富貴午餐@伊藤

話說前排敞公司皇恩浩蕩咁每位員工都比5舊水作為team gathering(一般嚟講team gathering即係成個部門齊齊整整咁食餐飯)...本應想搵個地方一齊食晚飯...之但係...攪完一大輪都就唔到時間...終於由晚飯改為lunch....去公司附近搵間好嘢食! 最後揀咗"伊藤"....

喺呢頭做咗咁多年....我都係第一次去呢度食咋....無他嘅...呢啲貴嘢平日真係食唔起哦! (落樓起碼位位兩舊)


話就話位位有5舊水...不過我哋部門有啲同事係外援嚟...所以冇5舊水...當然食飯都要預埋佢哋啦...七除八扣之下...位位都有3舊幾水食嘢嘅! 一場嚟到....梗係唔貴唔叫啦..haha...你睇...呢碟刺身幾靚...呢個係set lunch嚟架...重有前菜, 湯同天富羅!

我就揀咗呢個鱈場蟹喎喇...嗯...佢個樣都好似ok咁喎...之但係....睇真啲典解佢啲腳咁瘦嘅?! 重要腳短短貢...得番3條腳貢大把, 底就有一堆菜同菜同菜加埋兩舊仔豆腐! 頂...成3百幾蚊...唔係化!! 一啲都唔值囉!! 重要唔跟飯....最後要加15蚊一碗嘅白飯!! 呢鍋嘢超搵笨! 當然...味道係ok....不過物非所值!

亦都有人叫咗魚生飯....呢個樣都ok嘅....嚟呢度都係要食刺身同魚生比較穩陣!!

食後感: 食物quality都算唔錯(由其係刺身同魚生)...不過....大家一致認為.....食唔包囉....份量太少喇!!唉! 呢餐應該係史上貴而最唔飽嘅一餐!! 好在唔駛我比...唔係一定嘔血!!