最後一擊

又係lee個境...係咪熟口熟面呢...冇錯又係中山...繼復活節番去玩咗三日之後,今個星期六、日又再番去玩過,不過今次嘅陣容同上次唔同,除咗大力、大家姐同我lee個鐵三角之外重有亞媽添, lee次係最後一次住有渡假屋住.....真係有啲唔捨得

!

喺香港確實又好難搵到啲咁舒服嘅環境hea.....

重有排骨仔最鍾意坐嘅穿梭巴士同van仔......

哈哈,上次同排骨仔番去嘅時候我哋坐唔到lee架佢最愛嘅"哈哈笑van仔",今次我終於搭到喇,梗係影張相潤吓排骨仔啦!

總括嚟講今次都玩得幾開心(其實都冇乜嘢玩,都係按摩食飯shopping),不過今朝飲茶就遇到件激氣事,話說我哋趁臨走前去飲茶....我哋係食食吓嘢有一個女侍應同一個傳菜姐姐行過嚟,個傳菜姐姐就諗住收咗啲唔要嘅碟,其中有隻碟有滿滿嘅污遭水,個傳菜姐姐一拎起隻碟我已經閃開(估到佢實會倒瀉啲污遭水),果然不出我所料,好彩我避開咗, 不過碟排骨就遭殃喇,我哋食咗兩舊咋! 嗰個傳菜姐姐一面拎走隻碟啲水就一路咁滴,最後佢祗係講咗句"唔好意思"走閃咗....

咁我就同另一個企喺我後面嘅女侍應講:

「碟排骨污遭哂,你可以換過碟嚟?」

點知個女侍應話:「係咩?乜污遭咗咩」

我就話:

「吓!乜你睇唔架咩?」

女侍應話:「我真係睇唔到喎....」

(唔係fa,明明企咗喺後面,莫非佢隻眼有問題!)

大家姐又忍唔住搭爹話:「你睇唔到唔梗要,叫番頭先嗰位姐姐嚟問囉...」

個女侍應就話:「咁我睇吓先啦....」

我哋見過咗一陣都冇消息就諗住再問另一個部長姐姐啦,點知嗰位女侍應見到我哋想搵部長姐姐就即刻閃出嚟話: 「係呀,我哋換嗰碟排骨比你,我頭先都見到有少少污遭水滴咗落去...」(口風轉得真快,重忽然開埋眼添,真係吹到啤一聲......)