問侯

唉．．．今朝心情極差．．．一出門口又撞到個師奶, 又要一齊搭lift,唉! lee個簡直係我嘅大忌．．．因為每次見到啲師奶都好似開答問大會咁．．．成日都問”幾時接亞媽番屋企住”又或者直接問”點解重唔接亞媽番屋企”．．．次次都要解釋原因, 真係好煩!

其實為咗避開班師奶，我每日喺出門口前我都會聽吓出面有冇人聲, 冇聲我先敢踏出門口, 當然,　lee個方法祗可以避開隔離左右嘅師奶們．．． 重有來自遠方嘅時師奶點算？．．．所以我重有一招就係通常係特定嘅時間出門口（當然係揀冇乜師奶出沒嘅時間啦）．．．不過今朝就．．．．唉！都怪我出門口嘅時候慢吞吞啦．．．遲咗兩分鐘出門口就出事．．．

搭lift期間我已經扮忙整吓衫整吓袋．．．冇同個師奶有eye contact．．．不過．．．個師奶當然唔放過我啦．．．又係問埋”亞媽係咪可以番屋企喇”，”而家佢點啫”．．．等等嘅時話！無疑．．我相信佢哋問嘅問題係由於關心．．．嗯．．．可能．．．講嘅冇心，聽嘅實在太多心．．．言談之間硬係覺得個師奶認為我係一個唔理亞媽嘅忤逆女,佢今朝重問我, 亞媽係咪可以自己煮飯同照顧自己!!唉! 師奶呀師奶．．．若然好似係咁講我晨早就接亞媽番屋企啦, 乜你以為我一個星期搵5日去探佢唔攰咩, 你以為我一個人孤伶伶喺屋企好開心咩, 你有冇諗過要亞媽住老人院最傷心最難過會係邊個呀, 點解你要一次又一次喺晨早流流又提起我啲傷心事, 重要係我講乜你都唔係好信咁!

老實講．．．若然我同啲唔識人講"我送咗亞媽去住老人院．．．", 我相信單憑lee句說話．．．十個有九個人唔理係乜原因都會認定我係一個又衰又忤逆又不孝嘅人．．．