寧可信其有

今日又係month end喇,攪吓lee樣再攪吓嗰樣攪到7點先閃...咁啱見到個男同事又係放工,所以同佢一齊行去搭地鐵,咁我哋一路行一路吹水.....

講講吓佢無啦啦問我:「亞袓,你做過伴娘未呀」

我答:「有呀,做過兩次....都係幫我啲家姐做咋」

同事又再問:

「咁你會唔會再做呢」

我好肯定咁答佢:「唔會,真係完全唔鍾意做,太煩

....可能做過兩次都有啲煩躁嘢出現,簡直係有童年陰影,做"姊妹"又無妨....

」

男同事聽完我講之後就不打自招咁話:「有個朋友仔話搵我做伴郎,之但係我已經做過兩次....」聽完之後我真係忍唔住勁笑

....事關我又真係未聽過lee個阻咒會發生喺男仔身上...而且連我lee個八卦人都唔多信lee樣嘢!

雖然我喺度勁笑...不過男同事就好認真咁話:

「若果真係取唔到老婆點算呀...」

見佢咁認真我即刻收起笑容(不過忍笑忍得好辛苦....)我重話:

「咁又係嘅...都係博唔過....」

話時話我又真係冇朋友做過三次伴娘/伴郎喎.....莫非lee個阻咒真係咁堅!