愛與和平.....

自從星期日喺電視睇到啲警察用"暴力"驅趕啲市民之後, 心情久久未能平服, 真係好想去聲援一吓啲學生同市民呢!對,政治嘅嘢我真係識條毛咩,之但係淨係見到啲警察嘢嘢都淨係識濫用暴力已經唔得喇...

怕事嘅亞祖從來都冇參與過任何一個遊行或者集會, 什麼六四晚會、七一遊行、反國教集會、港視不獲發牌集會,全部都係睇完電視當參與咗(HAHA...真的很爛), 可能睇得新聞太多啦, 唔知點解次次睇親啲新聞, 啲新聞報導總係話"某某國嘅集會/遊行最後演變成暴亂...", 就係呢句說話太根深柢固, 嘩!"暴亂"喎, 驚ssss, 所以我從來都唔敢參加什麼遊行或者集會! 不過....今次.....真係好想身體力行咁支持一吓學生, 反暴力喔,當然真普選都好重要呢!! 

就係咁, 星期二晚(隱陣起見, 見到星期一冇乜事發生先決定出嚟!!), 喺油麻地放咗學就行咗去旺角,希望可以盡一丁點力,支持一吓(當然,有小部份好奇心啦)!!終於明白"愛與和平"嘅抗爭係什麼一回事...有啲市民席地而坐(或者企吓), 聽聽講者發言, 頂多哎吓口號,當然都有唔少人嚟湊熱鬧影吓相...有好多HELPER不斷派水、飯盒、生果、麵包、餅乾等, 由於天氣熱,又有人不斷向市民灑水降温....我諗比平時龍蛇混集嘅旺角更和平!當然, 旺角確係比較雜,確係有其他途人講一啲挑釁嘅說話, 見到有個亞叔因為坐緊嘅的士被阻塞了一陣(真係一陣,幾分鐘而已),呢位亞叔伸個頭出窗外見到一位年青人就失控的向呢位年青人破口大罵,呢位無辜嘅年青人被人問候媽媽,甚至問侯埋佢祖宗十八代...很可憐呢! 旁人都怕年青人按耐不住還擊, 幸好年青人保持冷靜, 最後架車開走先可以回復平靜呢!! 我相信喺旺角坐鎮嘅市民一定要更加更加克制同冷靜,否則真係好易出事呢! 終於用咗兩個多小時由油麻地行到太子先閃!

雖然想支持,但係都係安全至上....十月一話哂係國慶, 斷估應該安全喇掛!今次由中環出發,慢行至銅鑼灣, 呢邊確係冇旺角咁雜....行吓坐吓又企吓, 3粒鐘有多...攰!

但願問題可以早日化解, 消耗戰呢家嘢真係令人擔心,香港人嘛乜都要快,但係又3分鐘熱度, 好多時都係一蝸蜂心態, 恐怕過咗幾日假期之後大家熱情冷卻!!記住"愛"是恆久忍耐,大家一定要堅持呀,保持克制,重有...千萬越佔越多地方呀...會惹人反感不特止(的而且確影響了大家日常生活呢),太多據點會分薄資源同人數,亦好難兼顧, 似乎集中一點比較好呢!! 千萬不要出現另一個六四...神呀, 救救我們好嗎...大家需要袮!!