星洲自由行 - Day 1

各位朋友仔你哋好呀, 我家陣喺星洲用梗個龜速寬頻上梗網呀...個寬頻都唔知乜鬼嚟架連MSN都上唔到．．．激死人喇．．．

算罷啦，都係報告吓今日行蹤先啦，今日下晝搭２點嗰班機嚟星洲．．．唉！今日１２點去到機場又勁多人，攪到好遲先入閘呀．．．重冇得揀位坐，隔離坐咗個大陸同胞呀, 佢唔識填張入境紙．．．所以我一路填佢就一路昅，大佬呀填梗個人資料架嘛．．．咁都得！我當然唔比佢望啦，佢又笑笑口咁望住我想我幫佢填．．頭先明明聽到個空姐話轉頭幫佢架喎．．．是鬼但啦，連空姐嗰份都要撈埋吹漲！

頭先就係搭lee隻機嚟，鬼咁多人．．．

期待已久嘅lunch呀...晨早起身乜鬼都食唔切...飛機餐又遲遲未到....4點幾先有嘢食....最慘係...成份嘢...得條雪條係最好味....其他就.....

一搭就搭咗３個幾鐘，到星洲都６點喇，見天就黑我就用９秒９去辦入境手續，攞行李，”唱”錢同搵的士．．．７點鬆啲就到酒店喇．．．哈！又估唔到間酒店又唔錯喎．．．

張床好大呀．．．．

重有大大張工作枱，家陣我就係喺度寫梗卜架喇．．

全場最正就係lee部大電視．．．好想抬佢番屋企呀．．．

雖則間酒店確係幾新淨幾唔錯．．．不過條街確係好唔掂，一街都係印度男子．．．頭先搭的士出去食飯嘅時候，一路搭咪一路望吓條街囉，點知一個唔小心用個企喺街嘅印度男子有eye contact...條茂利竟然向我單眼．．．頂！唔駛fa，好彩我坐喺架車入面啫．．．嚇鬼死呀

今晚就去咗Orchard Road(烏節路) hea喇，本來想食餐好嘅，不過見商場入面個food court 都好似唔錯，所以走入去試吓．．．都ok呀！

lee個珍多冰睇落好似唔多靚仔，不過都幾好味！

全晚最驚喜就係lee個雪榚磚喇，佢同香港嗰啲唔同架，係即叫即整架，嗰兩塊威化係即場夾落舊雪榚度，所以食落重係脆架．．．好好食，啲雪榚重有好多款式比你楝架，一蚊坡紙一舊咋，抵！