繼續...嫺言嫺語: 泰國食hea瞓揼之旅

好快又第三日喇....都係晨早喺酒店食早餐...本來關太佢哋食飽早餐諗住去游吓水先...不過落大雨呀又游唔到....喺酒店度hea到11點幾又出發...今日嘅target就係食意大利嘢同做spa...

由於間意大利餐廳比較偏僻, 我哋飛的去到附近嘅shopping mall...一入門口我哋就比嗰檔買t-shirt同lesportsac袋嘅counter吸引住(其實成檔嘢夾夾埋埋得個十零個袋咋)...不過價錢比香港平四倍有多....咁筍我哋梗係唔放過啦...我哋揀好哂之後就問佢有冇"new one" ...佢一律耍手兼擰頭話冇...只係其中一個款我哋想買兩個...佢先搵到多個咋...係咪咁啱呀, 要一個新(new one)嘅就冇, "one more"就有!...比我哋狂風掃落葉之後...個counter得番三四個袋咋...唔知係咪比我哋帶旺個場...之後有兩個local 人幫趁佢買袋添....買完嘢就繼續搵間餐廳, 好彩有途人識路...喺佢指點迷津之後好快就搵到間嘢喇!

由於lu lu話夜晚食意大利好似貴啲, 作為一班cheap精梗係楝食lunch啦....就係lee間喇...

先嚟頭盤同麵包....lee個default已經有架....淨係lee啲都已經好好味!

叫咗個有巴拿馬火腿嘅pizza....好味呀...個pizza好脆呀....啲hams更加唔駛講..好得!

重有鵝肝...百幾蚊咁好食...重有三舊鵝肝抵呀....

再叫多個長通粉...lee個冇乜特別志在填肚...不過不失啦...

lee個唔知乜東東嘅甜品係送架....唔知乜嚟...甜甜哋好似食空氣咁...

食飽之後再去咗番之前經過嗰個mall, 掃完一輪我哋又再經過之前買lesportsac嗰檔counter...頂!佢居然擺咗啲新袋出嚟...有啲款就係exactly我哋買嗰啲呀..又話冇新嘢!我哋話個檔主佢又冇反應喎....激死呀!

之後我哋又飛的去咗MBK行街街...不過去到一陣無啦啦毒發添...真慘...好彩都係痾咗一次啫.....言歸正傳去MBK到就梗係睇converse啦....不過我lee啲腳細人真係冇對啱size...都係算罷啦....慳番!! 去到MBK就梗係食埋咖央多士啦.....綠色嗰個係咖央多士,好似泰國耶子糖味...唔錯....白色嘅係練奶多士...都好味...佢啲麵包好鬆軟架....................

加碼叫多個original咖央多士...lee個重好食, 冇綠色嗰個咁甜....正!

食飽之後我同lu lu姊姊花就去咗Divana做spa喇...關太就一條冷去Siam行...諗住之後再去Siam匯合啦....我哋本來book咗6點架...不過hea 吓hea吓遲到添...參唔多7點先到...又要揀香薰油又要揀mask又要揀浸浴...揀完一大輪7點幾先正式開始...我哋重揀咗個3粒鐘spa...真係有排攪...

間嘢嘅裝修又唔錯呀...幾舒服...連杯茶都好飲啲...

入房喇...我哋一人一間獨立房...不過好似間間都有啲唔同...我就好滿意自己嗰間喇...

當然唔少得張舒舒服服嘅床啦....個枕頭重有香味添....

擦乾淨個身就開始oil massage, 之後就去steam咗同整個杰撻撻嘅mask....沖完身再按摩...嘩....按咗咁多次今次最正....最後就玩埋lee個浸浴...真係好正!

不過當我個身敷梗mask嘅時候發生咗段小插曲....話說個spa師傅幫我塗啲黐立立嘅嘢(類似芝麻胡嘅物體)喺身嘅時候我個電話突然响, 成身都係杰撻撻個電話又遠...真係聽唔切...之但係過咗一陣個電話又响...死火...莫非有要事...都係聽啦...原來係關生打嚟架...佢一嚟就話搵關太...有乜事咁緊張呀? 原來布吉嗰邊發生空難...佢擔心我哋無啦啦去咗布吉呀....果然細心喎...咁啱關太又冇帶電話,搵唔到個老婆...真係嚇鬼死佢....我報完平安佢就應該放下心頭大石喇掛! 不過用完隻黐立立嘅手聽完個電話之後我個袋同電話都係一撻撻嘅芝麻胡呀...話時話lu lu都收到佢親友嘅慰問電話....喂!咁我呢...乜我啲家姐冇搵我架, 我淨係喺翟度翟收到大家姐電話問我借NDS同提我買手信咋...乜原來我條賤命連部NDS同手信都比唔上....唉!下次咪執輸...自己打個電話比自己報平安先...哼!

嘩...整完都參唔多11點喇...關太重send sms比我話番酒店...見咁夜我哋唯有去買外賣番酒店同關太分甘同味啦....最後我哋買雞飯食...一落的士就到喇...買3盒飯share先....

檔嘢有啲大排當feel嘩啲蒸籠好似人咁高架....

行咗陣又見到人妖姐姐雞飯...買咗盒試吓先....

再買啲串燒番去....起碼要買10串架...不過好彩唔係好大串...應該食得哂....

梗係唔少得甜品啦......芒果糯米飯...個芒果大大個好甜呀...

買完嘢之後又飛的番酒店....唉!上咗嗰部的士之後真係驚驚哋....因為個的士佬好似傻傻哋咁, 一上車就好鬼熱情咁同我哋講啲唔咸唔淡嘅廣東話, 之後我哋講一句嘢佢又無啦啦repeat一次....又喺度自言自語...lu lu忍無可忍咁爆咗句"佢係咪顛咗呀"....個的士佬居然識搭爹話"NO"...吓...乜連lee句廣東話都識...我哋真係唔敢再亂講嘢喇...好彩最後塞完一輪車都安全到酒店啫!