爪哇課程

前排終於報咗個Java course,而今日就係開課嘅第一日,由於要辦啲私務嘅關係所以今日放假一天,原本諗住辦完私務可以他他條條番學,點知啲私務由3點半攪到6點半!攪完啲嘢之後先由沙田趕去灣仔番學,趕到死咁滯...成7:30先番到學校呀...足足遲咗半粒鐘!

話時話我都係第一次去灣仔嗰間VTC咋,又幾靚幾新架喎,重估唔到個course都有十零人喎!我一入到課室坐唔夠5分鐘啫,亞sir就話"咁大家做吓lab先啦...",唔係fa我都係遲咗半粒鐘啫乜啲進度咁快呀.....最慘係坐我左邊嗰位姐姐仔又埋頭咁玩梗msn,唔多好意思問佢功課,坐右邊嗰個叉叉(冇錯!佢外表絕對係一個印度人,不過啲廣東話可能流利過我!)又遲番過我.....喺lee個左青龍右白虎嘅情況之下(亞sir又比另一個同學仔纏擾住)唯有靠自己...好彩後來左邊嗰位姐姐終於做功課可以乘機問佢，幾經辛苦先知道做梗乜鬼!不過亞sir講番個lab啲答案嘅時候先話"lee啲其實未教,遲啲會講"...頂!重以為佢真係講得咁快添....做完個lab先教比佢吹漲！

雖然個亞sir講書都係"一般",不過lee個course好似同師奶仔之前讀嗰個course有啲唔同咁,lee個亞sir教我哋用"netBeans IDE”(呢個tools睇嚟唔錯真係要推介比師奶仔! ),重有兩本制作認真嘅書，睇落都算唔錯吖！

堂堂都要拎lee兩本嘢番學確實幾甘，上完個course實手爪起展!