西餐班part 2 - 第5堂

隔咗兩個禮拜清明同復活假期...今日終於可以番西餐班喇! 又可以乘機又食又拎喇...! 不過食之前都要付出少少勞力嘅...首先就玩吓批薯仔皮同切薯仔粒先......(一陣用嚟煮嘢食架)....

攪掂哂啲薯仔....就可以開始煲湯喇....今次係煲"西洋菜"湯...成日以為西洋菜淨係用嚟煲中湯....今日先知原來西餐都會用西洋菜煲湯....確係型! 除咗西洋菜, 重要薯仔同洋蔥架....材料準備好哂喇!

首先要炒香啲洋蔥先啦.....

跟住再落薯仔同上湯.......

煲一輪之後再加埋啲西洋菜.....

煲好就要將啲湯同湯渣一齊拎去攪.....

攪完就會變咗個青bb西洋菜湯喇....湯入面白色嗰舊係sour cream嚟架...不過我哋一致認為....個sour cream好似同個湯唔多match....怪怪的....唔加好過!

我哋飲梗湯嘅時候...師傅已經準備定下一個菜...就係焗薯仔粒....佢好有心機咁切碎啲煙肉...真係切到好細粒...好好食...一啲都唔覺肥重好香添!

由於時間關係...頭先切咗嘅薯仔粒已經煲熟咗...再加埋麵粉...cream同調味...之後就撈撈佢先.............

加埋啲炒香咗嘅煙肉再拎去焗........

新鮮出爐...好香呀......

最後就要整番個主菜先......汁呢家嘢都係要師傅親自操刀....

我哋就玩煎牛柳啦...塊塊都靚咁喎.....

由於今次少人番...師傅就煎多幾塊比我哋試食...正!

當然...我哋自己都要負責煎番自己嗰塊啦....一人一塊....(好好味呀小青蛙)!

放咗學就要飛地鐵去二家姐屋企...一睇呢個蛋糕就知我去二家姐屋企做乜啦!

咪又係生日趴地啦.....今次嘅主角係排骨仔....11歲喇....大個仔!

oh....今次佢哋個個都唔得閒買禮物呀...好彩我尋晚放工買咗兩份啫!

哈....雖則呢份禮物out咗啲...不過佢哋未收過嘛...啱玩就得啦!