我的黑仔日記....

 黑仔....唔知點解....近年發覺每隔一排就變黑仔JOE....前年農曆七月十四搭吉LIFT竟然聽到對母子喺度對話...上年4月買新相機點知5月去東歐, 行程去到一半部相機就死咗,而個TRIP本身都冇乜嘢好提喇!

唉....今年又係參唔多時候....又嚟過...黑仔又嚟搵我! 話說前排洗衣機壞咗重攪到屋企水浸...諗住豁出去買過一部新機嚟啦....終於等到新機....當然係第一時間試機啦...都唔錯喎....操作又簡單...啱哂我!! 隔幾日之後又要洗衫喇....點知...部洗衣機竟然唔著....點襟都著唔到部機!! 送咗嚟不過係4日啫駛唔駛咁快壞呀大佬! 真係人都顛...當時我重好快會去旅行.....好彩大家姐幫我CALL師傅..., 最後整機師傅睇完部機...佢話要換底版...嘩...咁大鑊!最後佢又話連零件都冇哂...妖...真係吹啤啤....我又唔明點解部機送嚟未過7 日部機就壞咗都唔打算換部新機比我...真係激死咗! 家陣佢話連零件都冇...大家姐緊係乘機叫佢換部新機比我啦...好彩呢單嘢有大家姐幫我跟咋....事關部機係喺我去旅行嗰陣送嚟....唔係有佢幫手我真伙呢咁HEA!!話時話唔知係咪我黑親家姐呢....喺佢屋企睇睇吓電視...佢部電視無啦啦燒fuse壞埋!!




可能你覺得上面嗰件都係小事啫...都係嘅我都係咁諗..之但係加埋呢單嘢...我不得不承認自己真係黑仔囉!! 去咗曼谷咁多次...次次都冇事...今次比人老笠撻嘢真係有啲老貓燒鬚嘅感覺...最慘最慘嘅係我第一日就出事重要係冇哂"亞公"啲錢! 大佬...自己啲錢冇咗就話自己攞嚟....家陣連累埋其他人真係超勁爆down!!朋友仔冇怪責我, 我自己都勁唔好意思啦! 最後重要攪到啲朋友仔陪我去警局報案....去報案當然唔係諗住可以捉到個賊仔啦...我哋祗係想驚局寫個REPORT嚟CLAIM保險!希望CLAIM到少少幫補吓啦!