泰國食hea瞓揼之旅 - Day 1

好緊張呀, 寫咗年幾卜, 今次第一次寫遊記咋.....話時話對上一次搭飛機去玩已經係兩年幾前嘅事....都好耐吓....今次真係要玩番夠本呀, 所以今次我同幾個朋友仔(lu lu, 佢個妹同關太)  就揀咗個早機上晚機返嘅package...實行玩到盡一盡!

有幾盡...我哋搭晨早8點機出發呀....即係要6點去到機場, 好彩搭頭斑機場巴士都趕得切啫...由於關太住得太遠,所以前一晚去咗我屋企瞓呀...不過佢lee隻魔鬼居然唔瞓...重引誘我睇電視, 攪到成點先瞓...啱啱恰著眼個鬧鐘又响喇....之但係諗起有得玩又冇咁眼瞓喇....

我哋6點鬆啲就到機場同lu lu姊妹花集合, 入閘之後再去大家樂食過早餐之後就上機...正式展開四日"泰國食hea瞓揼之旅".....

lee個就係喺飛機上食嘅早餐...我哋明明聽到係庵列嚟架喎...但係成碟嘢都搵唔到邊舊嘢似"庵列"!

熬咗二粒幾鐘終於到泰國喇....嘩!個雞場好鬼大呀..行都行到脚仔軟...不過又真係幾新幾靚...

機場入面重擺咗好多好有泰國特色嘅神像, 都幾特別架!

由於我哋驚4 條友搭的士太迫, 又唔想分開兩架的士, 所以預先book定架車...個司機重舉哂牌接我哋機添...真係威呀......,係喎...喺度順便喺度高度表揚吓lu lu姊妹花...真係麻煩哂你哂幫手book車book機票book酒店...就連coupon都幫手print埋....真係唔該哂呀....

原本晨早10點幾到咗機場以為大把時間啦...點知....超勁塞車呀...攪吓攪吓參唔多12點先到酒店(不過又啱啱好可以check in)......

lee間就係我哋住嘅酒店喇.....都好新吓架

大堂附近有啲coffee shop, 夜晚重有人唱歌架....

間房好企理...張床唔算好大, 不過都幾好瞓架...

哈哈...唔知點影好....最後.....影埋自己添..............

喺酒店hea咗陣之後就出發搵食喇...成點鐘要食個lunch先....由於怕塞車,都係搭bts穩陣...第一站就係Big C嘅food court....go go go......

先嚟一人一碗粉先.....好味呀....不過份量太少...唔夠喉...所以....

叫多碗同關太share.....不過....重係有啲唔滿足添....

再嚟一碟猪手飯....四個人一人食一啲....猪手都唔錯不過可惜啲飯唔得呀...

嚟多個炒唔知乜乜粉.......酸酸甜甜....正呀!

試埋lee個燒魚蛋....lee個都幾得意....

咁多嘢又比我哋食鬼哂....真係.....堅!!


之後就去咗唱錢...然係梗係到shopping時間,我哋就去咗Central world 一帶行....主力係去NaRaYa買蝴蝶袋喇...淨係行咗兩間NaRaYa都足足行咗2粒幾鐘,強!

行陣又影吓相先...間shop門口個公仔好得意呀....

行得攰攰哋就去咗食雪糕, 我哋叫咗兩款...好味呀...不過個雪糕球好似細咗啲...可能我哋班cheap精叫咗嗰啲雪糕都係優惠價啦......

我同關太就揀咗lee個......好味架.....

食飽之後我哋就再戰Zen, 本來諗住去hea 一hea啫....點知一hea又hea咗唔知幾粒鐘喇.....冇法啦.....買女人嘢吖嘛....真係試都有排試....行完Zen同NaRaYa之後我竟然面臨破產呀...真大鑊! (不過我唔係唱咗好多錢就真).....

行飽之後就飛的去咗建興醫肚....嘩嘩嘩...好好味呀...(好似浮誇咗少少)...不過又真係好抵食好好味架....lu lu講得冇錯...真係多人去食會開心啲...可以叫多幾款餸食呀...

有胡椒蟹...好惹味架....不過都幾辣吓....

重有大大隻蝦......

足料冬陰公....又係幾辣吓....不過好好味!

整個清清哋嘅排骨炒菜心....都唔錯呀....

重有生蝦...好大隻啖啖肉...好正呀...加埋個炒通菜....好滿足呀!

蝗虫即係蝗虫成枱嘢又比我哋掃哂......


再叫多咗生果盤先收手...問你怕未....

食到飽哂又飛的去body tune揼脚....由於嗰度啲情調實在好(四周黑嘛嘛咁), 而且我哋又超勁攰...所以揼揼吓我哋個個都瞓鬼哂.....揼咗一粒鐘之後我哋先打道回府....番到酒店已經11點幾....