北上喪揼@聖淘沙

星期六又約咗小青蛙佢地北上....又嚟喪揼喇.....喪揼之前就喪食吓先....由於今次我哋去聖淘沙...唔知入面有冇嘢食...所以去羅湖商業城搵間酒樓食嘢先....

食飽就搭車去喪揼....話明係喪揼....緊係顛顛哋架喇....大家一致決定...1腳4身...即係揼1 粒腳喪揼4粒鐘身....其實佢唔足粒架....每part 50分鐘架咋...都唔係好過份啫...haha....不過話時話北上揼咗咁多次...呢度啲師傅又真係好認真...唔只幫係揼骨...重幫你推埋淋巴, 重係好仔細嗰隻....真係痛都爆....拆骨一樣....不過咁通一通又真係鬆好多哦! 嗰位姐姐重提醒我有啲部位自己耐唔耐推吓都得架....好細心!!可惜佢衰收尾...收錢又亂亂哋攪到我哋勁火呢!!

拆完骨又食過...今次都係去滿庭芳...喜歡麻辣嘅朋友真係要去一試....由其係佢個水煮魚....好滑, 重有串串蝦好惹味....唔食得辣嘅又可以試吓佢啲湯...今次我哋終於試到天麻魚頭湯...好夠味...掂! 重有海哲頭, 蒜泥白肉....全部都好味架!!

食埋個甜品棗泥酥就真係超滿足喇!!