩到4點零鐘就番車去拱北再搭巴士番中山....

好彩早啲搭觀光車啫,遲一步都排要長龍呀....

漁人碼頭真係好多人吓....聖誕係唔同啲!

兩隻小魔怪就開心啦有得坐火車

....

之後又可以坐駱駝

本來以為趕唔切5點半班車去中山,但係大家都唔多想等下班車(要等成粒鐘架),最後跑餐死終於趕到....勁!!!

趕得咁辛苦番到大陸梗係要按吓摩啦,所以尋晚一條友去咗按摩.....真係舒服哂

....不過今日又要搭3粒鐘巴士番香港,真係風塵僕僕,好攰呀

....

去到中山兩隻小魔怪又係玩揸車,我都唔執輸撻咗佢哋部ben屎揸咗幾步咁大把(估唔到又坐得落喎

),希望冇坐爛架車啦!!!