喪食兵團@馬交 - Day 2

話咁快又到咗第二日喇...一早起身食個早餐先....酒店入面嘅自助餐...都唔錯呀....不過...尋晚先食咗7餐...今日又食呢個自助早餐真係超飽!食完個早餐時間尚早....嗯...橫掂前一晚又勁唔夠瞓...所以我哋安排一個非常豐富嘅節目...就係....番上房眠一眠....瞓到check out為止....呢個節目係咪好好呢!

瞓醒就check out喇....咁...去邊好呢?! 嗯...不如又去食吖....呵呵! ...食番個葡撻先....超多人排隊呀....不過...我哋嘅食後感係...."咪就係同kfc嘅葡撻一樣囉!"....

食完葡撻好鬼口乾呀...朋友仔話"咁...去飲番杯茶咪啱囉!"...嗯...又係喎...有佢嘅道理...haha...呢度係"葡京日麗"呀...其實啲食物都唔錯架...不過我哋真係太飽喇....叫咗4樣點心咋...有叉燒包, 蝦餃, 蝦多士同咖哩蟹肉撻...

食飽hea完就繼續行程, 乜我哋有行程架咩?!..有架...我哋嘅行程咪就係勁走回頭路同無無聊聊周圍hea囉...hehe...就頭皮行吓啲睹場啦....先去永利睇樹....再去美高梅睇熊貓....乜我哋去咗郊遊麼?!

行完又食喇....小小哋食吓雪糕啦....一人一個雪糕三文治....好似唔夠喉喎...食多支紅豆雪條先....朋友仔就食花生雪糕....好味!

食完雪糕去附近行吓先.....

重要去買手信呀...噢!一行入手信街就聽到啲牛雜"呼喚"我哋呀....明哥...你啲牛雜確係幾明味......嗯...一人一串牛肚吖唔該........

都係嗰句啦..食完嘢口乾架嘛..又要去飲嘢喇...近近哋番酒店飲啦...横掂要拎番我哋寄存咗嘅行李....順便坐吓囉.....

番香港前要食餐晚飯....正所謂...食飽先上路嘛....我哋去咗蘇浙匯食呀....朋友仔們一面order一面話飽...不過...我真係對大家嘅"食力"好有信心....我鼓勵佢哋放心order啦.....終於....相入面嘅所有食物.......都一件不漏咁...比我哋消滅哂......呢餐確係好味....喺咁飽嘅情況之下都食哂啲嘢...重要覺得好味...真係掂!

等我介紹一吓啲食物啦..(睇番啲相真係一路寫一路吞口水呀)....有酸甜小排....我最like嘅醉雞...松子魚....素鵝....火腿上湯浸蛙蛙菜.....小籠包....棗泥窩餅同棗泥拉糕....全部都好好味呀....真係好回味.......